មេប៉ូលិសក្រុង គ្រោងពិនិត្យសារធាតុញៀនលើមន្ត្រីនគរបាល ដើម្បីបង្ហាញគំរូភាពដល់មហាជន

ជាតិ

សង្គមជាតិ

មេប៉ូលិសក្រុង គ្រោងពិនិត្យសារធាតុញៀនលើមន្ត្រីនគរបាល ដើម្បីបង្ហាញគំរូភាពដល់មហាជន

27, May 2019 , 11:49 am

រូបភាព

ដោយ: ធឿន បញ្ញាឬទិ្ធ

ភ្នំពេញ៖ ស្នងការដ្ឋាននគរបាលរាជធានីភ្នំពេញ លោក ស ថេត គ្រោងដាក់ចេញវិធានការត្រួតពិនិត្យរកសារធាតុញៀន ទៅលើមន្ត្រីនគរបាល ដើម្បីចង់ឃើញពីភាពត្រឹមត្រូវរបស់មន្ត្រីអនុវត្តច្បាប់ទៅលើប្រជាពលរដ្ឋនេះ។

តាមរយៈហ្វេសប៊ុកលោក ស ថេត បានសង្កត់ធ្ងន់ថា ការអនុវត្តវិធានការនេះ គឺក្នុងគោលបំណងជំរុញឲ្យមន្ត្រីនគរបាលទាំងអស់ ក្លាយជាជនគំរូសម្រាប់ពលរដ្ឋ ក្នុងការបំពេញតួនាទី និងវិធានការផ្លូវច្បាប់។ មេប៉ូលិសក្រុងរូបនេះ បានសរសេរលើហ្វេសប៊ុក អមជាមួយការបង្ហោះរូបថតជាង២០សន្លឹក យ៉ាងដូច្នេះថា៖«ក្នុងឱកាសគោរពទង់ជាតិដែលមានមន្ត្រីនគរបាលចូលរួមជាង៦០០នាក់ ខ្ញុំក៏បានក្រើនរំលឹកដល់មន្ត្រីនគរបាលទាំងអស់ ត្រូវស្អាតស្អំ មិនពាក់ព័ន្ធនឹងគ្រឿងញៀន ។ហើយការធ្វើតេស្តទឹកនោម នឹងធ្វើឆាប់ៗខាងមុខចាប់ពីស្នងការដ្ឋាននគរបាលរាជធានីភ្នំពេញដល់បណ្តាប៉ុស្តិ៍ ដោយបច្ចុប្បន្ន យើងកំពុងតែរកឧបករណ៍ពិនិត្យទឹកនោមឱ្យគ្រប់ចំនួន ។ អ្វីដែលលើកឡើងនេះ ក្នុងគោលបំណងជំរុញឱ្យមន្ត្រីនគរបាល ជាអ្នកអនុវត្តច្បាប់ត្រូវតែជាជនគំរូដ៏ល្អសម្រាប់ពលរដ្ឋ»។

សារព័ត៌មានថ្មីៗ មិនទាន់អាចទាក់ទងលោក ស ថេត ស្នងការដ្ឋាននគរបាលរាជធានីភ្នំពេញ ដើម្បីសុំការអត្ថាធិប្បាយបន្ថែម អំពីគម្រោងអនុវត្តវិធានការរកសារធាតុញៀន លើមន្ត្រីនគរបាលនេះបាននៅឡើយទេ។

សង្គមស៊ីវិល យល់ថា បើសិនជាស្ថាប័នប៉ូលិសអនុវត្តវិធានការខាងលើនេះមែន វាជារឿងមួយល្អ ដែលបង្ហាញពីតម្លាភាពរវាងប្រជាពលរដ្ឋ និងអ្នកអនុវត្តច្បាប់។ នាយកប្រតិបត្តិអង្គការសម្ព័នគណនេយ្យភាពសង្គមកម្ពុជា លោក សន ជ័យ ដែលគាំទ្រចំណាត់ការនេះ ក៏ស្នើឲ្យមានការអនុវត្តច្បាប់លើមន្ត្រីប៉ូលិសណា ដែលពាក់ព័ន្ធករណីគ្រឿងញៀន(នៅកាងពីក្រោយអ្នករកស៊ីគ្រឿងញៀន)នេះផង ។

