លោក រឿន ម៉ៅ ប្រាប់ពីរបៀបធ្វើនំបញ្ចុកឲ្យមានគុណភាពល្អ

ជាតិ

សង្គមជាតិ

លោក រឿន ម៉ៅ ប្រាប់ពីរបៀបធ្វើនំបញ្ចុកឲ្យមានគុណភាពល្អ

08, Jun 2019 , 3:13 pm

រូបភាព

ដោយ: ប៉ូ សាគុន

ភ្នំពេញ៖ លោក រឿន ម៉ៅ ដែលបើកមុខរបរធ្វើនំបញ្ចុកតាំងពីឆ្នាំ១៩៩៣មក បានប្រាប់ពីរបៀបធ្វើនំបញ្ចុកឱ្យមានរសជាតិឆ្ងាញ់ សរសៃស្វិត និងមិនឆាប់ផ្អូម។ នំបញ្ចុករបស់លោក ទទួលបានការគាំទ្រច្រើនពីអតិថិជន។

ជំហានដំបូងនៃការធ្វើនំបញ្ចុក លោក រឿន ម៉ៅ ដែលរស់នៅក្នុងភូមិកំពង់ចម្លង ឃុំព្រែកទន្លាប់ ស្រុកលើកដែក ខេត្តកណ្ដាល ឱ្យយកអង្ករបាយរឹងទៅត្រាំទឹករយៈពេលមួយយប់។ បន្ទាប់មកត្រូវយកអង្ករដែលបានត្រាំនោះ ទៅលាងទឹកឱ្យស្អាត បានន័យថាលាងរហូតទាល់តែទឹកថ្លា។ បន្ទាប់មកគេត្រូវយកអង្ករនោះទៅកិនឱ្យក្លាយជាម្សៅ។ ជំហានបន្ទាប់គេយកម្សៅនោះទៅលាយជាមួយនឹងទឹកអំបិល (ម្សៅមួយធុងប៉េត្រូ ត្រូវលាយទឹកអំបិលប្រហែល១លីត្រកន្លះ)។

លោក រឿន ម៉ៅ ពន្យល់ពីមូលហេតុដែលលាយទឹកអំបិលចូលក្នុងម្សៅយ៉ាងដូច្នេះ៖«យើងដាក់ទឹកអំបិលនេះដើម្បីកុំឱ្យម្សៅហើម កុំឱ្យឆាប់ផ្អូម ហើយដើម្បីឱ្យសរសៃនំស្វិត»។

ក្រោយពីលាយទឹកអំបិលជាមួយនឹងម្សៅសព្វហើយ ត្រូវយកម្សៅនោះច្រកចូលក្នុងទៃឬស្បៃហើយចងវាឱ្យតឹងណែន រួចយកថ្មសង្កត់លើម្សៅនោះដើម្បីឱ្យស្ងួតទឹកអស់។ ក្រោយពីម្សៅនោះស្ងួត គេហៅថាក្របៅនំបញ្ចុកវិញ។ គេត្រូវយកក្របៅដែលក្នុងមួយដុំមានទម្ងន់ប្រហែល២៤គីឡូ ទៅស្ងោរកុំឱ្យឆ្អិនពេក ដោយស្ងោរប្រហែល១ម៉ោង។

ជំហានបន្ទាប់គេត្រូវស្រង់ក្របៅពីទឹកដែលដាំពុះ យកទៅត្រាំក្នុងទឹកត្រជាក់វិញ ដើម្បីឱ្យវាត្រជាក់។ បន្ទាប់មកត្រូវយកក្របៅនោះទៅវ៉ៃដោយម៉ាស៊ី ឬដោយដៃក៏បាន ដើម្បីឱ្យវាហ្មត់ទៅជាម្សៅវិញ។

ម្សៅដែលមានទម្ងន់ប្រហែល២៤គីឡូក្រាមកាលពីនៅជាក្របៅ គេត្រូវយកវាទៅលាយជាមួយទឹកអំបិលប្រហែលជិតកន្លះលីត្រម្ដងទៀត។ ការលាយជាមួយទឹកអំបិលជាលើកទី២នេះត្រូវបានលោក ម៉ៅ ពន្យល់ដូច្នេះថា៖«យើងលាយទឹកអំបិលម្ដងទៀត ដើម្បីឱ្យសរសៃនំបញ្ចុកកាន់តែស្វិត និងទុកបានយូរ។ ជាធម្មតានំបញ្ចុករបស់ខ្ញុំអាចទុកបានប្រហែលជា១ថ្ងៃទៅ២ថ្ងៃ។ ខ្ញុំមិនអាចកំណត់ពេលច្បាស់លាស់បានទេ ព្រោះអង្ករឥឡូវគេដាក់ថ្នាំច្រើនពេក។ ខ្ញុំធ្វើនំបញ្ចុក ខ្ញុំលាយតែទឹកអំបិលទេ ខ្ញុំមិនលាយអ្វីផ្សេងទៀតទេ»។

លាយម្សៅជាមួយទឹកអំបិលរួចហើយ គេយកវាទៅលញ់ម្ដង២គីឡូក្រាមឱ្យទៅជាល្បាយ។ រួចគេយកម្សៅនោះទៅដាក់ក្នុងប៉ែន ដើម្បីរោយម្សៅទៅក្នុងទឹកកំពុងពុះ។ ក្រោយពីរោយម្សៅទៅក្នុងទឹកក្ដៅបានប្រមាណ៤នាទី មើលសរសៃនំបញ្ចុកថាទន់ល្មមហើយ គេស្រង់វាយកទៅស្រោចទឹកឱ្យត្រជាក់។ ក្រោយពីនំត្រជាក់ហើយ គេយកនំបញ្ចុកនោះទៅត្រាំទឹកម្ដងទៀត។ បន្ទាប់មកគេចាប់ចូលក្នុងកញ្ច្រែកដែលមានទ្រាប់ស្លឹកចេកជាការស្រេច។

សូមបញ្ជាក់ថា នេះគ្រាន់តែជារបៀបធ្វើនំបញ្ចុក ឱ្យសរសៃនំស្វិតឆ្ងាញ់ និងទុកបានយូររបស់លោក រឿន ម៉ៅ ប៉ុណ្ណោះ។ នំបញ្ចុក ដែលមានរសជាតិឆ្ងាញ់ ក៏ត្រូវការរសជាតិសម្លឆ្ងាញ់ផងដែរ៕