អន្តរជាតិ
ជម្លោះពាណិជ្ជកម្ម៖ លោក ត្រាំ ថា កិច្ចព្រមព្រៀងត្រូវលម្អៀងទៅអាមេរិកជាងចិន ប្រធានាធិបតីអាមេរិក ដូណាល់ ត្រាំ ចាប់ដៃសមភាគីចិន ស៊ី ជិនភីង នាជំនួបនៅជប៉ុន។ រូបភាព Xinhua
× ប្រធានាធិបតីអាមេរិក ដូណាល់ ត្រាំ នៅថ្ងៃទី១ ខែកក្ដដា និយាយថា ការចរចារវាងអាមេរិក និងចិនដើម្បីបញ្ចប់ជម្លោះពាណិជ្ជកម្ម ចាប់ដំណើរការឡើងវិញហើយ ប៉ុន្តែមិនបញ្ជាក់ថា ធ្វើឡើងនៅកម្រិតណាឡើយ។ ដោយមិនសុខចិត្តនឹងឱនភាពពាណិជ្ជកម្ម និងការចំណេញរាប់ឆ្នាំពីសំណាក់ចិននោះ លោក ត្រាំ អះអាងថា កិច្ចព្រមព្រៀងបញ្ចប់បញ្ហា ត្រូវតែឲ្យប្រយោជន៍ច្រើនទៅខាងអាមេរិក ដើម្បីស៊ីសងនូវការខាតប់ងច្រើនឆ្នាំមកនេះ។
ពីរថ្ងៃក្រោយជំនួបជាមួយប្រធានាធិបតីចិន ស៊ី ជិនភីង នៅទឹកដីជប៉ុន ប្រធានាធិបតីអាមេរិក ដូណាល់ ត្រាំ ប្រកាសថា ការចរចាដើម្បីរកកិច្ចព្រមព្រៀងបញ្ចប់សង្គ្រាមពាណិជ្ជកម្ម កំពុងធ្វើឡើងហើយ។ នាជំនួបអូសាកា មេដឹកនាំអាមេរិក និងចិនផ្ដល់សញ្ញាឲ្យមន្ត្រីចរចាទាំងពីរចាប់ផ្ដើមការចរចារបស់ខ្លួន សំដៅបង្កើតកិច្ចព្រមព្រៀងមួយ ហើយអាមេរិកក៏យល់ព្រមមិនបន្ថែមពន្ធលើទំនិញចិន និងបានបន្ធូរដៃឲ្យក្រុមហ៊ុន Huawei ទៀតផង។
ប្រាប់អ្នកសារព័ត៌មានពីសេតវិមាន លោក ត្រាំ និយាយថា ការចរចាបានចាប់ផ្ដើមឡើងវិញហើយ ដោយមន្ត្រីចរចាមិនត្រឹមជជែកតាមទូរសព្ទឡើយ តែក៏បានជួបគ្នាផងដែរ។ ប៉ុន្តែប្រធានាធិបតីអាមេរិកមិនបានផ្ដល់ព័ត៌មានលម្អិតពីការចរចាឡើយ។ ជុំវិញសមាសភាពក្រុមចរចា អាមេរិកដឹកនាំដោយតំណាងចរចាពាណិជ្ជកម្ម Robert Lighthizer និងរដ្ឋមន្ត្រីរតនាគារ Steven Mnuchin ឯចិនដឹកនាំឧបនាយករដ្ឋមន្ត្រី លីវ ហឺ ដែលជាមនុស្សជំនិតលោក ស៊ី ផ្ទាល់។
ជម្លោះពាណិជ្ជកម្មរវាងអាមេរិក និងចិនមានអាយុជិតមួយឆ្នាំទៅហើយ។ មួយឆ្នាំនេះ អាមេរិក និងចិនបានដាក់ពន្ធនាំចូលលើទំនិញរៀងៗខ្លួនទំហំលើសបីរយពាន់លានដុល្លារទៅហើយ។ ឯដើមចមវិញ គឺដោយសារអាមេរិកមិនពេញចិត្តនឹងឱនភាពពាណិជ្ជកម្មជាមួយចិន ក៏ដូចជាការនយោបាយពាណិជ្ជកម្មរបស់ចិនដែលកេងចំណេញលើអាមេរិកដូចជា ការឧបត្ថម្ភធនដល់ក្រុមហ៊ុនក្នុងស្រុក ការបង្ខំឲ្យផ្ទេបច្ចេកវិទ្យា និងការរឹតត្បិតទីផ្សារដោយចិនជាដើម។
អាស្រ័យហេតុនេះ លោក ត្រាំ ទាមទារឲ្យកិច្ចព្រមព្រៀងដែលនឹងលេចជារូបរាង ត្រូវលំអៀងទៅខាងអាមេរិក។ និយាយឲ្យចំ គឺអាមេរិកត្រូវចំណេញជាងចិន។ ប្រធានាធិបតីអាមេរិករូបនេះបញ្ជាក់ថា៖ «វាត្រូវតែអាមេរិកល្អជាងចិន ព្រោះចិនកេងចំណេញច្រើនឆ្នាំមកហើយ។ ច្បាស់ណាស់ យើងមិនអាចធ្វើវាឲ្យទៅជា៥០ទល់៥០ឡើយ។ វាត្រូវតែជាកិច្ចព្រមព្រៀងដែលផ្ដល់ប្រយោជន៍ច្រើនឲ្យអាមេរិក។»
សម្រាប់កិច្ចព្រមព្រៀងនេះ លោក ត្រាំ ក៏បានដាក់លក្ខខណ្ឌដែរថា ដំណោះស្រាយចុងក្រោយ នឹងសម្រេចបាននៅពេលដែលការតថ្លៃរបស់ភាគីទាំងសងត្រូវរ៉ូវគ្នា។ ស្ថាភាពធូរស្រាលក្នុងជម្លោះពាណិជ្ជកម្មនៅរយៈពេលចុងក្រោយនេះ ធ្វើឲ្យទីផ្សារសាកលមានស្ថិរភាពមួយកម្រិត ហើយគេរំពឹងក៏ថា មហាអំណាចសេដ្ឋកិច្ចពិភពលោកទាំងពីរនេះ នឹងបញ្ចប់ជម្លោះឆាប់ៗនេះដើម្បីសេដ្ឋកិច្ចពិភពលោកវិលទៅរកប្រក្រតីឡើងវិញ៕
Tag:
អាមេរិក
ចិន
ដូណាល់ ត្រាំ
ស៊ី ជិនភីង
© រក្សាសិទ្ធិដោយ thmeythmey.com