«សម្រាប់ខ្ញុំយល់ថា នៅក្នុងស្ថានភាពបែបនេះ ប៉ូលិសដែលជាតួអង្គអនុវត្តច្បាប់ក៏គួរបង្ហាញពីភាពស្អាតស្អំរបស់ខ្លួនដែរ ថាតើកម្រិតនៃការប្រើប្រាស់គ្រឿងញៀននេះ ពាក់ព័ន្ធនឹងប៉ូលិសដែរទេ ខណៈដែលកន្លងមកឃើញកើតមាននូវការចែកចាយព័ត៌មានថា មានប៉ូលិសបែកថ្នាំ មានមន្ត្រីរាជការស៊ីវិលបែកថ្នាំ ជាពិសេសយុវជន យុវនារីបែកថ្នាំ។ ដូច្នេះខ្ញុំគាំទ្រវិធានការត្រួតពិនិត្យហ្នឹង ប៉ុន្តែខ្ញុំចង់ឃើញមានការបង្ហាញរបាយការណ៍ដែរ ដោយមិនត្រឹមតែជាការពិសោធន៍ ធ្វើតេស្តទេ តែចង់ឃើញការបង្ហាញដែរ ដើម្បីជាការលាតត្រដាង និងការខិតខំពុះពារពិតប្រាកដរបស់ប៉ូលិស ដែលបង្ហាញពីភាពត្រឹមត្រូវរបស់ខ្លួន»។ នេះជាការលើកឡើងរបស់លោក សន ជ័យ។

តែយ៉ាងណានាយកប្រតិបត្តិអង្គការសម្ព័នគណនេយ្យភាពសង្គមរូបនេះ ស្នើឲ្យអង្គភាពប៉ូលិសទាំងអស់ អនុវត្តវិន័យច្បាប់ឲ្យបានដូចគ្នាជាមួយប្រជាពលរដ្ឋ ក្នុងករណីរកឃើញមន្ត្រីនគរបាល ដែលពាក់ព័ន្ធនឹងករណីគ្រឿងញៀននេះ។ លោក សន ជ័យ លើកឡើងដូច្នេះថា៖«ទីមួយ ច្បាប់ស្តីពីការប្រឆាំងគ្រឿងញៀន មានហើយ ដូច្នេះបើកូនប្រជាពលរដ្ឋមានទោសប៉ុណ្ណា ប៉ូលិសក៏ត្រូវផ្ដន្ទាទោសយ៉ាងដូច្នេះដែរ ដោយគ្មានការយោគយល់ថា អ្នកឯឯជាប៉ូលិសត្រូវសម្រួល ឬត្រូវបំភ្លេចចោល ហើយអនុគ្រោះលើកលែងទោសនោះទេ។ ព្រោះប្រទេសនីតិរដ្ឋ បានន័យថា មនុស្សគ្រប់គ្នាត្រូវស្ថិតក្រោមអំណាចច្បាប់។ ហើយក្រៅពីអនុវត្តច្បាប់ដូចពលរដ្ឋដទៃទៀត សក្តិនៅលើស្មា ឬក៏ក្របខណ្ឌប៉ូលិសហ្នឹង ក៏សុទ្ធតែជាចំណុចត្រូវពិចារណាដកដែរ»។

កន្លងមកសមត្ថកិច្ចបានបង្ក្រាបករណីគ្រឿងញៀននៅក្លិប Rock ដោយឃាត់ខ្លួនបានមនុស្សជាង៣០០នាក់។ ហើយករណីគ្រឿងញៀននេះ សមត្ថកិច្ចក៏រកឃើញថា មានមន្ត្រីនគរបាលពាក់ព័ន្ធនៅពីក្រោយករណីនេះទៀតផង។ សម្តេច ស ខេង រដ្ឋមន្ត្រីក្រសួងមហាផ្ទៃ ដែលដឹងពីបញ្ហានេះ ក៏បានបញ្ជាឲ្យតាមចាប់នគរបាលម្នាក់ ដែលពាក់ព័ន្ធនឹងគ្រឿងញៀននៅក្លិបនេះដែរ។ សមត្ថកិច្ច កំពុងតាមចាប់ខ្លួនមន្ត្រីប៉ូលិស ដែលជាប់ពាក់ព័ន្ធករណីគ្រឿងញៀននេះ។

បើតាមរបាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀន ក្នុងឆ្នាំ២០១៨ រដ្ឋាភិបាលបង្ក្រាបគ្រឿងញៀននៅទូទាំងប្រទេស បានជាង៨ពាន់ករណី(៨.០១៨ករណី) រឹបអូសសារធាតុញៀនគ្រប់ប្រភេទបានចំនួនជាង៥៣៣គីឡូក្រាម និងកញ្ចប់កញ្ឆាក្រៀម៣៧០ ដែលស្មើ៧៤គីឡូក្រាម និងកម្ទេចកញ្ឆា១៦៤,៩២៥ដើម។សមត្ថកិច្ចបានឃាត់ខ្លួនមនុស្ស១៦.២៣២នាក់(ស្រី១.៣៤៣នាក់)ក្នុងនោះមានជនបរទេស៣១០នាក់ ត្រូវនឹង២៤សញ្ជាតិ៕