អន្តរជាតិ
អនុរដ្ឋមន្រ្តីការបរទេសចិន ចាង ជុន ។ រូបភាពពីក្រសួងការបរទេសចិន
×![]()
ដោយ: តន ចាន់រិទ្ធារ៉ា
ទីក្រុងប៉េកាំង បានប្រកាសនៅថ្ងៃទី២៤ ខែមិថុនា ថា ខ្លួននឹងមិនអនុញ្ញាតឲ្យមានការជជែកពិភាក្សាណាមួយលើបញ្ហានៅហុងកុងក្នុងកិច្ចប្រជុំប្រទេសសេដ្ឋកិច្ចលូតលាស់ទាំង២០ (G20) នៅជប៉ុនឡើយ។ ការប្រកាសដែលធ្វើឡើងដោយអនុរដ្ឋមន្ត្រីការបរទេសចិន ចាង ជុន ជាការទប់ស្កាត់បំណងរបស់អាមេរិកដែលចង់លើកយកការតវ៉ានៅហុងកុងទៅជជែកអំឡុងជំនួបរវាងប្រធានាធិបតី ដូណាល់ ត្រាំ និងសមភាគីចិន ស៊ី ជិនភីង ដែលគ្រោងធ្វើឡើងនៅក្រៅកិច្ចប្រជុំប្រចាំឆ្នាំមួយនេះ។
ការតវ៉ារបស់ពលរដ្ឋហុងកុងប្រឆាំងសំណើច្បាប់ធ្វើបត្យាប័នជាមួយចិន បានទាក់ទាញចំណាប់អារម្មណ៍អាមេរិកជាខ្លាំង។ ប្រធានាធិបតីអាមេរិក ដូណាល់ ត្រាំ បានតាមដានរឿងនេះ ហើយសង្ឃឹមថា រឿងរ៉ាវនឹងត្រូវបានដោះស្រាយ។ ចំណែករដ្ឋមន្ត្រីការបរទេសអាមេរិក ម៉ៃ ប៉ុមប៉េអូ ប្រកាសថា លោក ត្រាំ នឹងយកបញ្ហារសើបនេះទៅជជែកជាមួយប្រធានាធិបតីចិន ស៊ី ជិនភីង អំឡុងពេលជំនួបដែលធ្វើឡើងនៅអូសាកាផងដែរ។
យ៉ាងណាមិញ ចិននឹងមិនឲ្យមានរឿងបែបនេះកើតឡើងឡើយ។ បើតាមទីភ្នាក់ងារព័ត៌មាន AFP ក្នុងសន្និសីទសារព័ត៌មានស្ដីពីដំណើរលោក ស៊ី ទៅជប៉ុននៅចុងសប្ដាហ៍នេះ អនុរដ្ឋមន្ត្រីការបរទេសចិន ចាង ជុន និយាយថា ជំនួប G20 នឹងមិនជជែកពីបញ្ហាហុងកុងឡើយ ហើយចិនក៏មិនអនុញ្ញាតឲ្យមានការជជែកពីបញ្ហានេះដែរ។
«កិច្ចការហុងកុង ជារឿងផ្ទៃក្នុងរបស់ចិនសុទ្ធសាធ ហើយគ្មានប្រទេសណាមានសិទ្ធិធ្វើអន្តរាគមន៍ឡើយ។» នេះជាការបញ្ជាក់របស់លោក ចាង ជុន ក្នុងសន្និសីសារព័ត៌មានថ្ងៃទី២៤ ខែមិថុនា ដែលបន្តថា ជំនួប G20 ជាវេទិកាដែលលើកឡើងពីរបៀបវារៈសេដ្ឋកិច្ចសាកលប៉ុណ្ណោះ។ មន្ត្រីក្រសួងការបរទេសចិនដដែលនេះ ក៏ឆ្លៀតរំឭកដែរថា ហុងកុង ជាតំបន់រដ្ឋបាលពិសេស ហើយស្ថិតក្រោមអធិបតេយ្យរបស់ចិន។
នៅវេទិកា G20 ក្រុងប៉េកាំងអាចបិទមិនឲ្យមានការជជែកពីការតវ៉ាលើសេចក្ដីស្នើច្បាប់ធ្វើបត្យាប័នរបស់ហុងកុងបាន។ ប៉ុន្តែគេមិនដឹងថា អំឡុងជំនួបទល់មុខរវាងមេដឹកនាំ អាមេរិកនឹងស្ដាប់តាមចិន ហើយមិននិយាយអ្វីពីបញ្ហានេះឬយ៉ាងណាឡើយ។
កន្លងមក ប៉េកាំងមិនសប្បាយចិត្តឡើយពេលវ៉ាស៊ីនតោននិយាយពីរឿងហុងកុង ពិសេសការតវ៉ានោពេលថ្មីៗនេះតែម្ដង ដោយចាត់ទុកជាការរំលោភបំពានកិច្ចការផ្ទៃក្នុងរបស់ខ្លួន។ មិនមែនតែអាមេរិកឡើយ អង់គ្លេសដែលជាអតីតម្ចាស់អាណានិគមរបស់ហុងកុងមុនឆ្នាំ១៩៩៧ ក៏រិះគន់ចំណាត់ការរបស់រដ្ឋាភិបាលហុងកុងលើក្រុមបាតុករដែរ។ ក្រោមសម្ពាធរបស់បាតុករ អាជ្ញាធរហុងកុង បានដកសេចក្ដីស្នើច្បាប់នេះដោយមិនកំណត់ពេលឡើយ។ ប៉ុន្តែបាតុករ នៅតែបន្តប្រមូលផ្ដុំដោយទាមទារឲ្យដកសេចក្ដីស្នើច្បាប់នេះគ្រវែងចោលតែម្ដង៕
Tag:
ចិន
ហុងកុង
អាមេរិក
G20
© រក្សាសិទ្ធិដោយ thmeythmey.com
