អន្តរជាតិ
អង់គ្លេស ផ្អាកនាំចេញឧស្ម័នបង្ហូរទឹកភ្នែកនិងគ្រាប់កៅស៊ូទៅហុងកុង ប៉ូលិសហុងកុងបាញ់ឧស្ម័នបង្ហូរទឹកភ្នែកដាក់ហ្វូងបាតុករ។ រូបភាព AFP
× ចក្រភពអង់គ្លេស បានផ្អាកនាំចេញសម្ភារគ្រប់គ្រងការប្រមូលផ្ដុំមានឧស្ម័នបង្ហូរទឹកភ្នែក និងគ្រាប់កៅស៊ូជ័រទៅកាន់ហុងកុង។ ការផ្អាកនេះ ធ្វើឡើងស្របពេលដែលទីក្រុងឡុងដ៍អំពាវនាវទៅកាន់រដ្ឋាភិបាលហុងកុងឲ្យស៊ើបអង្កេតការប៉ះទង្គិចរវាងប៉ូលិស និងក្រុមបាតុករប្រឆាំងសំណើច្បាប់ធ្វើបត្យាប័នជាមួយចិន ដែលនាំឲ្យមនុស្សរាប់សិបនាក់រងរបួស ដោយសារប៉ូលិសហុងកុង បានប្រើឧស្ម័នបង្ហូរទឹកភ្នែក និងគ្រាប់កៅស៊ូដើម្បីបំបែកហ្វូងបាតុករ។
អតីតម្ចាស់អាណានិគមហុងកុង គឺអង់គ្លេស នៅតែខ្វល់ខ្វាយសភាពការណ៍នៅអតីតទឹកដីរបស់ខ្លួន ដែលកំពុងតែញាប់ញ័រដោយសាររលកបាតុកម្មតវ៉ានឹងសំណើច្បាប់ធ្វើបត្យាប័នមួយ។ រដ្ឋមន្ត្រីការបរទេសអង់គ្លេស ជេរេមី ហាន់ ប្រាប់សមាជិកសភានៅថ្ងៃទី២៥ ខែមិថុនា ថា អង់គ្លេស នៅតែបារម្ភពីស្ថានភាពនៅហុងកុងដដែល។ លោកទទូចឲ្យរដ្ឋាភិបាលតំបន់ស្វយ័តមួយនេះ បើការស្រាវជ្រាវឯករាជ្យមួយដើម្បីរកការពិតក្នុងអំពើហិង្សាអំឡុងពេលតវ៉ា។
ក្រោយការប៉ះទង្គិចនៅហុងកុង អង់គ្លេសក៏ផ្អាកការនាំចេញសម្ភារៈគ្រប់គ្រងការជួបជុំទៅកាន់ហុងកុងសិន រហូតដល់សភាពការណ៍ល្អប្រសើរឡើងវិញ។ លោក ហាន់ ថ្លែងក្នុងកិច្ចប្រជុំនៅសភាថា លទ្ធផលនៃការស៊ើបអង្កេត នឹងត្រូវប្រើក្នុងការវាយតម្លៃលើសំណើទិញសម្ភារទាំងនោះនៅថ្ងៃអនាគត ហើយអង់គ្លេសនឹងមិនផ្ដល់សិទ្ធិឲ្យមានការនាំចេញនេះឲ្យប៉ូលិសហុងកុងឡើយ បើមិនទទួលបានការបកស្រាយពេញចិត្តទាក់ទងស្ថានភាពសិទ្ធិមនុស្ស និងសិទ្ធិមូលដ្ឋាននៅហុងកុងទេនោះ។
ទីក្រុងឡុងដ៍ផ្ដល់សិទ្ធិនាំចេញឧស្ម័នបង្ហូរទឹកភ្នែកទៅឲ្យប៉ូលិសហុងកុងចុងក្រោយបំផុតកាលពីខែកក្កដា ឆ្នាំ២០១៨ ខណៈសិទ្ធិនាំចេញគ្រាប់កាំភ្លើងកៅស៊ូ ត្រូវបានផ្ដល់កាលពីខែកក្កដា ឆ្នាំ២០១៥ ។ ប៉ុន្តែនៅខែមេសា ឆ្នាំ២០១៩ អង់គ្លេសបានផ្អាកការនាំចេញខែលការពារដែលប៉ូលិសហុងកុងត្រូវការ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
បាតុកម្មប្រឆាំងសំណើច្បាប់ធ្វើបត្យាប័នដែលបច្ចុប្បន្នត្រូវបានព្យួរដោយគ្មានពេលកំណត់ ជាការតវ៉ាដ៏ធំបំផុតមួយក្នុងប្រវត្តិសាស្ត្រហុងកុងក្រោយអង់គ្លេសផ្ទេរសិទ្ធិគ្រប់គ្រងទៅឲ្យចិនក្នុងឆ្នាំ១៩៩៧ ។ ពលរដ្ឋហុងកុងរាប់សិបម៉ឺននាក់ បានចុះដើរតាមដងផ្លូវដើម្បីទាមទារឲ្យគ្រវែងសំណើច្បាប់នេះចោល និងទាមទារឲ្យប្រធានប្រតិបត្តិតំបន់រដ្ឋបាលពិសេស Carrie Lam ចុះចេញពីតំណែង។ បាតុករក៏ទាមទារឲ្យស៊ើបអង្កេតលើប៉ូលិសដែលលេងខ្លាំងដៃពេលប៉ះទង្គិចជាមួយអ្នកប្រឆាំង។
កាតវ៉ារបស់ប្រជាជនមិនទានចប់ឡើយ ព្រោះការទាមទារសំខាន់ៗរបស់ពួកគេ មិនត្រូវបានរដ្ឋាភិបាលគិតគូរឡើយ ដ្បិតលោកស្រី Lam បានសុំទោសពីរដងពិតមែន តែមិនបាននិយាយដល់រឿងលាលែងពីតំណែងអ្វីឡើយ ខណៈសំណើច្បាប់ដ៏ចម្រូងចម្រាសដែលបើកផ្លូវដល់ការបញ្ជូនជនសង្ស័យទៅកាត់ក្ដីនៅតុលាការចិនដីគោកនោះ ក៏មិនទាន់ត្រូវបានបោះបង់ទាំងស្រុងដែរ ដោយត្រឹមតែផ្អាកការជជែកនៅសភាហុងកុងប៉ុណ្ណោះ៕
Tag:
អង់គ្លេស
ហុងកុង
ចិន
© រក្សាសិទ្ធិដោយ thmeythmey.com