អាជ្ញាធរមីយ៉ាន់ម៉ា បានបញ្ជាឲ្យក្រុមហ៊ុនទូរគមនាគមន៍ បិទសេវាកម្មអ៊ីនធឺណិត ក្នុងតំបន់ជម្លោះហែកហួរភាគខាងលិចនៃប្រទេស ។ ការចេញបទបញ្ជានេះ ធ្វើឡើងខណៈភាពតានតឹងបន្តកើនឡើងក្នុង Rakhine ទីដែលកងទ័ពរដ្ឋាភិបាលកំពុងប្រយុទ្ធតទល់ជាមួយក្រុមឧទ្ទាមភាគតិច។
នៅថ្ងៃសៅរ៍ ទី ២២ មិថុនា ក្រុមហ៊ុនទូរគមនាគមន៍ធំបំផុតប្រចាំប្រទេសមីយ៉ាន់ម៉ា Telenor Group បញ្ជាក់ឲ្យដឹងថា ក្រសួងព័ត៌មាន និងដឹកជញ្ជូនមីយ៉ាន់ម៉ា បានក្រុមហ៊ុនទូរគមនាគមន៍ទាំងអស់ ផ្អាកសេវាកម្មអ៊ីនធឺណិតជាបណ្តោះអាសន្ន ក្នុងតំបន់ទាំង១១ ក្នុងរដ្ឋ Rakhine និងរដ្ឋក្បែរនោះ Chin ។
ទាក់ទិននឹងការបិទនេះដែរ ក្រសួង បានលើកហេតុផលបែបនេះ៖ «ការរំខានដល់ដំណើរឆ្ពោះទៅរកសន្តិភាព និងការប្រើប្រាស់សកម្មភាពអ៊ីនធឺណិតនានា ដើម្បីសម្រួបសម្រួលសកម្មភាពខុសច្បាប់»។ យោងតាមការចុះផ្សាយរបស់ទីភ្នាក់ងារព័ត៌មាន Reuters ដោយដកស្រង់សេចក្តីថ្លែងការណ៍ក្រុមហ៊ុនខាងលើ ការបិទសេវាកម្មអ៊ីនធឺណិតនេះ បានចូលជាធរមាននៅ យប់ថ្ងៃសុក្រទី ២១ ខែមិថុនា ឆ្នាំ២០១៩។
ទន្ទឹមនឹងគ្នានេះ ក្រុមហ៊ុន Telenor Myanmar ក៏បានស្នើសុំការពន្យល់បន្ថែមទៀតសម្រាប់ការបិទនេះពីរដ្ឋាភិបាលមីយ៉ាន់ម៉ា និងបានសង្កត់ធ្ងន់ថា សេរីភាពនៃការបញ្ចេញមតិ តាមរយៈសេវាកម្មទូរគមនាគមន៍ គួរតែរក្សាទុកសម្រាប់គោលបំណងមនុស្សធម៌នានា។
យ៉ាងណាមិញ នៅក្នុងសន្និសីទសារព័ត៌មាន កាលពីថ្ងៃសៅរ៍ទី ២២ មិថុនា អ្នកនាំពាក្យយោធា ឧត្តមសេនីយ៍ Zaw Min Tun បានច្រានចោលដំណឹងនេះ ដោយអះអាងថា ក្រុមយោធាមីយ៉ាន់ម៉ា ពុំដឹងលឺអំពីរឿងបិទអ៊ីនធឺណិតនេះឡើយ។
សូមបញ្ជាក់ថា ស្ថានការណ៍នៅរដ្ឋរ៉ាក់ឃីន ទទួលបានការចាប់អារម្មណ៍ជាខ្លាំងពីសំណាក់សហគមន៍អន្តរជាតិ ក្រោយពីជនជាតិម៉ូស្លីមជាង ៧០ម៉ឺននាក់បានភៀសខ្លួនចូលទៅកាន់ព្រំដែនបង់ក្លាដេស ដើម្បីគេចផុតពីការបង្ក្រាបដ៏ឃោរឃៅពីសំណាក់ក្រុមយោធាមីយ៉ាន់ម៉ា ។
ភ្នាក់ងារស៊ើបអង្កេត UN បានកោះហៅឲ្យមានការកាត់ទោសលើមន្ត្រីយោធាជាន់ខ្ពស់មីយ៉ាន់ម៉ា ពាក់ព័ន្ធនឹងសំណុំរឿង សម្លាប់រង្គាល រំលោភ និងដុតផ្ទះសម្បែងជាដើម។ យ៉ាងណាមិញ ក្រុមយោធា ទាត់ចោលការចោទប្រកាន់នេះ។
យោងតាមការិយាល័យ UN សម្រាប់សម្រួបសម្រួលកិច្ចការមនុស្សធម៌ ចាប់តាំងពីខែវិច្ឆិកា ឆ្នាំ២០១៨មក ការប្រយុទ្ធគ្នារវាងក្រុមយោធាមីយ៉ាន់ម៉ា និងក្រុមឧទ្ទាម Arakan បានបង្ខំឲ្យមនុស្សរាប់ម៉ឺននាក់ ភៀសខ្លួនចេញពីលំនៅឋានរបស់ពួកគេ នៅជុំវិញតំបន់ ភាគកណ្តាល និងខាងជើង នៃរដ្ឋរ៉ាក់ឃីន និង ផ្នែកខ្លះនៃរដ្ឋ ជីន៕