ជាតិ
នយោបាយជាតិ
ពីជប៉ុន សម្តេច ហ៊ុន សែន ថា «រង់ចាំសង្គ្រាមប្រឆាំង [លោក សម រង្ស៊ី] ដែលបះបោរពីក្រៅប្រទេស» សម្តេច ហ៊ុន សែន ធ្វើជាវាគ្មិន ក្នុងសន្និសីទអន្តរជាតិលើកទី២៥ ស្តីពីអនាគតអាស៊ី នៅប្រទេសជប៉ុន នាថ្ងៃទី៣០ ខែឧសភា ឆ្នាំ២០១៩ (រូបពីក្រសួងព័ត៌មាន)
× សម្តេច ហ៊ុន សែន នាយករដ្ឋមន្ត្រីកម្ពុជា និងជាប្រធានគណបក្សកាន់អំណាច នាវេទិកាសន្និសីទអន្តរជាតិនៅក្រុងតូក្យូ ប្រទេសជប៉ុន បានប្រកាសឲ្យដឹងថា សម្តេចរង់ចាំធ្វើសង្គ្រាមប្រឆាំងជាមួយបុគ្គលដែលបះបោរពីក្រៅប្រទេសដើម្បីទម្លាក់សម្តេច។ ទោះមិនបាននិយាយឈ្មោះចំៗ ប៉ុន្តែគេអាចដឹងច្បាស់ថា សម្តេចសំដៅដល់លោក សម រង្ស៊ី អតីតប្រធានគណបក្សសង្គ្រោះជាតិ ដែលអះអាងពីឆន្ទៈមកកាន់កម្ពុជាវិញនាពេលខាងមុខ។
ធ្វើជាវាគ្មិនក្នុងសន្និសីទអន្តរជាតិលើកទី២៥ ស្តីពីអនាគតអាស៊ី ក្នុងប្រទេសជប៉ុន នាថ្ងៃទី៣០ ខែឧសភា ឆ្នាំ២០១៩នេះ មេដឹកនាំកម្ពុជា ប្រកាសខ្លាំងៗយ៉ាងដូច្នេះថា៖«ខ្ញុំសូមប្រកាសដោយចំហពីទីនេះ ឲ្យពិភពលោក បានដឹងថា ខ្ញុំ កំពុងរង់ចាំសង្គ្រាមមួយ ដែលវា នឹងកើតឡើង តាមរយៈការប្រកាសរបស់ជនក្បត់ជាតិដែលស្រែកពីក្រៅប្រទេស។ ដរាបណា គេ មិនទាន់ចុះចាញ់សង្គ្រាមនេះទេ ខ្ញុំ ក៏មិនទាន់ធ្វើអ្វីផ្សេងទៀតដែរ។ បើយើងខ្ញុំប្រកាសខុសពីផ្លូវនេះ គេ នឹងចាត់ទុកថា យើងខ្ញុំ កំពុងចាញ់សង្គ្រាម។ ខ្ញុំ មិនអាចចាញ់សង្គ្រាមទេ»។
ឈានចូលពាក់កណ្តាលឆ្នាំ២០១៩នេះ លោក សម រង្ស៊ី ហាក់ព្យាយាមបង្ហាញសញ្ញានិងប្រកាសកាន់តែញឹកញាប់ពីផែនការនៃការធ្វើមាតុភូមិនិវត្តរបស់លោក។ លោក ប្រាប់ថា លោក មិនមែនមកកម្ពុជាតែម្នាក់ឯងទេ គឺមានប្រជាពលរដ្ឋខ្មែរពីបណ្តាប្រទេសនានា ហើយក៏អាចមានមន្ត្រីអង្គការសហប្រជាជាតិផងដែរ ដែលនឹងមកជាមួយលោក។
មេដឹកនាំក្រុមប្រឆាំងរូបនេះ ថែមទាំងសង្ឃឹមថា ប្រជាពលរដ្ឋនៅក្នុងស្រុក នឹងនាំគ្នាទៅទទួលលោក។ ទន្ទឹមនឹងនេះ លោក ឆ្លៀតផ្ញើសារបំផុសបំផុលឲ្យកងកម្លាំងប្រដាប់អាវុធ ងាកមកឈរខាងលោកនិងប្រជាពលរដ្ឋ ដើម្បីរួមគ្នាផ្លាស់ប្តូរ។
លោក បង្ហើបនាពេលថ្មីៗនេះថា លោក នឹងទៅកាន់ប្រទេសថៃ ដើម្បីប្រមែលប្រមូលប្រជាពលរដ្ឋ មុននឹងឈានជើងចូលមកកម្ពុជា។ អ្នកគាំទ្ររបស់លោក សម រង្ស៊ី នៅសហរដ្ឋអាមេរិក នឹងធ្វើពិធីប្រសិទ្ធិពរជ័យ ជូនលោក ក្នុងវត្តខ្មែរមួយ នៅថ្ងៃទី៧ ខែមិថុនា ឆ្នាំ២០១៩ ដើម្បីបួងសួងឲ្យលោក ទទួលបានជោគជ័យក្នុងការធ្វើមាតុភូមិនិវត្ត។
«ខ្ញុំ ទៅចាប់លោក ហ៊ុន សែន មិនមែន ទៅឲ្យលោក ហ៊ុន សែន ចាប់ខ្ញុំទេ។ យើង ទៅដណ្តើមយកប្រទេសយើងវិញ»។ នេះជាសារដែលលោក សម រង្ស៊ី តែងប្រកាសប្រាប់មហាជននាពេលកន្លងមក៕
Tag:
ហ៊ុន សែន
សម រង្ស៊ី
© រក្សាសិទ្ធិដោយ thmeythmey.com