ជប៉ុន នៅតែបន្តនាំមុខក្នុងការប្រណាំងប្រជែងវិស័យហេដ្ឋារចនាសម្ព័ន្ធក្នុងតំបន់អាស៊ីអាគ្នេយ៍ តទល់នឹងចិន ជាមួយនឹងគម្រោងនានាដែលនៅពុំទាន់សម្រេច មានតម្លៃស្ទើរតែ ១,៥ ដង ច្រើនជាងដៃគូប្រជែងខ្លួន។ នេះយោងតាមទិន្នន័យចុងក្រោយពី Fitch Solutions ។
គម្រោងនានាដែលគាំទ្រដោយជប៉ុន ក្នុងប្រទេសមានសេដ្ឋកិច្ចធំបំផុតទាំង៦ក្នុងតំបន់ រួមមាន ឥណ្ឌូណេស៊ី ម៉ាឡេស៊ី ហ្វីលីពីន សិង្ហបុរី ថៃ និងវៀតណាម មានតម្លៃស្មើនឹង ៣៦៧ពាន់លានដុល្លារ។ ចំណែក តួលេខរបស់ចិន ស្មើនឹង ២៥៥ពាន់លានដុល្លារ។ នេះបើតាមរបាយការណ៍ដដែល ដែលដកកស្រង់ចុះផ្សាយដោយសារព័ត៌មាន Bloomberg នៅថ្ងៃអាទិត្យ ទី២៣ ខែមិថុនា ឆ្នាំ២០១៩។
របាយការណ៍ខាងលើ កត់សម្គាល់ពីតម្រូវការយ៉ាងធំធេងសម្រាប់ការអភិវឌ្ឍហេដ្ឋារចនាសម្ព័ន្ធក្នុងតំបន់អាស៊ីអាគ្នេយ៍ ក៏ដូចជា ការឈានមុខរបស់ជប៉ុនលើចិន ទោះបីជាការជំរុញរបស់ប្រធានាធិបតីចិន ស៊ី ជិនភីង ក្នុងការចំណាយលើការសាងសង់កំពង់ផែ និងផ្លូវដែកជាដើម តាមរយៈគំនិតផ្តួចផ្តើមវិថី និងខ្សែក្រវាត់ក៏ដោយក្តី ។
ដោយឡែក តួលេខចុងក្រោយរបស់ Fitch Solutions រាប់បញ្ចូលតែគម្រោងនានាដែលស្ថិតក្នុងដំណាក់កាលរង់ចាំរួមមាន កំពុងរៀបចំផែនការ សិក្សា ត្រៀមស្នើច្បាប់ និងបច្ចុប្បន្នស្ថិតក្រោមការសាងសង់។ ទិន្នន័យរបស់ Fitch ក្នុងខែកុម្ភៈ ឆ្នាំ២០១៨ បានបង្ហាញថា ការវិនិយោគលើវិស័យហេដ្ឋារចនាសម្ព័ន្ធរបស់ជប៉ុនក្នុងតំបន់អាស៊ីអាគ្នេយ៍ស្មើនឹង ២៣០ពាន់លានដុល្លារ រីឯចិនស្មើនឹង ១៥៥ពាន់លានដុល្លារ។
តាម Bloomberg ធនាគារអភិវឌ្ឍន៍អាស៊ី (ADB) បានប៉ាន់ស្មានថា បណ្តាប្រទេសក្នុងតំបន់អាស៊ីអាគ្នេយ៍ នឹងត្រូវការការវិនិយោគប្រមាណ ២១០ពាន់លានដុល្លារក្នុងមួយឆ្នាំ សម្រាប់អភិវឌ្ឍន៍ហេដ្ឋារចនាសម្ព័ន្ធចាប់ពីឆ្នាំ២០១៦ ដល់ឆ្នាំ២០៣០ ក្នុងគោលដៅដើម្បីរក្សាសន្ទុះនៃកំណើនសេដ្ឋកិច្ច។
សូមបញ្ជាក់ថា វៀតណាម ជាគោលដៅធំបំផុតសម្រាប់ការវិនិយោគក្នុងវិស័យហេដ្ឋារចនាសម្ព័ន្ធរបស់ជប៉ុនក្នុងតំបន់ជាមួយគម្រោងនានាដែលនៅរង់ចាំមានតម្លៃស្មើនឹង ២០៩ពាន់លានដុល្លារ ពោលគឺច្រើនជាងពាក់កណ្តាលនៃលុយវិនិយោគសរុបរបស់ជប៉ុន។ ក្នុងចំណោមគម្រោងទាំងនោះ ក៏មានគម្រោងផ្លូវដែកល្បឿនលឿនតម្លៃ ៥៨,៧ពាន់លានដុល្លារដែលភ្ជាប់រវាងរដ្ឋធានី ហាណូយ និងទីក្រុងហូជីមិញផងដែរ។
សម្រាប់ចិន ឥណ្ឌូណេស៊ី គឺជាអតិថិជនស្នូល ដែលមានខ្ទង់វិនិយោគ ៩៣ពាន់លានដុល្លារ ឬប្រមាណ ៣៦ភាគរយ នៃលុយវិនិយោគសរុបរបស់ចិនក្នុងតំបន់។ ក្នុងចំណោមនោះ គម្រោងដែលមានតម្លៃជាងគេ គឺជា ទំនប់វារីអគ្គិសនីទន្លេ Kayan ក្នុងខេត្ត North Kalimantan ដែលស្មើនឹង ១៧,៨ពាន់លានដុល្លារ។
តាម Bloomberg នៅទូទាំងតំបន់អាស៊ីអាគ្នេយ៍ (លើកលែងទីម័រខាងកើត) បច្ចុប្បន្ននេះ ជប៉ុន មានគម្រោងហេដ្ឋារចនាសម្ព័ន្ធរួមគ្នាជាមួយបណ្តាប្រទេសម្ចាស់ផ្ទះចំនួន ២៤០ គម្រោង។ ចំណែកចិនមាន ២១០គម្រោង ៕