អន្តរជាតិ
លើដីមានភ្នំ Everest ឯបាតសមុទ្រមានជ្រលង Mariana Trench
× នៅពេលដែលមនុស្សមានសមត្ថភាព និងឆន្ទៈជាច្រើននាក់មកពីគ្រប់ជាតិសាសន៍ បានធ្វើដំណើរឡើងទៅកាន់កំពូលភ្នំអេវឺរ៉ែស មានមនុស្សតែពីរនាក់ប៉ុណ្ណោះ ដែលបានធ្វើដំណើរទៅកាន់ជ្រលងសមុទ្រជ្រៅជាងគេបង្អស់។ ភ្នំអេវឺរ៉ែស គឺជាកំពូលមួយ ក្នុងចំណោមកំពូលជាច្រើនទៀតក្នុងជួរភ្នំហិមាល័យ ដែលមានកម្ពស់ ៨៨៥០ម៉ែត្រ។
គេហទំព័រ
deepseachallenge.com បានបកស្រាយយ៉ាងដូច្នេះថា ចំណុចជ្រលងសមុទ្រដែលជ្រៅជាងគេនេះមានឈ្មោះថា «Challenger Deep» ដែលជាចំណុចពិសេសមួយក្នុងជួរជ្រលង Mariana Trench ។
ជ្រលងសមុទ្រនេះ មានទីតាំងនៅមហាសមុទ្រប៉ាស៊ីហ្វិក ភាគខាងកើតនៃប្រទេសហ្វីលីពីន ដែលមានជម្រៅរហូតទៅដល់ជាង ១១គីឡូម៉ែត្រចុះទៅក្រោម។ បើប្រៀបធៀបជាមួយនឹងកំពូលភ្នំដែលបានលើកឡើងខាងលើ អេវឺរ៉ែសមានកម្ពស់ប្រមាណតែជិតប្រាំបួនគីឡូម៉ែត្រប៉ុណ្ណោះ ។
នៅក្នុងឆ្នាំ១៩៥១ នាវារបស់ចក្រភពអង់គ្លេសមានឈ្មោះថា H.M.S. Challenger II បានប្រើប្រាស់ឧបករណ៍វាស់ជម្រៅសមុទ្រ ប្រើប្រាស់សំឡេង ទៅលើទីតាំងច្បាស់លាស់មួយនេះ ហើយលទ្ធផលដែលពួកគេទទួលបានពិតជាធ្វើឲ្យមានការភ្ញាក់ផ្អើលយ៉ាងខ្លាំង។
បើតាមលក្ខណៈបច្ចេកទេស នៅក្នុងជម្រៅបែបនេះ គ្មានពន្លឺព្រះអាទិត្យអាចចាំងចូលដល់បានឡើយ ហើយសីតុណ្ហភាពគឺត្រជាក់ក្បែរសូន្យអង្សាសេ។ បើនិយាយអំពីសម្ពាធទឹកវិញ ចំណុចជ្រលង «Challenger Deep» ទទួលសម្ពាធប្រមាណ ១០៨៦បារ ឬស្មើនឹងជាង១ពាន់ដងនៃសម្ពាធធម្មតា ដែលមនុស្សយើងទទួលបានលើដីសព្វថ្ងៃ។
បុរសពីរនាក់ដែលបានចុះទៅកាន់ជម្រៅដ៏ជ្រៅនេះ គឺលោក Jacque Piccard និងលោក Don Walsh នៅក្នុងឆ្នាំ១៩៦០ ជាមួយនឹងនាវាមុជទឹកពិសេសមួយ ផលិតឡើងសម្រាប់រងសម្ពាធទឹកខ្លាំង មានឈ្មោះថា «Trieste» ។ អ្នកទាំងពីរ ប្រើប្រាស់ពេលវេលាប្រមាណជាប្រាំម៉ោង ដើម្បីចុះទៅដល់បាតក្រោម រួចបានប្រើប្រាស់ពេល២០នាទីដើម្បីសិក្សាពីទីតាំងមួយនេះដោយផ្ទាល់។
មុនពេលដែលនាវា Trieste បានចុះទៅកាន់ជម្រៅនោះ អ្នកវិទ្យាសាស្ត្រខាងជីវវិទ្យាជាច្រើន មិនអាចដឹងច្បាស់ថា តើជីវិតប្រភេទអ្វីដែលអាចរស់នៅក្រោមសម្ពាធដ៏ខ្លាំងនេះបានទេ។ តែនៅពេលដែលលោក Piccard បានបញ្ចាំងអំពូលភ្លើងពីនាវាមុជទឹករបស់គាត់ លោកបានឃើញប្រភេទសត្វសមុទ្រម្យ៉ាងដែលមានរូបរាងដូចជា ត្រីសំបែត។ ការរកឃើញនេះ ពិតជារឿងមួយដែលអស្ចារ្យ មិនគួរឲ្យជឿសម្រាប់អ្នកវិទ្យាសាស្ត្រទាំងនោះ។
មូលហេតុដែលមិនមានមនុស្សច្រើនអាចទៅដល់ទីតាំងនេះគឺ ការចំណាយខ្ពស់ ទាមទារបច្ចេកទេសច្រើនប្រភេទ រួមទាំងគ្រោះថ្នាក់សព្វបែបយ៉ាងផងដែរ។ បច្ចុប្បន្ន Challenger Deep បានក្លាយជាតំបន់ធម្មជាតិការពារមួយរបស់សហរដ្ឋអាមេរិក បង្កើតឡើងក្នុងឆ្នាំ២០០៩ ដោយលោកអតីតប្រធានាធិបតី George W. Bush ៕
Tag:
អេវឺរ៉ែស
Mariana
© រក្សាសិទ្ធិដោយ thmeythmey.com