អន្តរជាតិ
អាមេរិក ដាក់ទណ្ឌកម្មលើមេដឹកនាំកំពូលអុីរ៉ង់ និងយោធាកំពូលៗ ប្រធានាធិបតីអាមេរិក ដូណាល់ ត្រាំ ចុះហត្ថលេខាលើបញ្ជាដាក់ទណ្ឌកម្មលើមេដឹកនាំអ៊ីរ៉ង់។ រូបភាព AFP
× សហរដ្ឋអាមេរិក នៅថ្ងៃទី២៤ ខែមិថុនា បានទម្លាក់ទណ្ឌកម្មមួយកញ្ចប់ធំលើក្បាលម៉ាស៊ីនដឹកនាំអ៊ីរ៉ង់ ជាការឆ្លើយតបនឹងទង្វើបង្កអស្ថិរភាពរបស់ប្រទេសនេះក្នុងតំបន់។ ប្រធានាធិបតីអាមេរិក ដូណាល់ ត្រាំ និយាយថា ទណ្ឌកម្មនេះ អាចលុបវិញភ្លាមៗ បើអ៊ីរ៉ង់មិនធ្វើសកម្មភាពបង្កហេតុអ្វីទៀតនោះ។ ជុំវិញទណ្ឌកម្មអាមេរិកលើកនេះ ក្រុងតេហេរ៉ង់និយាយទុកមុនហើយថា វានឹងមិនប៉ះពាល់អ្វីដល់សេដ្ឋកិច្ចអ៊ីរ៉ង់ឡើយ។
ស្របពេលភាពតានតឹងកំពុងពុះកញ្ជ្រោលនៅតំបន់មជ្ឈិមបូព៌ា ជាមួយនឹងការបារម្ភពីការប៉ះទង្គិចយោធា សហរដ្ឋអាមេរិក បានដាក់សម្ពាធកាន់តែខ្លាំងទៀតលើអ៊ីរ៉ង់។ ប្រធានាធិបតីអាមេរិក ដូណាល់ ត្រាំ នៅថ្ងៃទី២៤ ខែមិថុនា បានចុះហត្ថលេខាលើបញ្ជាប្រតិបត្តិមួយ សំដៅដាក់ទណ្ឌកម្មលើអ៊ីរ៉ង់ដែលលោកអះអាងថា ធ្វើសកម្មភាពបង្ករឿង។ ទណ្ឌកម្មនេះថ្មីនេះ ធ្វើឡើងក្រោយអ៊ីរ៉ង់បាញ់ទម្លាក់ដ្រូនមួយគ្រឿងរបស់យោធាអាមេរិក។
មេដឹកនាំកំពូលអ៊ីរ៉ង់ អាយ៉ាតូឡា អាលី ខាមីណេ និងមេទ័ពកំពូលៗ៨នាក់ទៀតក្នុងជួរកងឆ្មាំបដិវត្តន៍ ជាគោលដៅនៃទណ្ឌកម្មផ្នែកហិរញ្ញវត្ថុនេះដែលនឹងរឹតត្បិតបុគ្គលទាំងពីការប្រើប្រាស់លុយរាប់ពាន់លានដុល្លារឯណោះ។ ពីបន្ទប់ពងក្រពើនៃសេតវិមាន លោក ត្រាំ និយាយថា អាមេរិក នឹងមិនអនុញ្ញាតឲ្យអ៊ីរ៉ង់មាននុយក្លេអ៊ែរឡើយ ហើយវាអាស្រ័យលើអ៊ីរ៉ង់ ថា ចង់ចរចាឬអត់។ ឯរឿងទណ្ឌកម្មនេះ លោកថា អាចដកវិញបាន ឬក៏ទុករាប់សិបឆ្នាំទៅមុខ ក៏អាស្រ័យលើអ៊ីរ៉ង់ដែរ។
ដោយឡែក រដ្ឋមន្ត្រីការបរទេសអ៊ីរ៉ង់ ចាវ៉ាដ ហ្សារីហ្វ ក៏នឹងត្រូវបញ្ចូលក្នុងបញ្ជីទណ្ឌកម្មនេះដែរ។ នពបើតាមការប្រកាសរបស់ក្រសួងរតនាគារអាមេរិក។ លោក ហ្សារីហ្វ ត្រូវបានគេមើលឃើញថា ជាមន្ត្រីអ៊ីរ៉ង់ដែលជំហរកណ្ដាល និងជាបុគ្គលសំខាន់នាំឲ្យមានកិច្ចព្រមព្រៀងនុយក្លេអ៊ែរឆ្នាំ២០១៥ ដែលអាមេរិកដើរចេញនោះ។ រដ្ឋមន្ត្រីរតនាគារអាមេរិក Steven Mnuchin និយាយថា ទណ្ឌកម្មនេះ ជាការព្រមានទៅកាន់មន្ត្រីគ្រប់កម្រិតរបស់យោធាអ៊ីរ៉ង់ និងមន្ត្រីផ្សេងទៀតនៃរបបក្រុងតេហេរ៉ង់ ដែលសាបព្រោះអំពើហិង្សា និងភេរវកម្ម។
អ៊ីរ៉ង់ឯណោះ ហាក់មិនព្រឺនឹងទណ្ឌកម្មឡើយ។ មុនការប្រកាសទណ្ឌកម្មរបស់វ៉ាស៊ីនតោន ក្រសួងការបរទេសអ៊ីរ៉ង់ ចេញមកប្រកាសថា ទណ្ឌកម្មថ្មីរបស់អាមេរិក នឹងមិនប៉ះពាល់អ៊ីរ៉ង់ឡើយ។ ក្នុងសន្និសីទសារព័ត៌មានថ្ងៃទី២៤ ខែមិថុនា អ្នកនាំពាក្យក្រសួងការបរទេសអ៊ីរ៉ង់ Abbas Mousavi និយាយថា អ៊ីរ៉ង់មិនដឹងពីទណ្ឌកម្ម និងគោលដៅរបស់វាឡើយ ហើយក៏មិនគិតថា មានផលប៉ះពាល់ដែរ។ លោកក៏សួរវិញថា តើអាមេរិកនៅសល់ទណ្ឌកម្មដែលមិនទាន់ដាក់លើអ៊ីរ៉ង់ទៀតទេ?
ទណ្ឌកម្មថ្មីៗនេះ ជាការបន្ថែមបន្ទុកលើអ៊ីរ៉ង់ដែលកំពុងជាប់ក្នុងសំណាញ់ទណ្ឌកម្មជាច្រើនជាន់ស្រេចហើយនោះ។ ក្នុងគោលដៅធ្វើឲ្យអ៊ីរ៉ង់កាន់តែឯកោ អាមេរិកបានដាក់ទណ្ឌកម្មលើដង្ហើមសេដ្ឋកិច្ចសំខាន់ដូចជាទណ្ឌកម្មប្រេង និងហិរញ្ញវត្ថុជាដើម ហើយសូម្បីតែសម្ព័ន្ធមិត្តអាមេរិកនៅអឺរ៉ុប និងអាស៊ីខ្លះ ក៏មិនហ៊ានបំពានដែរ។ ចុងក្រោយនេះ វត្តមានសព្វាវុធជាច្រើន ក៏កាន់តែធ្វើឲ្យស្ថានការណ៍តំបន់ឈូងសមុទ្រកាន់តែយ៉ាប់យ៉ឺន៕
© រក្សាសិទ្ធិដោយ thmeythmey.com