អន្តរជាតិ
អាមេរិកគ្រោងលក់សព្វាវុធ ២ពាន់លានដុល្លារឲ្យតៃវ៉ាន់ ផ្គើនចិន ប្រភពរូប៖ AFP
× សហរដ្ឋអាមេរិក កំពុងរៀបចំគម្រោងលក់សព្វាវុធ រួមមាន រថគ្រោះ និងមីស៊ីលជាដើម ទៅកាន់តៃវ៉ាន់ ដែលគិតជាទឹកប្រាក់ជាង ២ពាន់លានដុល្លារ ។ សកម្មភាពរបស់ក្រុងវ៉ាស៊ីនតោនថ្មីនេះ ទំនងជាបង្កកំហឹងកាន់តែខ្លាំងដល់ក្រុងប៉េកាំង ស្របពេលដែលសង្គ្រាមពាណិជ្ជកម្មរវាងមហាអំណាចសេដ្ឋកិច្ច និងយោធាទាំងពីរនេះ កំពុងកើនឡើងកម្តៅឥតឈប់ឈរ។
ដំណឹងមិនទាន់ផ្លូវការ ដែលបានមកពីប្រភពចំនួនបួន ដឹងលឺពីការចរចានេះ បង្ហាញថា ផែនការលក់សព្វាវុធនេះ ត្រូវបានបញ្ជូនទៅកាន់សភាអាមេរិកនៅថ្ងៃទី៦ ខែមិថុនា។ យោងតាមការចុះផ្សាយរបស់ទីភ្នាក់ងារព័ត៌មាន Reuters គម្រោងលក់អាវុធឲ្យតៃវ៉ាន់នេះ រាប់បញ្ចូល រថគ្រោះប្រភេទ M1A2 Abrams របស់ក្រុមហ៊ុនអាមេរិក General Dynamics Corp ចំនួន ១០៨គ្រឿង ដែលមានតម្លៃប្រមាណ ២ពាន់លានដុល្លារ ក៏ដូចជា មីស៊ីលប្រឆាំងរថគ្រោះ និងមីស៊ីលប្រឆាំងយន្តហោះចម្បាំងផងដែរ។
តាម Reuters អ្នកនាំពាក្យម្នាក់របស់ក្រសួងការបរទេសអាមេរិក ដែលទទួលបន្ទុកការលក់អាវុធឲ្យនៅបរទេស បានបញ្ជាក់ឲ្យដឹងថា រដ្ឋាភិបាលអាមេរិក ពុំមានមតិអ្វីលើគម្រោងលក់អាវុធទៅឲ្យតៃវ៉ាន់ឡើយ។ យ៉ាងណាមិញ រដ្ឋាភិបាល នឹងបញ្ជាក់ពីគម្រោងនេះជាសាធារណៈ កាលណាខ្លួនទទួលបានដំណឹងជាផ្លូវការពីសភាអាមេរិក។
ទោះជាបែបនេះក្តី ប្រភពមិនផ្លូវការខាងលើ បង្ហើបទៀតថា គម្រោងលក់អាវុធដែលបញ្ជូនទៅកាន់សភា Congress ក៏មានរាប់បញ្ចូល មីស៊ីលប្រឆាំងរថគ្រោះជាច្រើនប្រភេទ រួមមាន មីស៊ីល 409 Raytheon Co និងមីស៊ីល 409 Raytheon Co ដែលផលិតឡើងដោយក្រុមហ៊ុនយក្សអាមេរិក Lockheed Martin Corp ។ មីស៊ីលទាំងនេះ មានតម្លៃប្រមាណ ១២៩លានដុល្លារអាមេរិក។
ដោយឡែក មីស៊ីលប្រឆាំងរថគ្រោះប្រភេទ TOW ប្រមាណ ១២៤០ ដើម ដែលមានតម្លៃ ប្រមាណ២៩៩លានដុល្លារ និងមីស៊ីលប្រឆាំងយន្តហោះចម្បាំង ២៥០ដើមទៀត ដែលគិតជាទឹកប្រាក់ ២២៣លានដុល្លារ ក៏មានរាប់បញ្ចូលនៅក្នុងគម្រោងនោះផងដែរ។
ឲ្យពិតទៅ សហរដ្ឋអាមេរិក គឺជាប្រទេសផ្គត់ផ្គង់អាវុធធំបំផុតរបស់តៃវ៉ាន់ ដែលចិនចាត់ទុកថាជាអាណាខេត្តរបស់ខ្លួន។ មិនត្រឹមតែប៉ុណ្ណោះ ក្រុងប៉េកាំង ដែលបង្កើនកញ្ចប់ថវិកាការពារជាតិជារៀងរាល់ឆ្នាំ ក្នុងរយៈពេល ២ទសវត្សរ៍ចុងក្រោយនេះ ធ្លាប់បានព្រមានប្រើប្រាស់កម្លាំងយោធាលើកោះតៃវ៉ាន់ទៀតផង ប្រសិនបើចាំបាច់ដើម្បីបង្រួបបង្រួម។ ទោះបីជាពុំមានចំណងទាក់ទងផ្លូវការជាមួយតៃវ៉ាន់ សហរដ្ឋអាមេរិក មានច្បាប់មួយដែលតម្រូវឲ្យបន្តលក់អាវុធឲ្យតៃវ៉ាន់ ដើម្បីការពារខ្លួន៕
Tag:
សហរដ្ឋអាមេរិក
ចិន
តៃវ៉ាន់
ពាណិជ្ជកម្មសព្វាវុធ
© រក្សាសិទ្ធិដោយ thmeythmey.com