លោក រី គួក៖ ខ្ញុំជួយសម្រួលចរាចរណ៍ មិនចង់បានអ្វីទេ គ្រាន់តែចង់ឲ្យបងប្អូនជិះស្រួល

ជាតិ

បទយកការណ៍ / បទសម្ភាសន៍

លោក រី គួក៖ ខ្ញុំជួយសម្រួលចរាចរណ៍ មិនចង់បានអ្វីទេ គ្រាន់តែចង់ឲ្យបងប្អូនជិះស្រួល

17, Jun 2019 , 8:59 am

រូបភាព

ដោយ: ប៉ូ សាគុន

ភ្នំពេញ៖ លោក រី គួក គឺជាសន្តិសុខធ្វើការនៅក្នុងហាងនំប៉័ងមួយកន្លែងនៅតាមបណ្ដោយផ្លូវ២៧១។ លោកបានព្យាយាមយកម៉ោងការងារទៅសម្រួលចរាចរណ៍ ព្រោះតែការកកស្ទះខ្លាំងពេក។ ថៅកែហាងនំប៉័ងដែលលោក គួក ធ្វើការ សប្បាយចិត្តពេលឃើញសកម្មភាពនេះ។ តែទោះជាយ៉ាងណាក៏មានអ្នកដំណើរខ្លះមិនសូវពេញចិត្តនឹងទង្វើរបស់លោក ព្រមទាំងមិនស្ដាប់លោកពេលសម្រួលចរាចរដែរ។

-

ដើម្បីជ្រាបច្បាស់ថាតើការងារស្ម័គ្រចិត្តដែលលោក រី គួក កំពុងតែធ្វើនេះមានផលលំបាកយ៉ាងណា ហើយអ្នកដំណើរមានយោបល់ដូចម្ដេចខ្លះជុំវិញបញ្ហានេះ សូមស្ដាប់បទយកការណ៍ដែលរៀបចំដោយកញ្ញា ប៉ូ សាគុន ដូចតទៅ៖

នៅតាមបណ្តោយផ្លូវ២៧១ ជិតធនាគារ ANZ Royal ដែលនៅខាងត្បូងវត្តសន្សំកុសលប្រមាណជា៣០០ម៉ែត្រ មានចំណុចឆ្លងទ្រូងផ្លូវមួយកន្លែង។ កាន់តែនៅជិតចំណុចឆ្លងទ្រូងផ្លូវនេះទៅទៀតនោះ គឺហាងនំបាំងភ្នំពេញ។ នៅទីនេះមិនមានភ្លើងបញ្ជាចរាចរឡើយ។

បើគេធ្វើដំណើរកាត់ចំណុចឆ្លងទ្រូងផ្លូវនៅម្ដំវត្តសន្សំកុសលនេះ នៅម៉ោងប្រមាណជា៧ព្រឹក រហូតដល់ម៉ោងជាង៨ព្រឹក នោះគេនឹងឃើញបុរសវ័យប្រមាណជាង៤០ឆ្នាំម្នាក់ មាត់មានកញ្ចែផ្លុំ ដៃកាន់ដំបងបញ្ជាចរាចរណ៍ ក្នុងឈុតពណ៌សាច់ ដែលមានអៀមពណ៌ត្រួយចេកខ្ចី នៅពីក្រៅផងនោះ កំពុងឈរបញ្ជាចរាចរជាមិនខាន។ នេះជាការបញ្ជាក់របស់លោក រី គួក ៖«ខ្ញុំឃើញស្ទះពេក ខ្ញុំមកជួយសម្រួលចរាចរដើម្បីឱ្យអ្នកដំណើរ គាត់ធ្វើដំណើរបានស្រួល។ ខ្ញុំមិនចង់បានលុយទេ។ ម៉ោង៧ទៅម៉ោង៨ស្ទះខ្លាំងជាងគេហើយ»។

លោក រី គួក ជាសន្តិសុខក្នុងហាងនំប៉័ង ដែលនៅក្បែរនោះ បាននិយាយថា ដោយសារតែចរាចរណ៍នៅទីនេះមានការកកស្ទះខ្លាំងពេក ទើបលោកទៅជួយសម្រួលដល់អ្នកដំណើរ។ លោកអះអាងថា ម្ចាស់ហាងមិនបានហាមឃាត់លោកឡើយ តែបែរជាពេញចិត្តនឹងអ្វីដែលលោកធ្វើទៅវិញ។ លោកបន្ថែម៖«ម្ចាស់ហាងគាត់ឃើញខ្ញុំមកសម្រួលចរាចរគាត់សប្បាយចិត្តទៅវិញទេ ហើយពលរដ្ឋក៏គាត់សប្បាយចិត្តដែរ។ នៅមុខហាងនំប៉ាំងក៏ស្ទះ ដូច្នេះមិនមានអ្នកណាចូលទិញនំទេ។ ពេលខ្ញុំសម្រួលចរាចរទៅ គេក៏ចូលទិញនំប៉័ងបានស្រួលដែរ»។

