សេដ្ឋកិច្ច
អន្តរជាតិ
អាមេរិក ត្រៀមលក្ខណៈដើម្បីធានាការផ្គត់ផ្គង់រ៉ែកម្រ ខណៈចិនអាចរឹតត្បិតការនាំចេញ រូបភាព Reuters
× សហរដ្ឋអាមេរិក នៅថ្ងៃទី៤ ខែមិថុនា បានប្រកាសថា ខ្លួននឹងចាត់វិធានការមិនធ្លាប់មានដើម្បីធានាការផ្គត់ផ្គង់ធនធានរ៉ែកម្រ។ ការប្រកាសនេះ ធ្វើឡើងស្របពេលដែលជម្លោះពាណិជ្ជកម្មនៅតែក្ដៅគគុក ហើយក៏មានលេចឮដំណឹងជាច្រើន ពិសេសពីប្រព័ន្ធផ្សព្វផ្សាយរដ្ឋចិនដែលលើកឡើងពីលទ្ធភាពរបស់ទីក្រុងប៉េកាំងដែលអាចប្រើធនធានកម្ររបស់ខ្លួន ជាអាវុធវាយបកលើទីក្រុងវ៉ាស៊ីនតោន។ បើរឿងនេះកើតឡើងមែន ឧស្សាហកម្មបច្ចេកវិទ្យា និងយោធាអាមេរិក នឹងវីវរមិនខាន។
ក្រសួងពាណិជ្ជកម្មអាមេរិក បានចេញផ្សាយរបាយការណ៍មួយស្ដីពីរ៉ែកម្រដែលជារូបធាតុចាំបាច់បំផុតសម្រាប់ផលិតផលកុំព្យូទ័រ ប្រព័ន្ធមីស៊ីល និងទូរសព្ទជាដើម។ ប្រធានាធិបតីអាមេរិក ដូណាល់ ត្រាំ បានបញ្ជាដោយផ្ទាល់ឲ្យមានការគិតគូរពីស្ថិរភាពនៃការផ្គត់ផ្គងរូបធាតុដើមដ៏សំខាន់នេះ។ ក្នុងសេចក្ដីព័ត៌មានថ្ងៃទី៤ ខែមិថុនា រដ្ឋមន្ត្រីពាណិជ្ជកម្មអាមេរិក Wilbur Ross ចាត់ទុកធនធានរ៉ែកម្រនេះ ជាវត្ថុសំខាន់សម្រាប់សេដ្ឋកិច្ច និងសន្តិសុខជាតិរបស់អាមេរិក។
លោក Ross និយាយថា ធនធានរ៉ែនេះ ត្រូវបានគេមើលរំលងជារឿយៗ ប៉ុន្តែជីវិតសម័យទំនើបបច្ចុប្បន្ន រស់នៅដោយគ្មានរ៉ែកម្រមិនបានឡើយ។ ដូចនេះ តាមរយៈព័ត៌មានលម្អិតនៃរបាយការណ៍ក្រសួងពាណិជ្ជកម្ម រដ្ឋាភិបាលអាមេរិក នឹងចាត់វិធានការមិនធ្លាប់មានពីមុនមកដើម្បីធានាថា សហរដ្ឋអាមេរិក នឹងមិនត្រូវបានកាត់ផ្ដាច់ពីធនធានដ៏សំខាន់នេះឡើយ។
បើតាមទីភ្នាក់ងារព័ត៌មាន AFP របាយការណ៍ដដែលនេះ បានស្នើឲ្យមានការបង្កើតការផ្គត់ផ្គង់រ៉ែកម្រតាមរយៈការវិនិយោគ និងការធ្វើពាណិជ្ជកម្មរ៉ែនេះជាមួយសម្ព័ន្ធមិត្តអាមេរិកនានា។ លើសពីនោះ អាមេរិក ក៏ត្រូវពង្រីកការផ្ដល់សិទ្ធិអនុញ្ញាតរុករករ៉ែនៅទឹកដីអាមេរិកផង ពិសេសលើដីរដ្ឋ សំដៅបង្កើនប្រភពផ្គត់ផ្គង់ និងបម្រុងទុកនៅពេលចាំបាច់។ ពេលវេលាចាំបាច់ ទំនងជាជិតមកដល់ហើយ ព្រោះក្រុងប៉េកាំងកំពុងពិចារណារឹតត្បិតការនាំចេញរ៉ែកម្រនេះហើយដែរ។
គណៈកម្មការអភិវឌ្ឍន៍ និងកំណែទម្រង់ជាតិរបស់ចិន នៅថ្ងៃទី៤ ខែមិថុនា លើកឡើងថា ខ្លួនកំពុងគិតគូរលទ្ធភាពនៃការគ្រប់គ្រងការនាំចេញរ៉ែកម្រ ដែលគំនិតនេះត្រូវបានលើកឡើងដោយអ្នកជំនាញចិនផ្ទាល់។ ក្នុងរបាយការណ៍របស់ខ្លួន គណៈកម្មការទទួលបន្ទុករៀបចំផែនការសេដ្ឋកិច្ចចិននេះ បញ្ជាក់ថា ដោយមានការលើកយោបល់ពីអ្នកជំនាញ យើងចិនត្រូវតែពង្រឹងការគ្រប់គ្រងការនាំចេញរ៉ែកម្រ និងត្រួតពិនិត្យដំណើរការនាំចេញធនធានប្រភេទនេះ។
មួយរយៈចុងក្រោយនេះ ប្រព័ន្ធផ្សព្វផ្សាយចិនជាច្រើនបានផ្ញើសារព្រមានអាមេរិកជុំវិញការប្រើធនធានរ៉ែកម្រជាអាវុធប្រឆាំងអាមេរិក។ បច្ចុប្បន្ន ចិនជាប្រទេសនចេញរ៉ែកម្រធំបំផុតរបស់ពិភពលោកប្រមាណ៧០ភាគរយនៃការនាំចេញសរុប ហើយអាមេរិកក៏ជាអតិថិជនធំជាងគេរបស់ចិនដែរ។ ចិនកាន់កាប់ចំណែកធំជាងគេនៃការនាំចេញ ព្រោះមហាអំណាចមួយនេះមានសង្វាក់ផលិតកម្មច្រើន ខណៈប្រទេសផ្សេងទៀតដែលមានរ៉ែប្រភេទនេះដែរនោះ មិនទាន់ទាញយកផលបានឡើយ ដោយសារម្យ៉ាងមិនមានបច្ចេកទេស និងថវិកា ឯម្យ៉ាងបារម្ភពីផលប៉ះពាល់ផ្នែកបរិស្ថានផង៕
Tag:
អាមេរិក
ចិន
រ៉ែកម្រ
© រក្សាសិទ្ធិដោយ thmeythmey.com