ជាតិ
នយោបាយជាតិ
លោក ថាច់ សេដ្ឋា៖ វៀតណាម ដឹងគុណខ្មែរ ទើបស័ក្តិសម លោក ថាច់ សេដ្ឋា ឈរនៅលើរថយន្ត ស្រែកទាមទារនៅមុខស្ថានទូតវៀតណាមក្នុងរាជធានីភ្នំពេញ កាលពីចុងឆ្នាំ២0១៤ ឲ្យទូតវៀតណាម កែប្រែសម្តី ដែលថាកម្ពុជាក្រោមជាទឹកដីរបស់វៀតណាម (រូបពី AFP)
× ក្នុងពិធីរម្លឹកខួប៧០ឆ្នាំ ដែលបារាំងប្រគល់សិទ្ធិអំណាចទៅឲ្យវៀតណាមគ្រប់គ្រងលើទឹកដីកម្ពុជាក្រោម លោក ថាច់ សេដ្ឋា ប្រធានសហគមន៍ខ្មែរកម្ពុជាក្រោម បាននិយាយច្រើនពីប្រវត្តិកម្ពុជាក្រោម រួមទាំងរឿងរ៉ាវ ដែលបារាំងផ្ទេរសិទ្ធិអំណាចនេះ ទៅឲ្យវៀតណាមផងដែរ។ លើសពីនេះ លោក លើកឡើងថា ខ្មែរទេ ដែលមានគុណចំពោះវៀតណាម មិនមែនវៀតណាម មានគុណចំពោះខ្មែរឡើយ។
លោក ថាច់ សេដ្ឋា បានរម្លឹកគុណមួយរបស់កម្ពុជា ដែលធ្លាប់មានចំពោះវៀតណាម គឺការឲ្យវៀតណាម មករស់នៅលើទឹកដីកម្ពុជា។ លោក រៀបរាប់ថា កាលនោះ ស្តេចខ្មែរ (ព្រះបាទជ័យសេដ្ឋាទី២ មានមហេសីជាកូនស្តេចវៀតណាម) បានអនុញ្ញាតឲ្យជនជាតិវៀតណាម មករស់នៅលើទឹកដីកម្ពុជា។ លោក បន្តថា នាសម័យនោះ វៀតណាម បាននាំអង្ករពីកម្ពុជាក្រោម (កូសាំងស៊ីន) ទៅកាន់វៀតណាម ដើម្បីផ្គត់ផ្គង់និងចិញ្ចឹមប្រជាជនវៀតណាម។
ប្រធានសហគមន៍ខ្មែរកម្ពុជាក្រោមរូបនេះ ថ្លែងដូច្នេះថា «វៀតណាម ដែលដឹងគុណម្តងទេ? អត់ដឹងគុណទាល់តែសោះ។ ខ្ចីដីគេហើយ យកដីគេទៀត»។
បន្ទាប់មក លោក បានបរិយាយពីរឿងកម្ពុជា អនុញ្ញាតឲ្យកងទ័ពវៀតណាម មកឈរជើងនៅទឹកដីកម្ពុជាក្រោមរយៈពេល៥ឆ្នាំ ដើម្បីមានទីតាំងប្រយុទ្ធជាមួយពួកយៀកកុង និងពួកចក្រព័ទ្ធ (អាមេរិក) រហូតមានការទម្លាក់គ្រាប់បែក មកលើទឹកដីកម្ពុជា។ លោក សង្កត់ធ្ងន់ថា «និយាយពីការដឹងគុណវិញ យួន ត្រូវដឹងគុណខ្មែរបានស័ក្តិសម ព្រោះខ្មែរបានធ្វើគុណទៅលើយួនច្រើនណាស់»។
រំលើកគុណរបស់កម្ពុជា ដែលមានចំពោះវៀតណាមរួចហើយ លោក ថាច់ សេដ្ឋា ក៏ បង្ហាញការហួសចិត្តនិងមិនយល់ ដែលខ្មែរខ្លះ មិនសូវដឹងគុណបុព្វបុរសខ្មែរ តែបែរជាដឹងគុណវៀតណាមទៅវិញ។ លោក លើកឡើងថា បុព្វបុរសខ្មែរមួយចំនួន ដូចជា ឧកញ៉ា សឺន គុយ ជាដើម បានបាត់បង់ជីវិតដោយសារវៀតណាម។ «យើងមិនអាចដឹងគុណ [យួន] បានទេ។ យើងឈឺចាប់ណាស់ នៅពេលដែលឮអ្នកណាមួយ ដឹងគុណយួន....»។
ប្រធានសហគមន៍ខ្មែរកម្ពុជាក្រោម ប្រាប់អ្នកចូលរួមថា ទោះបារាំង ប្រគល់សិទ្ធិអំណាចទៅឲ្យវៀតណាម កាន់កាប់កម្ពុជាក្រោមអស់រយៈពេល៧០ឆ្នាំហើយក៏ដោយ ក៏ប្រជាពលរដ្ឋកម្ពុជា នៅតែចាត់ទុកកម្ពុជាក្រោម ថាជាទឹកដីរបស់ខ្មែរដដែល៕
Tag:
កម្ពុជាក្រោម
ខួប៧០ឆ្នាំ
ថាច់ សេដ្ឋា
© រក្សាសិទ្ធិដោយ thmeythmey.com