ស្ត្រីដែលជាម្ចាស់ហាងនំប៉័ងដែលលោក គួក ធ្វើការ ដែលសុំមិនបញ្ចេញឈ្មោះ ថានេះជាទម្លាប់ច្រើនឆ្នាំរបស់លោក រី គួក ទៅហើយ ក្នុងការជួយសម្រួលចរាចរនេះ។ ស្ត្រីសម្បុរសរវ័យប្រមាណជាង៣០ឆ្នាំរូបនេះ ថាការដែលលោក គួក ទៅសម្រួលចរាចរមិនបានប៉ះពាល់ដល់ការងារដែលលោកធ្វើក្នុងហាងឡើយ។ ឈរនៅជិតកន្លែងគិតប្រាក់ ស្ត្រីម្ចាស់ហាងបញ្ជាក់ដោយមើលទៅលោក គួក ៖«គាត់ជួយសម្រួលចរាចរនេះមិនមានប៉ះពាល់អ្វីទេ ដោយសារផ្លូវនេះវាស្ទះ។ ហើយនៅហាងក៏មិនសូវមានឡានម៉ូតូស្ទះដែរ។ ម្យ៉ាងគាត់ធ្វើបែបនេះយូរឆ្នាំមកហើយ»។

ចំណែកកញ្ញា ឆេង សុដាវីន ជាអ្នកដំណើរមួយរូប បានសង្កេតឃើញជាញឹកញយ ថាមានប្រជាជនធម្មតាដែលមិនមានតួនាទីអ្វីក្នុងការងារទាំងនោះ ស្ម័គ្រចិត្តជួយការងារសង្គមបែបនេះ។ ជាមួយគ្នានេះដែរនារីវ័យ២១ឆ្នាំរូបនេះ សម្គាល់ឃើញអ្នកដំណើរមិនគោរពច្បាប់ចរាចរព្រោះតែការធ្វើតាមគ្នា។ កញ្ញាប្រាប់ពីអ្វីដែលខ្លួនបានមើលឃើញដូច្នេះ ៖«តាមផ្លូវនៅពេលដែលខ្ញុំធ្វើដំណើរភាគច្រើនកន្លែងខ្លះមានការកកស្ទះខ្លាំង។ មានប្រជាជនមួយចំនួននៅពេលដែលឃើញស្ទះបែបនេះ គាត់ឈប់ម៉ូតូ ដើម្បីជួយសម្រួលចរាចរ។ ស្ទះភាគច្រើនដោយសារតែជិះបញ្ច្រាស។ ផ្លូវដែលមានទៅនិងមក តែបែរជាមានតែមកទេ។ ខ្ញុំឃើញបែបនេះភាគច្រើន»។

និស្សិតរៀនផ្នែកច្បាប់រូបនេះ បានមើលឃើញពីចំណុចវិជ្ជមាននិងអវិជ្ជមាន ចំពោះការងារស្ម័គ្រចិត្តជួយសង្គមរបស់ប្រជាជនធម្មតា ទៅលើបញ្ហាចរាចរនេះ កញ្ញា បញ្ជាក់ដូច្នេះ ៖«វាមានចំណុចល្អ ហើយក៏មានចំណុចប៉ះពាល់ដែរ។ ខ្ញុំគិតថា ប្រហែលជាគាត់គិតថាប្រសិនបើគាត់មិនចុះទៅសម្រួលចរាចរទេ ប្រហែលមិនមានអ្នកណាចុះទេ ហើយវានៅតែស្ទះបែបនេះរហូត។ តែពេលខ្លះក៏អ្នកដំណើរមិនស្ដាប់គាត់ទាំងអស់ដែរ។ ខ្ញុំគិតថាដោយសារមិនមែនជាតួនាទីរបស់គាត់ ពេលខ្លះគាត់មិនដឹងថា ពេលនេះអ្នកណាមានអតិភាព ហើយអ្នកណាមិនមានអតិភាព គឺគាត់ដឹងតែឃើញស្ទះក៏ឱ្យទៅសិន។ នេះហើយជាចំណុចដែលគេមិនសូវស្ដាប់គាត់»។

ដូចទៅនឹងអ្វីដែល សុដាវីន បានមើលឃើញដែរ លោក រី គួក ទទួលស្គាល់ថា អ្នកដំណើរមួយចំនួនតូចមិនពេញចិត្តនឹងអ្វីដែលលោកធ្វើឡើយ។ ត្រូវរត់ពីផ្លូវធំ ចុះទៅផ្លូវតូចដែលនៅក្បែរនោះដើម្បីសម្រួលចរាចរ ប្រសិនបើមានការកកស្ទះខ្លាំង ហើយត្រូវរត់មកផ្លូវ២៧១ដែលជាផ្លូវធំវិញ អ្នកជួយការងារសង្គមដែលស្នាក់នៅចាក់អង្រែក្រោមរូបនេះ មិនដែលហ៊ានតតបសំដីទៅអ្នកធ្វើដំណើរវិញឡើយ បើទោះបីជាពួកគេប្រើសម្ដីយ៉ាងណាមកកាន់លោកក៏ដោយ។

