ជាតិ
សង្គមជាតិ
តុលាការ លើកពេលបើកសវនាការលើសំណុំរឿងលោក រ៉ាត់ រត្នមុនី រូបពីគណនីហ្វេសប៊ុកឈ្មោះ Chum Hout Chum Hour
× សាលាដំបូងរាជធានីភ្នំពេញ ពុំបានបើកសវនាការជំនុំជម្រះលើសំណុំរឿងរបស់លោក រ៉ាត់ រត្នមុនី ពាក់ព័ន្ធនឹងការផលិតខ្សែភាពយន្តឯកសារមួយ ដែលមានចំណងជើងថា «ម្តាយខ្ញុំ លក់ខ្ញុំ» តាមការគ្រោងទុកនៅថ្ងៃទី៣០ ខែឧសភា ឆ្នាំ២០១៩នេះទេ។
លោក សំ ទិត្យសីហា មេធាវីរបស់លោក រ៉ាត់ រត្នមុនី ប្រាប់សារព័ត៌មានថ្មីៗថា សវនាការនេះ ត្រូវលើកពេលទៅបើកនៅថ្ងៃទី១២ ខែមិថុនា ឆ្នាំ២០១៩ឯណោះវិញ។ លោក លើកឡើងថា មូលហេតុ ដែលចៅក្រម លើកពេល គឺដោយសារតែអវត្តមានភាគីរដ្ឋប្បវេណី។ លោក បញ្ជាក់ដូច្នេះថា «ចៅក្រម ចង់ឲ្យមានគ្រប់ភាគី ដើម្បីបានតតាំងគ្នាក្នុងសវនាការ»។
ខ្សែភាពយន្ត «ម្តាយខ្ញុំ លក់ខ្ញុំ» បានធ្វើឲ្យលោក រ៉ាត់ រត្នមុនី រងពីបទ «ញុះញង់ឲ្យមានការរើសអើង»។ ប៉ុន្តែ លោកមេធាវី សំ ទិត្យសីហា ធ្លាប់អះអាងកន្លងមកថា កូនក្តីរបស់លោក គ្រាន់តែជាអ្នកប្រែពីភាសាខ្មែរទៅភាសាអង់គ្លេស និងពីភាសាអង់គ្លេស មកជាភាសាខ្មែរ នៅក្នុងខ្សែភាពយន្តនេះប៉ុណ្ណោះ គឺមិនមែនជាអ្នកផលិតឬដឹកនាំសម្តែងនោះទេ។
លោក បន្តថា កូនក្តីរបស់លោក ក៏មិនមានចេតនាធ្វើឲ្យប៉ះពាល់ដល់សន្តិសុខជាតិ ឬក៏ធ្វើឲ្យខូចមុខមាត់ប្រទេសជាតិដែរ ហើយម្យ៉ាងទៀត កូនក្តីរបស់លោក ថែមទាំងបានសុំការអនុញ្ញាតពីស្ថាប័នពាក់ព័ន្ធដែរ មុននឹងចាប់ផ្តើមផលិតខ្សែភាពយន្តនេះ។
អាជ្ញាធរខ្មែរ បានតាមដានខ្សែភាពយន្តឯកសារនេះ បន្ទាប់ពីសារព័ត៌មានដ៏ល្បីមួយរបស់រុស្ស៊ីឈ្មោះ RT យកទៅផ្សព្វផ្សាយ។ អាជ្ញាធរខ្មែរ អះអាងថា ភាពយន្តឯកសារខាងលើ ដែលនិយាយពីការជួញដូរផ្លូវភេទ គឺជារឿងប្រឌិត ហើយធ្វើឲ្យប៉ះពាល់ដល់មុខមាត់របស់កម្ពុជា។
ដោយមានកិច្ចសហការជាមួយសមត្ថកិច្ចកម្ពុជា សមត្ថកិច្ចថៃ បានចាប់បញ្ជូនលោក រ៉ាត់ រត្នមុនី ពីថៃ មកកម្ពុជាវិញ កាលពីខែធ្នូ ឆ្នាំ២០១៨។ កន្លងមក ភរិយារបស់លោក រ៉ាត់ រត្នមុនី និងប្រជាពលរដ្ឋមួយចំនួន ខិតខំសុំឲ្យស្ថានទូតរុស្ស៊ីប្រចាំកម្ពុជា ជួយធ្វើអន្តរាគមន៍ជាញឹកញាប់ដែរ តែមិនបានទទួលផលវិជ្ជមានឡើយ៕
Tag:
រ៉ាត់ រត្នមុនី
តុលាការ
© រក្សាសិទ្ធិដោយ thmeythmey.com