អន្តរជាតិ
លោក មូន ចេអុីន៖ អាមេរិកនិងកូរ៉េខាងជើង ជួបគ្នាក្រោយឆាកដើម្បីរៀបចំជំនួបត្រាំ-គីមលើកទីបី
រូបភាព AFP
×![]()
ដោយ: តន ចាន់រិទ្ធារ៉ា
ប្រធានាធិបតីកូរ៉េខាងត្បូង មូន ចេអ៊ីន នៅថ្ងៃទី២៦ ខែមិថុនា បានបង្ហើបពីការជជែកជាសំងាត់រវាងអាមេរិក និងកូរ៉េខាងជើងជុំវិញការរៀបចំនួបមេដឹកនាំលើកទីបី។ បើតាមលោក មូន អាមេរិក ក៏បានស្នើទៅកាន់កូរ៉េខាងជើងដើម្បីរៀបចំជំនួបថ្នាក់ក្រុមការងារផងដែរ ខណៈភាគីទាំងពីរមិនបានជួបគ្នាច្រើនខែហើយ ពិសេសក្រោយជំនួបបរាជ័យនៅវៀតណាមមក។ ប៉ុន្តែលោកមិនបញ្ជាក់ទេថា លទ្ធផលនៃការជជែកក្រៅឆាកនេះ មានលទ្ធផលយ៉ាងណាឡើយ។ 
ក្នុងសំណេរឆ្លើយតបនឹងសំណួររបស់ស្ថាប័នផ្សព្វផ្សាយល្បីៗចំនួន៦ ប្រធានាធិបតីកូរ៉េខាងត្បូង អះអាងថា ការចរចារវាងអាមេរិក និងកូរ៉េខាងជើង មិនមែនជាប់គាំងដូចគេមើលឃើញឡើយ ទោះគ្មានការជួបមុខគ្នាផ្លូវការនោះ។ លោក មូន និយាយថា ភាគីទាំងពីរបានទាក់ទងគ្នានៅខាងក្រោយឆាកដើម្បីពិនិត្យមើលលទ្ធផលរៀបចំនួបមេដឹកនាំលើកទីបី ក៏ដូចជាសំណើរបស់អាមេរិកក្នុងការរៀបចំជំនួបមន្ត្រីក្រុមការងារ។
ក្នុងការឆ្លើយតបនៅថ្ងៃទី២៦ ខែមិថុនា លោក មូន ដែលដើរតួសំខាន់ក្នុងការរៀបចំជំនួបមេដឹកនាំអាមេរិក និងកូរ៉េខាងជើង បន្តថា ភាគីបានទាក់ទងគ្នាដោយផ្អែកលើការស្វែងយល់ពីជំហរភាគីម្ខាងទៀតអំឡុងពេលជំនួបនៅវៀតណាម។ ខណៈអាមេរិកចង់ឲ្យមានជំនួបមន្ត្រីថ្នាក់ក្រោមនោះ ប្រធានាធិបតីកូរ៉េខាងត្បូង បានទទូចឲ្យកូរ៉េខាងជើងត្រឡប់ចូលតុចរចាឲ្យបានឆាប់បំផុត។ នេះបើតាមការផ្សាយរបស់ទីភ្នាក់ងារព័ត៌មានកូរ៉េខាងត្បូង Yonhap ដែលបានផ្ញើសំណួរទៅកាន់លោក មូន ដែរ។
ការបញ្ចេញព័ត៌មានដោយមេដឹកនាំកូរ៉េខាងត្បូងពេលនេះ ជាសញ្ញាល្អសម្រាប់ដំណើរការរំសាយនុយក្លេអ៊ែរ ខណៈវ៉ាស៊ីនតោន និងព្យុងយ៉ាងមិនមើលមុខគ្នាបួនខែទៅហើយនោះ។ ប៉ុន្តែ លោក មូន មិនចាត់ទុកបរាជ័យនៃជំនួបនៅហាណូយ ជារឿងអាក្រក់ឡើយ។ លោកប្រាប់ប្រព័ន្ធផ្សព្វផ្សាយទាំង៦ ថា៖ «ខ្ញុំមើលមិនឃើញ វាជាបរាជ័យឡើយ ទោះគ្មានកិច្ចព្រមព្រៀងក៏ដោយ តែអ្វីដែលបានជជែក នឹងក្លាយជាមូលដ្ឋានសម្រាប់ការចរចាក់នៅដំណាក់កាលបន្ទាប់។»
តាមរយៈចម្លើយដដែល លោក មូន ក៏លើកឡើងពីតម្រូវការពេលវេលាក្នុងការស្ដារទំនុកចិត្តរវាងអាមេរិក និងកូរ៉េខាងជើង ដែលធ្លាប់ប្រយុទ្ធយ៉ាងស៊ីសាច់ហុតឈាមក្នុងសង្គ្រាមឆ្នាំ១៩៥០-១៩៥៣ ដែលចុងក្រោយបញ្ចប់ត្រឹមយុទ្ធសន្តិភាព។ មេដឹកនាំមាននិន្នាការសេរីនិយមរូបនេះបញ្ជាក់ថា ជាមួយនឹងទំនាក់ទំនងពោរពេញដោយអរិភាពជាង៧០ឆ្នាំមកនេះ វាជារឿងលំបាកក្នុងការហែលកាត់សមុទ្រនៃភាពមិនទុកចិត្តភ្លាមៗណាស់។
សព្វថ្ងៃ ដ្បិតមិនបានជួបមុខគ្នាផ្លូវការមែន ប្រធានាធិបតីអាមេរិក ដូណាល់ ត្រាំ និងមេដឹកនាំកូរ៉េខាងជើង គីម ជុងអ៊ុន បានឆ្លើយឆ្លងគ្នាតាមរយៈសំបុត្រ។ សម្រាប់លោក មូន ការផ្លាស់ប្ដូរសំបុត្រនេះ ជាការរក្សាឆន្ទៈក្នុងការបន្តកិច្ចសន្ទនារវាងអាមេរិក និងកូរ៉េខាងជើង។ លោក មូន ផ្ទាល់ ក៏កំពុងស្វែងរកឱកាសដើម្បីជួបចរចាលោក គីម ជាលើកទីបួនដែរ ប៉ុន្តែមិនទាន់មានការឆ្លើយតបអ្វីពីមេដឹកនាំកូរ៉េខាងជើងនៅឡើយទេ៕
Tag:
អាមេរិក
កូរ៉េខាងត្បូង
កូរ៉េខាងជើង
មូន ចេអ៊ីន
© រក្សាសិទ្ធិដោយ thmeythmey.com
