អន្តរជាតិ
ភាពតានតឹងអាមេរិក-អុីរ៉ង់៖ ក្រុមប្រឹក្សាសន្តិសុខ ស្នើឲ្យមានកិច្ចសន្ទនា តែអុីរ៉ង់ប្រកែក
ប្រភពរូប៖ AFP
×![]()
ក្រុមប្រឹក្សាសន្តិសុខនៃអង្គការសហប្រជាជាតិ (UNSC) នៅថ្ងៃទី២៤ ខែមិថុនា បានស្នើឲ្យមានកិច្ចសន្ទនា និងវិធានការដើម្បីបិទបញ្ចប់ភាពតានតឹងក្នុងតំបន់ឈូងសមុទ្រ។ យ៉ាងណាមិញ អ៊ីរ៉ង់ បានប្រកាសបិទផ្លូវចរចាជាមួយសហរដ្ឋអាមរិក ក្រោយពីប្រធានាធិបតីអាមេរិក ដូណាល់ ត្រាំ បានដាក់ទណ្ឌកម្មសេដ្ឋកិច្ចក្តៅៗលើក្រុងតេហេរ៉ង់ ។ 
ក្នុងសេចក្តីថ្លែងការណ៍ជាឯកច្ឆន្ទមួយ ដែលបានតាក់តែងដោយប្រទេសកូវ៉ែត ក្រុមប្រឹក្សាសន្តិសុខ បានថ្កោលទោសការវាយប្រហារកាលពីថ្មីៗនេះលើនាវាដឹកប្រេង ដោយចាត់ទុករឿងនេះថា ជាការគំរាមកំហែងដល់ការផ្គត់ផ្គង់ថាមពលរបស់ពិភពលោក ព្រមទាំងសន្តិសុខ និងសន្តិភាពអន្តរជាតិផងដែរ។
បន្ទាប់ពីបិទបញ្ចប់កិច្ចប្រជុំរយៈពេល២ម៉ោងរួច ស្ថាប័នកំពូលទទួលបន្ទុកផ្នែកសន្តិសុខរបស់អង្គការសហប្រជាជាតិបានយល់ព្រមលើសេចក្តីថ្លែងការណ៍មួយ ដែលពុំនិយាយចំៗលើអ៊ីរ៉ង់ ប៉ុន្តែបានចេញជំហរយ៉ាងច្បាស់លាស់ថា ភាគីពាក់ព័ន្ធទាំងអស់ គួរតែដើរចេញពីការប្រឈមមុខដាក់គ្នាដោយកម្លាំងយោធា។
ខណៈសមាជិកនៃក្រុមប្រឹក្សាសន្តិសុខ បានជួបគ្នា នៅថ្ងៃទី ២៤ ខែមិថុនា តបតាមការស្នើសុំរបស់ក្រុងវ៉ាស៊ីនតោន អគ្គរដ្ឋទូតអ៊ីរ៉ង់ប្រចាំអង្គការសហប្រជាជាតិ លោក Majid Takht Ravanchi បានប្រាប់អ្នកសារព័ត៌មានថា ស្ថានការណ៍នេះ ពុំអាចវិវត្តដល់កិច្ចសន្ទនាជាមួយសហរដ្ឋអាមេរិកឡើយ។
លោក Ravanchi និយាយបែបនេះ៖«អ្នក មិនអាចចាប់ផ្តើមកិច្ចសន្ទនាជាមួយនរណាម្នាក់ ដែលកំពុងគំរាមកំហែងអ្នក និងកំពុងបំភ័យអ្នកឡើយ»។ លោក សង្កត់ធ្ងន់ថា នេះពុំមែនជាពេលវេលាសក្តិសមសម្រាប់កិច្ចសន្ទនានោះទេ។
តាមការចុះផ្សាយរបស់ទីភ្នាក់ងារព័ត៌មាន AFP ជំហររួមគ្នាពីមហាអំណាចពិភពលោកនេះ បានធ្វើឡើងប៉ុន្មានម៉ោងប៉ុណ្ណោះក្រោយពីលោក ដូណាល់ ត្រាំ បានចេញបញ្ជាដាក់ទណ្ឌកម្មសេដ្ឋកិច្ចថ្មីលើអ៊ឺរ៉ង់ ។ សម្រាប់ទណ្ឌកម្មនេះ រដ្ឋបាលក្រុងវ៉ាស៊ីនតោន សំដៅលើមេដឹកនាំកំពូលអ៊ីរ៉ង់ Ayatollah Ali Khamenei និងមេបញ្ជាការអ៊ីរ៉ង់ចំនួន ៨នាក់។
