ខេត្តព្រះសីហនុ៖ ពិព័រណ៍ការកម្សាន្ត និងការវិនិយោគប្រចាំតំបន់អាស៊ីអាគ្នេយ៍ឆ្នាំ២០១៩ (Asia Entertainment and Investment Expo2019) បានត្រូវធ្វើឡើងរយៈពេល២ថ្ងៃ គឺថ្ងៃទី២៧ និង២៨ ខែមិថុនា ឆ្នាំ២០១៩នៅសណ្ឋាគារសុខា ខេត្តព្រះសីហនុ។
វេទិកាដែលរៀបចំឡើងដោយក្រុមហ៊ុន Worldex Expo Cambodia នេះជាជំនួបដ៏សំខាន់សម្រាប់ទីផ្សារសេដ្ឋកិច្ច ពាណិជ្ជកម្ម និងការវិនិយោគលើវិស័យអចលនទ្រព្យ សណ្ឋាគារ ភោជនីយដ្ឋាន កម្សាន្ត និងបដិសណ្ឋារកិច្ច។
អ្នកវិនិយោគចម្រុះជាតិសាសន៍ចំនួន៨០នាក់ មកពីបណ្តាប្រទេសចំនួន១៥ដូចជា ចក្រភពអង់គ្លេស ចិន សហរដ្ឋអាមេរិក ហុងកុង ម៉ាកាវ កូរ៉េ ជប៉ុន ម៉ាឡេស៊ី សិង្ហបុរី ម៉ាល់តា តៃវ៉ាន់ ហ្វីលីពីន រុស្សី និងកម្ពុជា បានចូលរួមក្នុងព្រឹត្តិការណ៍ពិព័រណ៍ ដែលមាន៦០ស្តង់។
លោក សំ សិរីរតន៍ រដ្ឋលេខាធិការក្រសួងពាណិជ្ជកម្ម បានថ្លែងក្នុងពិធីបើក កាលពីថ្ងៃទី២៧ ខែមិថុនា៖«ថាស្របពេលដែលប្រទេសកម្ពុជា ជាម៉ាស៊ីននៃកំណើនសេដ្ឋកិច្ច តាងនាមឱ្យក្រសួងពាណិជ្ជកម្មយើង ពិតជាមានមោទកភាព ដែលប្រទេសកម្ពុជា ត្រូវបានជ្រើសតាំងជាកន្លែងប្រជុំទីផ្សារសេដ្ឋកិច្ច ពាណិជ្ជកម្ម និងជជែកពិភាក្សា ទាក់ទងនឹងការវិនិយោគលើវិស័យអចលនទ្រព្យ សណ្ឋាគារ ភោជនីយដ្ឋាន កម្សាន្ត និងបដិសណ្ឋារកិច្ច ប្រចាំតំបន់អាស៊ីអាគ្នេយ៍សម្រាប់ឆ្នាំ២០១៨នេះ»។
លោក មានជំនឿយ៉ាងមុតមាំថា ពិព័រណ៍ការកម្សាន្ត និងការវិយោគប្រចាំតំបន់អាស៊ីអាគ្នេយ៍ឆ្នាំ២០១៩ គឺជាឱកាសដ៏ឧត្តមមួយ សម្រាប់ការជួបជុំសហការ ដោះដូរ និងពង្រីកអាជីវកម្ម រវាងម្ចាស់អាជីវកម្ម អ្នកជំនួញជាពិសេសវិនិយោគិនជាតិ និងវិនិយោគិនបរទេស ដែលសកម្មភាពទាំងនេះ បានបង្កើនការចាប់អារម្មណ៍ លើការវិនិយោគនៅកម្ពុជា កាន់តែខ្លាំងក្លា និងជួយជំរុញឲ្យសេដ្ឋកិច្ចកម្ពុជា មានភាពល្អប្រសើរឡើង ថែមមួយកំរិតទៀត។
ឆ្លៀតក្នុងឱកាសនេះ លោករដ្ឋលេខាធិការ បានថ្លែងអំណរគុណយ៉ាងជ្រាលជ្រៅ ចំពោះបណ្ដាក្រុមហ៊ុន ដែលកំពុងមានវត្តមានក្នុងព្រឹត្តិការណ៍ពិព័រណ៍(AGE2019) ចំនួនជាង៦0ស្ដង់ ដែលសុទ្ធសឹងតែជាក្រុមហ៊ុនអន្តរជាតិ អញ្ជើញមកពីប្រទេសអង់គ្លេស ចិន សហរដ្ឋអាមេរិក ជប៉ុន កូរ៉េ ម៉ាល់តា អូស្ត្រាលី ហុងកុង តៃវ៉ាន់ ហ្វីលីពីន ម៉ាឡេស៊ី សិង្ហបុរី និងថៃ ដែលបានចូលរួមគាំទ្រ និងសហការយ៉ាងជិតស្និទ្ធជាមួយក្រុមការងារ ដើម្បីបង្កើតនូវព្រឹត្តិការណ៍រដ៏ធំ និងមានសារៈប្រយោជន៍នេះឡើង។
លោក Dato' Jerel Soo នាយកប្រតិបត្តិក្រុមហ៊ុន Worldex Trade Media Asia បានថ្លែងថា ពិព័រណ៍ការកម្សាន្ត និងការវិយោគប្រចាំតំបន់អាស៊ីអាគ្នេយ៍ឆ្នាំ២០១៩ ឬ Asia Entertainment and Investment Expo2019 ហៅកាត់ថា AGE2019» មានគោលដៅបង្កើនការរីកដុះដាល នៃ បច្ចេកវិទ្យាទំនើប ដើម្បីបង្កើនឱកាសទំនាក់ទំនងលើកិច្ចការងារជាច្រើន ដែលរួមមានផ្នែកឧស្សាហកម្មផងដែរ។ លោក Dato' Jerel Soo បញ្ជាក់បន្ថែម៖«យើងរំពឹងទុកថា នឹងមានអ្នកចូលរួមទស្សនាជាង ៣,៥០០នាក់ ដែលនឹងអាចជាសក្តានុពល ក្នុងការជំរុញឱ្យមានចរន្តសាច់ប្រាក់ ច្រើនជាង៣០លានដុល្លារសហរដ្ឋអាមេរិក ក្នុងរយៈពេល២ថ្ងៃនេះ»។
(អត្ថបទពាណិជ្ជកម្ម)