លោក គួក បញ្ជាក់ស្របពេលចរាចរមិនសូវមមាញឹក៖ «មានអ្នកខ្លះស្ដាប់ហើយអ្នកខ្លះទៀតមិនស្ដាប់ទេ។ គេស្ដីឱ្យខ្ញុំថាធ្វើចរាចរយូរៗម្ល៉េះ។ តែខ្ញុំមិនហ៊ានស្ដីឱ្យគេវិញទេ»។

ទោះជាមានអ្នកមិនពេញចិត្ត តែក៏មានអ្នកដំណើរភាគច្រើនបានសរសើរពីការងារជួយសង្គមរបស់លោកដែរ។ ស្ត្រីម្ចាស់ហាងរូបស្រស់ ដែលតែងតែបើកប្រាក់ខែឱ្យសន្តិសុខរបស់ខ្លួនពេញថ្លៃរាល់ខែរូបនេះ កោតសរសើរពីសណ្ដានចិត្តរបស់បុគ្គលិករបស់ខ្លួន ៖«សម្រាប់ខ្ញុំ ខ្ញុំគិតថាគាត់ជាមនុស្សល្អដែលអាចជួយសង្គមបានដោយមិនគិតពីផលប្រយោជន៍។ សូម្បីតែទូរស័ព្ទប្រើក៏គាត់មិនមាន គឺគាត់ធ្វើចេញពីចិត្តមែន»។

ប៉ុន្តែកញ្ញា សុដាវីន វិញ យល់ថាការមានចិត្តជួយសង្គមក្នុងការធ្វើចរាចរនេះ ជារឿងល្អ តែពួកគេគួរតែព្យាយាមទាក់ទងទៅអាជ្ញាធរក្នុងតំបន់ដែលមានការកកស្ទះនោះ ជាការប្រសើរជាង ព្រោះមន្ត្រីដែលមានជំនាញ នឹងធ្វើការបានល្អជាងប្រជាជនធម្មតា។ ដារីន បញ្ចេញទស្សនៈរបស់ខ្លួនដូច្នេះ ៖«យកល្អប្រជាពលរដ្ឋធម្មតា គួរតែទាក់ទងទៅអាជ្ញាធរមូលដ្ឋានដែលនៅក្នុងតំបន់នោះ រាយការណ៍ពីបញ្ហាស្ទះ។ ព្រោះថាគាត់អាចធ្វើការនេះបានល្អជាងយើង»។

ជួយសម្រួលចរាចររៀងរាល់ព្រឹកថ្ងៃចន្ទ ដល់ថ្ងៃសុក្រ អស់រយៈពេលប្រមាណជិត១០ឆ្នាំមកហើយនោះ លោក រី គួក ដែលមានសម្ដីមិនសូវច្បាស់ និងមានសម្បុរស្រអែមរូបនេះ ថាអ្នកដំណើរមួយចំនួនមិនបានគោរពច្បាប់ចរាចរឡើយ ដែលជាហេតុនាំឱ្យមានគ្រោះថ្នាក់ចរាចរជាញឹកញាប់។ នេះជាការមើលឃើញរបស់លោក គួក ៖«អ្នកបើកបរឥឡូវមិនគោរពច្បាប់ទេ បើកមិនដឹងទិសទេ។ អ្នកខ្លះបើកបញ្ច្រាស អ្នកខ្លះបើកឆ្លងផ្លូវមិនមើលគេទេ ហើយអ្នកខ្លះទៀតបត់មិនស៊ីញ៉ូទៀត។ គ្រោះថ្នាក់ចរាចរឥឡូវនេះ ខ្លាំងជាងជំងឺអេដស៍ទៅទៀត។ឡានបើកលឿនៗណាស់ ហើយឧស្សាហ៍មានគ្រោះថ្នាក់ណាស់ ដល់តែចឹងរករឿងគ្នាហើយ»។

សម្រាប់កញ្ញា សុដាវីន ដែលជានិស្សិតផ្នែកច្បាប់មួយរូបនោះ បានទទូចដល់អ្នកដំណើរបែបនេះ ៖«សម្រាប់អ្នកបញ្ជាយានយន្តគ្រប់ប្រភេទ ត្រូវគោរពតាមច្បាប់ចរាចរដែលកំណត់។ ផ្លូវម៉ូតូគឺសម្រាប់តែម៉ូតូ ហើយផ្លូវឡានគឺសម្រាប់តែឡានទេ។ ត្រូវចេះគោរពចំពោះផ្លូវដែលមានអតិភាព និងគោរពភ្លើងបញ្ជាចរាចរ។ សម្រាប់ខ្ញុំប៉ុណ្ណេះគឺគ្រប់គ្រាន់»៕