ទន្ទឹមនឹងគ្នានេះ ក្រុមប្រឹក្សាសន្តិសុខ UN ទទូចឲ្យភាគីពាក់ព័ន្ធ និងបណ្តាប្រទេសទាំងអស់ក្នុងតំបន់ ត្រូវតែអនុវត្តការអត់ធ្មត់ខ្លាំងបំផុត ព្រមទាំងចាត់វិធានការ និងសកម្មភាពនានា ដើម្បីបន្ធូរបន្ថយភាពតានតឹង។ បើតាមសេចក្តីថ្លែងការណ៍ដែលគាំទ្រដោយរុស្ស៊ី និងសហរដ្ឋអាមេរិក សមាជិកក្រុមប្រឹក្សាសន្តិសុខ ស្នើសុំថា ភាពខុសគ្នានានា ត្រូវដោះស្រាយដោយសន្តិភាព និងតាមរយៈកិច្ចសន្ទនា។ ចំណែក ចក្រភពអង់គ្លេស បារាំង និងអាល្លឺម៉ង់ បានស្នើឲ្យមានការកាត់បន្ថយភាពតានតឹង និងបង្កើតកិច្ចសន្ទនាដោយគោរពពេញលេញលើវិធានអន្តរជាតិ។
អ៊ីរ៉ង់ ចង់ឲ្យសហរដ្ឋអាមេរិកបញ្ឍប់ការដាក់ទណ្ឌកម្ម
អគ្គរដ្ឋទូតអ៊ីរ៉ង់ប្រចាំ UN លើកឡើងថា សហរដ្ឋអាមេរិក ត្រូវតែបញ្ឈប់សង្គ្រាមសេដ្ឋកិច្ចរបស់ខ្លួន ប្រឆាំងនឹងប្រជាជនអ៊ីរ៉ង់ និងបង្កើតជាថ្មី នូវឱកាសសម្រាប់រៀបចំកិច្ចពិភាក្សាតំបន់ស្តីពីកិច្ចការសន្តិសុខ ក្រោមការឃ្លាំមើលរបស់អង្គការសហប្រជាជាតិ។ មន្ត្រីទូតរូបនេះ និយាយថា ដរាបណាការគំរាមកំហែងនៅតែបន្តកើតមាន វាគ្មានផ្លូវណាដែលអ៊ីរ៉ង់ និងអាមេរិកអាចចាប់ផ្តើមកិច្ចសន្ទនាបានឡើយ។
មែនទែនទៅ ភាពតានតឹង ឡើងកម្តៅខ្លាំងទៅៗ ក្រោយពីអ៊ីរ៉ង់ កាលពីសប្តាហ៍មុន បានបាញ់ទម្លាក់ដ្រូនស៊ើបការណ៍អាមេរិកមួយគ្រឿង ដែលក្រុង តេហេរ៉ង់ អះអាងថា បានហោះចូលដែនអាកាសខ្លួន ប៉ុន្តែការលើកឡើងនេះ ត្រូវបានក្រុងវ៉ាស៊ីនតោនទាត់ចោល។
ក្រោយហេតុការណ៍នេះ ប្រធានាធិបតីអាមេរិក ដូណាល់ ត្រាំ កាលពីថ្ងៃសុក្រទី ២១ មិថុនា បានប្រកាសឲ្យបើកការវាយប្រហារដែនអាកាសលើអ៊ីរ៉ង់ ប៉ុន្តែលោក បានដកបទបញ្ជានេះទៅវិញ ដោយលើកហេតុផល វានឹងបង្កការខូចខាត លើភាគីទាំងសងខាងធ្ងន់ធ្ងរពេក។
ម្យ៉ាងវិញទៀត អំឡុងកិច្ចប្រជុំសន្តិសុខ សហរដ្ឋអាមេរិក ក៏បានបង្ហាញពីភស្តុតាង ដែលអះអាងថា អ៊ីរ៉ង់ នៅពីក្រោយការវាយប្រហារលើនាវាដឹកប្រេង ក្នុងឈូងសមុទ្រអូម៉ង់ ដោយបង្កប់គ្រាប់បែកលើនាវា។ យ៉ាងណាមិញ ក្រុងតេហេរ៉ង់ បដិសេធនឹងការចោទប្រកាន់នេះ៕
Tag:
សហរដ្ឋអាមេរិក
អ៊ីរ៉ង់
UNSC
© រក្សាសិទ្ធិដោយ thmeythmey.com
