អន្តរជាតិ
ថៃ៖ ការជក់បារីនៅតាមផ្ទះ នឹងត្រូវជាប់ទោស បើបង្កផលប៉ះពាល់ដល់សមាជិកគ្រួសារ រូបភាព៖ កាសែតថៃ The Nation
× ប្រជាជនក្នុងប្រទេសថៃ នឹងលែងត្រូវបានអនុញ្ញាតឲ្យជក់បារីនៅផ្ទះ ប្រសិនបើទម្លាប់របស់ពួកគេ មានឥទ្ធិពលអវិជ្ជមានលើសមាជិកគ្រួសារផ្សេងទៀត ដោយសារផ្សែងបារី ។ នេះបើយោងតាមច្បាប់ស្តីពីការលើកកម្ពស់កិច្ចការពារ និងការអភិវឌ្ឍកំណែទម្រង់គ្រួសារ ដែលនឹងចូលជាធរមានចាប់ពីថ្ងៃទី២០ ខែសីហា ឆ្នាំ២០១៩តទៅ។
ច្បាប់ថ្មី ដែលត្រូវបានអនុម័តដើម្បីដោះស្រាយអំពើហិង្សាក្នុងគ្រួសារគ្រប់ទម្រង់ ចែងថា ការជក់បារីនៅផ្ទះ អាចបង្កផលប៉ះពាល់ដល់សុខភាព ហើយវា គឺជាទម្រង់នៃអំពើហិង្សាទៅលើមនុស្សដទៃទៀត ដែលរស់នៅក្រោមដំបូលផ្ទះតែមួយ។ ប្រធាននាយកដ្ឋានកិច្ចការនារី និងការអភិវឌ្ឍគ្រួសារ លោក Lertpanya Booranabundit លើកឡើងបែបនេះ ក្នុងសន្និសីទជាតិមួយស្តីពី សុខភាពសួត និងថ្នាំជក់ ដែលបានប្រព្រឹត្តិទៅក្នុងទីក្រុងបាងកកកាលពីសប្តាហ៍មុន។ ។
តាមការចុះផ្សាយរបស់កាសែតថៃ The Nation លោក Lertpanya បញ្ជាក់ទៀតថា ប្រសិនបើគេរកឃើញថា បញ្ហាសុខភាពរបស់សមាជិកគ្រួសារ កើតឡើងដោយសារផ្សែងបារីនៅផ្ទះ អ្នកជក់បារីរូបនោះ អាចប្រឈមមុខនឹងការកាត់ទោសនៅតុលាការពីរផ្សេងគ្នា។ ទីមួយ គឺ តុលាការឧក្រិដ្ឋកម្មសម្រាប់បទល្មើស «អំពើហិង្សាក្នុងគ្រួសារ» តាមរយៈការជក់បារី និងមួយទៀត គឺ តុលាការគ្រួសារ និងមជ្ឈមណ្ឌលកែប្រែ ដើម្បីលុបបំបាត់ទម្លាប់អាក្រក់នេះ។
អ្នកជំនាញ មកពីសាកលវិទ្យាល័យថៃ Mahidol បានរកឃើញថា ប្រជាជនថៃជិត ៥លានគ្រួសារ មានអ្នកចេះជក់បារី ហើយជាលទ្ធផល មនុស្សជាង ១០លាននាក់ រងប៉ះពាល់ដោយសារផ្សែងបារីនៅតាមផ្ទះ។ ភាគច្រើននៃជនរងគ្រោះដោយសារបញ្ហានេះ គឺជាកុមារ និងស្ត្រី។ ហើយកាលពីឆ្នាំ២០១៨ មនុស្សជាង៨ពាន់បាត់បង់ជីវិត ដោយសារការស្រូបផ្សែងបារីពីអ្នកជក់ ។
សូមបញ្ជាក់ថា ថៃ មានគោលដៅកាត់បន្ថយការប្រើប្រាស់ថ្នាំជក់នៅទូទាំងប្រទេសរហូតដល់តិចជាង ៣០ភាគរយក្នុងឆ្នាំ២០២៥ ខណៈប្រជាជនថៃ ៤០ម៉ឺននាក់ស្លាប់ ដោយសារជំងឺដែលបណ្តាលមកពីការជក់បារីជារៀងរាល់ឆ្នាំ៕
© រក្សាសិទ្ធិដោយ thmeythmey.com