ជាតិ
សង្គមជាតិ
អាជ្ញាធរសៀមរាប ចុះរុះរើផ្ទាំងផ្សាយពាណិជ្ជកម្មគ្មានច្បាប់ និងអស់សុពលភាព ដើម្បីរៀបចំសោភ័ណភាពខេត្ត
រូបភាពពីរដ្ឋបាលខេត្តសៀមរាប
×![]()
ដោយ: ឡាយ សុភាវតី
អាជ្ញាធរខេត្តសៀមរាមបានចុះរុះរើផ្ទាំងផ្សព្វផ្សាយពាណិជ្ជកម្ម ដែលគ្មានច្បាប់ និងអស់សុពលភាព លើសទំហំកំណត់ ដែលដាក់លើដីចំណីផ្លូវនៅក្នុងខេត្តសៀមរាប នៅថ្ងៃទី៣មិថុនា ឆ្នាំ២០១៩ ។ ការចុះរុះរើនេះ គឺដើម្បីរៀបចំសោភ័ណភាពក្នុងខេត្តសម្រាប់ការប្រកួតទីក្រុងស្អាត និងលុបបំបាត់ផ្ទាំងផ្សព្វផ្សាយពាណិជ្ជកម្មដែលគ្មានច្បាប់អនុញ្ញាត។ នេះបើតាមការចេញផ្សាយលើហ្វេសប៊ុករបស់រដ្ឋបាលខេត្តសៀមរាប។ 
អភិបាលរងខេត្តសៀមរាប លោក នាក់ ណេរ៉ុន បានបញ្ជាក់ថា គោលបំណងនៃការចុះរុះរើនេះ ដើម្បីរៀបចំសោភ័ណភាពខេត្ត និងត្រៀមប្រកួតប្រជែងទីក្រុងស្អាត។ ជាពិសេសអនុវត្តតាមច្បាប់ ស្ដីពីការផ្សាយពាណិជ្ជកម្ម និងបទដ្ឋានរបស់ក្រសួងពាក់ព័ន្ធ ដើម្បីឲ្យប្រជាពលរដ្ឋដាក់ពាក្យស្នើសុំច្បាប់អនុញ្ញាតត្រឹមត្រូវ និងលុបបំបាត់ផ្ទាំងផ្សព្វផ្សាយពាណិជ្ជកម្មដែលគ្មានច្បាប់អនុញ្ញត។
រូបភាពពីរដ្ឋបាលខេត្តសៀមរាប
អាជ្ញាធរខេត្តសៀមរាបបានចុះរុះរើស្លាកយីហោពាណិជ្ជកម្ម ចាប់ពីចំណុចគល់ស្ពានព្រះរាជដំណាក់ ទៅតាមបណ្ដោយផ្លូវជាតិលេខ៦ ដល់ស្រុកបាសាទបាគង។ អាជ្ញាធរ បានរុះរើផ្ទាំងផ្សាយពាណិជ្ជកម្ម៩ផ្ទាំង ត្រឹមរយៈពេលមួយព្រឹកក្នុងថ្ងៃទី៣មិថុនា។ ហើយអាជ្ញាធរនឹងអនុវត្តបន្ត នៅតំបន់ផ្សេងៗទៀត តាមតំបន់ក្នុងខេត្តសៀមរាប។ ជាមួយគ្នានេះអភិបាលខេត្ត បានអំពាវនាវឲ្យប្រជាជនសហការជាមួយអាជ្ញាធរ ទាក់ទងរាល់បញ្ហាចម្ងល់ផ្សេងៗស្ដីពីការសុំច្បាប់ដំឡើងស្លាកយីហោពាណិជ្ជកម្ម ត្រូវទំនាក់ទំនងសួរព័ត៌មានអាជ្ញាធរតាមឃុំ -សង្កាត់ និងខេត្ត មុននឹងលើកស្លាកផ្សព្វផ្សាយ៕
រូបភាពពីរដ្ឋបាលខេត្តសៀមរាប
Tag:
ខេត្តសៀមរាប
រុះរើផ្ទាំងពាណិជ្ជកម្ម
© រក្សាសិទ្ធិដោយ thmeythmey.com
