ជាតិ
សេដ្ឋកិច្ច
×![]()
ដោយ: ភួង វ៉ាន់ថា
បញ្ហា និងកត្តាប្រឈម ដែលកើតមានលើវិស័យកសិកម្មកម្ពុជា មានដូចជា ការប្រែប្រួលនៃអាកាសធាតុ, ប្រព័ន្ធធារាសាស្ត្រ, ហេដ្ឋារចនាសម្ព័ន, កង្វះធនធានសិក្សាស្រាវជ្រាវ, បញ្ហាទីផ្សារ, កង្វះបច្ចេកទេស, ទំនើបកម្មវិស័យកសិកម្ម, ថាមពលអគ្គីសនី, និងបញ្ហាជាច្រើនទៀត។ នេះបើតាមការសង្កេតឃើញរបស់វាគ្មិនមួយចំនួនក្នុងវេទិការស្តីពី «ការប្រមូលផល» របស់ ធនាគារអភិវឌ្ឍន៏អាស៊ី (ADB) នាព្រឹកថ្ងៃទី៦ ខែមិថុនា ឆ្នាំ២០១៩នេះ។ 
ជាការឆ្លើយតបទៅនឹងបញ្ហាដែលបានលើកឡើងនេះ អ្នកនាំពាក្យក្រសួងកសិកម្ម លោក ស្រី វុទ្ធី បានលើកឡើងថា ក្រសួងកសិកម្មបានដាក់ចេញនូវគោលនយោយបាយថ្នាក់ជាតិ និងក្រោមជាតិ ក្នុងការជំរុញឲ្យកាន់តែប្រសើរឡើងនៃវិស័យកសិកម្មនៅកម្ពុជា។ ជាពិសេសក្រសួងកំពុងធ្វើការងារនេះយ៉ាងសកម្មជាមួយដៃគូពាក់ព័ន្ធនាពេលបច្ចុប្បន្ន។
លោកបន្តថា ក្រសួងកំពុងអភិវឌ្ឍវិស័យកសិកម្មតាមទម្រង់ពិពិធកម្មកសិកម្ម ទំនើបកម្មកសិកម្ម និងការផលិតតាមលក្ខណបច្ចេកទេសសមស្រប និងមានស្តង់ដារក្នុងការកែច្នៃ ដើម្បីនាំចេញប្រកបដោយគុណភាព និង អនាម័យ ឆ្លើយតបតាមតម្រូវការទីផ្សារ។
វិស័យកសិកម្មរបស់ប្រទេសកម្ពុជានៅតែស្ថិតក្នុងភាពទន់ខ្សោយ និងជួបប្រទះបញ្ហាជាច្រើនទៀត ខណៈវិស័យមួយនេះបានដើតួរនាទីសំខាន់ក្នុងការលុបបំបាត់ភាពក្រីក្ររបស់ប្រទេសមួយនេះ។ ADB បានសង្កត់ធ្ងន់ថាបញ្ហាកង្វះសម្ភារៈ និងការប្រើប្រាស់ឧបករណ៍ចាស់ៗហួសសម័យ បានធ្វើឲ្យប៉ះពាលដល់លទ្ធលផលនៃការស្រាវជ្រាវលើវិស័យកសិកម្ម។ នេះបើយោងតាមរបាយការវាយតម្លៃលើការងាររបស់ ADB រយៈពេល ១២ឆ្នាំនៅក្នុងប្រទេសកម្ពុជា ដែលចេញផ្សាយនាពេលថ្មីៗនេះ។
ចំពោះបញ្ហាកង្វះទឹកប្រើប្រាស់លើវិស័យកសិកម្ម លោក ចាន់ ស៊ីណាត អនុរដ្ឋលេខាធិការនៃក្រសួងធនធានទឹក និងឧតុនិយម បានឲ្យដឹងថា ពីឆ្នាំ១៩៨០ មកដល់បច្ចុប្បន្ននេះ ក្រសួងបានចំណាយថវិការ ១,៥ ពាន់លានដុល្លារ លើការកសាងប្រព័ន្ធធារាសាស្ត្រ មានដូចជាការស្ដារ និងកែលម្អឡើងវិញនូវប្រឡាយទឹក និងការកសាងប្រព័ន្ធធារាសាស្ត្រទ្រង់ទ្រាយតូច ប្រើប្រាស់លើគ្រប់វិស័យទូទាំងប្រទេស។
លោក បន្ថែមថា ក្រសួងកំពុងសិក្សាលើប្រព័ន្ធធារាសាស្ត្របែបទំនើប ជាមួយដៃគូអភិវឌ្ឍន៍ ដើម្បីធានាដល់ការគ្រប់គ្រងទឹក និងការពារមិនឲ្យមានទឹកជំនន់ផងដែរ។
លោក សុង សារ៉ន អគ្គនាយកក្រុមហ៊ុន Amru Rice ដែលជាក្រុមហ៊ុននាំចេញអង្ករ បានលើកឡើងថា កសិករត្រូវពង្រឹងសម្ថភាពបន្ថែមលើការងារកសិកម្មរបស់ខ្លួន ដើម្បីក្លាយខ្លួនជាកសិករវ័យឆ្លាត ត្រូវចេះប្រើប្រាស់បច្ចេកវិទ្យា។ លោក បញ្ជាក់ថា កសិករត្រូវចេះឈ្វេងយល់ពីទីផ្សារ គ្រាប់ពូជ ប្រភពទុន និងចងក្រងបណ្ដាញសហគមន៍៕
Tag:
ADB
ក្រសួងកសិកម្ម
កម្ពុជា
© រក្សាសិទ្ធិដោយ thmeythmey.com
