អន្តរជាតិ
ថៃ ប្រកាន់ជំហរអព្យាក្រឹតក្នុងសង្គ្រាមបច្ចេកវិទ្យារវាងអាមេរិក និងចិន ឧទ្យាន 5G នៅទីក្រុង Shenzhen ប្រទេសចិន (ប្រភពរូប៖ AFP)
× គណៈកម្មការទូរគមនាគមន៍ និងបណ្តាញផ្សព្វផ្សាយជាតិថៃ (NBTC) បានដាក់ចេញគោលនយោបាយអព្យាក្រឹតមួយលើគម្រោងអភិវឌ្ឍន៍បច្ចេកវិទ្យា 5G របស់ប្រទេស។ នេះមានន័យថា ថៃ នឹងបញ្ចៀសការជ្រើសរើសភាគីម្ខាងណាមួយក្នុងសង្គ្រាមបច្ចេកវិទ្យារវាងសហរដ្ឋអាមេរិក និងចិន ដែលកំពុងកើនកម្តៅនាប៉ុន្មានសប្តាហ៍ចុងក្រោយនេះ។
ប្រាប់ក្រុមអ្នកកាសែតនៅថ្ងៃទី៤ ខែមិថុនា លោក Takorn Tantasith អគ្គនាយកនៃ NBTC បញ្ជាក់ឲ្យដឹងថា រដ្ឋាភិបាលថៃ មានគម្រោងទាក់ទាញទាំងក្រុមហ៊ុនបច្ចេកវិទ្យា Huawei របស់ចិន និងបណ្តាក្រុមហ៊ុននានា ដែលមានមូលដ្ឋាននៅសហរដ្ឋអាមេរិក ដើម្បីឲ្យមកជួយអភិវឌ្ឍមជ្ឈមណ្ឌលសាកល្បង និងហេដ្ឋារចនាសម្ព័ន្ធចាំបាច់សម្រាប់បច្ចេកវិទ្យា 5G ។
តាមការចុះផ្សាយរបស់កាសែត បាងកកប៉ុស្តិ៍ លោក Takorn លើកឡើងទៀតថា គោលនយោបាយនេះ ពុំមានការប្រែប្រួលឡើយ ចាប់តាំងពីមជ្ឈមណ្ឌលសាកល្បងបច្ចេកវិទ្យា 5G ដំបូងបង្អស់របស់ថៃ បានបង្កើតឡើងក្នុងទីក្រុងបាងកក កាលពីដើមឆ្នាំ២០១៩នេះ។ មជ្ឈមណ្ឌលនេះដែរ បង្កើតឡើងដោយមានកិច្ចសហការរវាង NBTC ថៃ ជាមួយនឹងសាកលវិទ្យាល័យជូឡាឡុងកន ដែលរំពឹងថា វានឹងក្លាយជាទីតាំងអភិវឌ្ឍន៍ និងស្រាវជ្រាវសម្រាប់បច្ចេកវិទ្យា 5G ឈានមុខគេក្នុងប្រទេសថៃ។
ក្រៅពីសាកលវិទ្យាល័យជូឡាឡុងកន គណៈកម្មការទូរគមនាគមន៍ និងបណ្តាញផ្សព្វផ្សាយជាតិថៃ ក៏នឹងបង្កើតមជ្ឈមណ្ឌលសាកល្បងបច្ចេកវិទ្យាល័យ 5G បន្ថែមទៀត ក្នុងសកលវិទ្យាល័យ ខន ក៉េន, សាកលវិទ្យាល័យ ឈៀងម៉ៃ និង សាកលវិទ្យាល័យ សុងក្លា។ NBTC នឹងចុះហត្ថលេខាលើ MoU ជាមួយសាកលវិទ្យាល័យទាំងបី នាខែសីហាខាងមុខ។
សូមបញ្ជាក់ថា កន្លងទៅ NBTC ថៃ ធ្លាប់បានហៅក្រុមហ៊ុនបច្ចេកវិទ្យាធំៗលើពិភពលោក រួមមាន Huawei, Intel, Cisco, Qualcomm និង IBM ដើម្បីឲ្យមកសហការលើផែនការសាកល្បងបច្ចេកវិទ្យា 5G របស់ខ្លួន។ យ៉ាងណាមិញ មានតែក្រុមហ៊ុន Huawei របស់ចិនមួយប៉ុណ្ណោះ បានយល់ព្រមធ្វើការជាមួយ NBTC និងសាកលវិទ្យាល័យ ជូឡាឡុងកន លើទីតាំងសាកល្បង។ ចំណែកក្រុមហ៊ុនបរទេសផ្សេងទៀត ពុំទាន់បង្ហាញជំហរលើភាពជាដៃគូនៅឡើយទេ៕
Tag:
ថៃ
សង្គ្រាមបច្ចេកវិទ្យា
5G
© រក្សាសិទ្ធិដោយ thmeythmey.com