ជាតិ
អាជ្ញាធរភ្នំពេញ ប្តេជ្ញាបង្ក្រាបគ្រឿងញៀនតាមក្លិបកម្សាន្តឲ្យអស់ ត្រឹមឆ្នាំ២០១៩ រូបភាពពី AKP
× អភិបាលរាជធានីភ្នំពេញ លោក ឃួង ស្រេង អះអាងថា អាជ្ញាធរ នឹងចាត់វិធានការបង្ក្រាបគ្រឿងញៀនតាមក្លិបកម្សាន្ត និងខារ៉ាអូខេ ឲ្យអស់នៅរាជធានីភ្នំពេញ នៅត្រឹមឆ្នាំ២០១៩នេះ ។ នេះបើតាមការផ្សាយរបស់ទីភ្នាក់ងារសារព័ត៌មានកម្ពុជា (AKP)។
លោក ឃួង ស្រេង បានបញ្ជាក់ថា «កិច្ចការពារសន្តិសុខ គឺជាការងាររបស់សមត្ថកិច្ច និងអាជ្ញាធរ ដូច្នេះយើងត្រូវតែរួមគ្នាធ្វើយ៉ាងណាឱ្យភូមិ សង្កាត់មានសុវត្ថិភាព។ ពាក់ព័ន្ធនឹងក្លិបកម្សាន្តនានា ទោះបីតូច ឬធំ នៅក្នុងរាជធានីភ្នំពេញទាំងអស់ អាជ្ញាធរខណ្ឌទាំង១៤ ត្រូវតែចុះត្រួតពិនិត្យ ហើយបើដឹងថានៅក្នុងក្លិបកម្សាន្តមានបង្កប់គ្រឿងញៀន ដាច់ខាតត្រូវតែធ្វើការបង្ក្រាបបិទអាជីវកម្មក្លិបទាំងនោះតែម្ដង។» ការអះអាងនេះ បានធ្វើឡើងក្នុងកិច្ចប្រជុំគណៈបញ្ជាការឯកភាពរាជធានីភ្នំពេញនៅថ្ងៃទី២៥ ខែមិថុនា ឆ្នាំ២០១៩ ដោយមានចូលរួមពីអាជ្ញាធរខណ្ឌទាំង១៤ កងកម្លាំងសមត្ថកិច្ច និងមន្ទីរពាក់ព័ន្ធ។
ក្នុងកិច្ចប្រជុំនេះ លោក ស ថេត ស្នងការនគរបាលរាជធានីភ្នំពេញ បានឲ្យដឹងថា ការចុះបង្ក្រាបគ្រឿងញៀននៅតែអនុវត្តបន្តនៅតាមក្លិបកម្សាន្តនានានៅក្នុងរាជធានីភ្នំពេញ បើទោះបីនៅតាមក្លិបកម្សាន្តទាំងនោះ មានខ្នងបង្អែកប៉ុណ្ណាក៏ដោយ។ គ្រប់អង្គភាពពាក់ព័ន្ធ នឹងត្រូវអនុវត្តតាមគោលការរបស់សម្ដេច ស ខេង រដ្ឋមន្ត្រីក្រសួងមហាផ្ទៃ ថានៅឆ្នាំ២០១៩នេះ គឺជាឆ្នាំ លុបបំបាត់ឲ្យអស់បញ្ហាគ្រឿងញៀននៅតាមក្លិបកម្សាន្ត និងខារ៉ាអូខេនានានៅទូទាំងប្រទេស។
លោក ស ថេត បានលើកឡើងថា នៅតាមក្លិបកម្សាន្ត ភាគច្រើនលើសលុប គឺសុទ្ធតែជាស្រទាប់យុវជន ដែលសេបគ្រឿងញៀននៅក្នុងក្លិបដែលធ្វើឱ្យប៉ះពាល់យ៉ាងធ្ងន់ធ្ងរដល់ធនធានមនុស្ស។ សមត្ថកិច្ចត្រូវតែបង្ក្រាបឲ្យអស់បទល្មើសនានានៅតាមមូលដ្ឋាន រួមទាំងបទល្មើសក្មេងទំនើងអុកឡុកនៅតាមមូលដ្ឋានជាដើម។ ទាំងនេះគឺសំដៅធ្វើយ៉ាងណាឲ្យប្រជាពលរដ្ឋមានភាពកក់ក្តៅ និងជឿជាក់មកលើកងកម្លាំងសមត្ថកិច្ច៕
© រក្សាសិទ្ធិដោយ thmeythmey.com