អន្តរជាតិ
ការស្ទង់មតិ៖ លទ្ធិប្រជាធិបតេយ្យធ្លាក់ចុះជាងការរំពឹងទុក នៅជុំវិញពិភពលោក
× ត្រឹមពាក់កណ្តាលនៃប្រជាជនសរុបលើពិភពលោក គិតថា ប្រទេសរបស់ពួកគេ គោរពគោលការណ៍នៃលទ្ធិប្រជាធិបតេយ្យ។ នេះបើតាមការស្ទង់មតិមួយ ចុះផ្សាយនៅថ្ងៃអង្គារទី ២៥ មិថុនា ដោយបានរកឃើញទៀតថា ប្រជាជនអឺរ៉ុបជាច្រើន យល់ឃើញថា ឧស្សាហកម្មធនាគារ និងប្រព័ន្ធផ្សព្វផ្សាយសង្គម គឺជាការគំរាមកំហែងដល់លទ្ធិប្រជាធិបតេយ្យ។
ការស្ទង់មតិលើមនុស្សជាង ១៥ម៉ឺននាក់ មកពីបណ្តាប្រទេសចំនួន ៥៧ ដោយក្រុមហ៊ុនអាល្លឺម៉ង់ចំនួនពីរ រួមមាន Dalia Research និង Alliance of Democracies Foundation បានរកឃើញថា ទោះបីជាក្នុងបណ្តាប្រទេសកាន់របបលទ្ធិប្រជាធិបតេយ្យក្តី ប្រជាជនប្រមាណ ៣៨ភាគរយ មិនពេញចិត្តជាមួយនឹងលក្ខខណ្ឌនៃការគ្រប់គ្រងរបស់រដ្ឋឡើយ។
ក្នុងសេចក្តីថ្លែងការណ៍មួយ នាយកប្រតិបត្តិក្រុមហ៊ុន Dalia Research លោក Nico Jaspers គូសបញ្ជាក់ថា បច្ចុប្បន្ននេះ ហានិភ័យធំបំផុតសម្រាប់ប្រទេសកាន់របបប្រជាធិបតេយ្យ គឺថា ប្រជាជន លែងមើលឃើញប្រទេសទាំងនោះថា ជាប្រទេសគោរពគោលការណ៍នៃលទ្ធិប្រជាធិបតេយ្យទៀតហើយ។
តាមការចុះផ្សាយរបស់ទីភ្នាក់ងារព័ត៌មាន Reuters ប្រជាជនក្នុងសហរដ្ឋអាមេរិក ត្រូវបានបែងចែកជា២ ដែលក្នុងនោះ ៤៦ភាគរយ ជឿជាក់ថា ប្រទេសខ្លួន គោរពលទ្ធិប្រជាធិបតេយ្យ ចំណែកឯ ៤០ភាគរយ ជឿជាក់ថា ប្រទេសខ្លួន គោរពលទ្ធិប្រជាធិបតេយ្យពុំទាន់គ្រប់គ្រាន់នៅឡើយ។
ទន្ទឹមនឹងគ្នានេះ ជាងពាក់កណ្តាលនៃប្រជាជនអាមេរិក និយាយថា សហរដ្ឋអាមេរិក មានឥទ្ធិពលវិជ្ជមានលើលទ្ធិប្រជាធិបតេយ្យនៅជុំវិញពិភពលោក ទោះបីជាមនុស្សភាគច្រើនក្នុងបណ្តាប្រទេសលោកខាងលិច ដូចជា កាណាដា និងភាគច្រើនក្នុងតំបន់អឺរ៉ុប មានអារម្មណ៍ថា ឥទ្ធិពលនោះ មានលក្ខណៈអវិជ្ជមាន។
ដោយឡែក ប្រជាជនក្នុងបណ្តាប្រទេសក្នុងតំបន់អឺរ៉ុបភាគច្រើន យល់ឃើញថា ឧស្សាហកម្មហិរញ្ញវត្ថុ និងធនាគារ មានឥទ្ធិពលអវិជ្ជមាន លើលទ្ធិប្រជាធិបតេយ្យក្នុងប្រទេសពួកគេ ក្នុងនោះប្រទេសក្រិក ទទួលរងការរិះគន់ខ្លាំងជាងគេ។ ការស្ទង់មតិ បានរកឃើញបែបនេះ ដោយលើកឡើងពីឧទាហរណ៍ថា ១០ឆ្នាំក្រោយពីវិបត្តិបំណុល ដែលបានរុញច្រានប្រជាជនក្រិកជាច្រើន ឲ្យធ្លាក់ចូលក្នុងភាពក្រីក្រ។
បន្ថែមពីរឿងនេះ ច្រើនជាង ៤០ភាគរយ នៃប្រជាជនដែលរស់នៅក្នុងសហរដ្ឋអាមេរិក កាណាដា និងអូទ្រីស ជឿជាក់ថា ប្រព័ន្ធផ្សព្វផ្សាយសង្គម ដូចជា Facebook និង Twitter មានឥទ្ធិពលអវិជ្ចមាន លើលទ្ធិប្រជាធិបតេយ្យ៕
Tag:
លទ្ធិប្រជាធិបតេយ្យ
ការស្ទង់មតិ
© រក្សាសិទ្ធិដោយ thmeythmey.com