សហភាពអឺរ៉ុបនឹងមានស្ត្រីដល់ទៅ២នាក់កាន់តំណែងកំពូលជាលើកដំបូងបំផុត

អន្តរជាតិ

សហភាពអឺរ៉ុបនឹងមានស្ត្រីដល់ទៅ២នាក់កាន់តំណែងកំពូលជាលើកដំបូងបំផុត

03, Jul 2019 , 10:38 am

រូបភាព

លោកស្រី គ្រីស្ទីន ឡាហ្កាដ បេក្ខភាពប្រធានធនាគារកណ្ដាលអឺរ៉ុប និងលោកស្រី អឺស៊ុឡា វ៉ុន ដឺ លៃអេន បេក្ខភាពប្រធានគណៈកម្មការអឺរ៉ុប។

ដោយ: តន ចាន់រិទ្ធារ៉ា

ក្រោយការជជែកតឹងសរសៃកបីថ្ងៃមក មេដឹកនាំប្រទេសសមាជិកសហភាពអឺរ៉ុប នៅថ្ងៃទី២ ខែកក្កដា បានឯកភាពលើកញ្ចប់បេក្ខភាពសម្រាប់ក្បាលម៉ាស៊ីនដឹកនាំអង្គការតំបន់ដ៏ធំមួយនេះ។ ជាលើកដំបូងក្នុងប្រវត្តិសាស្ត្រ ស្ត្រីចំនួនពីររូប ត្រូវបានតែងតាំងជាបេក្ខភាពតំណែងជាន់ខ្ពស់នៅសហភាពអឺរ៉ុប។ រដ្ឋមន្ត្រីការពារជាតិអាល្លឺម៉ង់ អឺស៊ុឡា វ៉ុន ដឺ លៃអេន (Ursula von der Leyen) ជាបេក្ខភាពប្រធានគណៈកម្មការអឺរ៉ុប ឯប្រធានមូលនិធិរូបិយវត្ថុអន្តរជាតិ គ្រីស្ទីន ឡាហ្កាដ (Christine Lagarde) នឹងជាបេក្ខភាពប្រធានធនាគារអឺរ៉ុប។

ទីបំផុតទៅ មេដឹកនាំសមាជិកសហភាពអឺរ៉ុប បានបំបែកភាពទាល់ច្រកក្នុងការកំណត់បេក្ខភាពសម្រាប់ក្បាលម៉ាស៊ីនសំខាន់ៗនៅស្ថាប័នកំពូលរបស់អឺរ៉ុប។ អ្វីគួរឲ្យចាប់អារម្មណ៍នោះ មេដឹកនាំទាំង២៨ប្រទេស បានឆ្លងការជជែកដ៏ខ្លាំងក្លា និងអូសបន្លាយតាំងពីចុងសប្ដាហ៍មុនទម្រាំរកបេក្ខភាពដែលទទួលបានការគាំទ្រជាឯកច្ឆន្ទ។ ជារឿងមិនធ្លាប់មានក្នុងរយៈពេលជាង៥០ឆ្នាំ សហភាពអឺរ៉ុបនឹងមានមេដឹកនាំជាស្ត្រី។

ប្រមុខការពារជាតិអាល្លឺម៉ង់លោកស្រី អឺស៊ុឡា វ៉ុន ដឺ លៃអេន ត្រូវបានតែងតាំងជាបេក្ខភាពប្រធានគណៈកម្មការអឺរ៉ុបជំនួសលោក ហ្សង់-ក្លូដ ចាំងគើ (Jean-Claude Juncker) សម្រាប់អាណត្តិប្រាំឆ្នាំ។ ប្រសិនទទួលការយល់ព្រមពីសភាអឺរ៉ុប លោកស្រី អឺស៊ុឡា នឹងក្លាយជាជនជាតិអាល្លឺម៉ង់ទីមួយក្នុងរយៈពេលច្រើនជាងប្រាំទសវត្សរ៍ដែលកាន់តំណែងខ្ពស់បែបនេះនៅអឺរ៉ុប។ ការងារសំខាន់ៗរួមមានបម្រែបម្រួលអាកាសធាតុ ការសាយភាយចលនាស្ដាំនិយមជ្រុលនៅអឺរ៉ុប និងការចាកចេញរបស់អង់គ្លេសជាដើម។

ឈ្មោះរបស់លោកស្រី អឺស៊ុឡា បានលេចឡើងក្នុងបញ្ជីបេក្ខភាព បន្ទាប់ពីសំណើតែងតាំងបេក្ខភាពមកហូឡង់ ហ្វ្រេន ធីមមើមែន (Frans Timmermans) រងការជំទាស់ខ្លាំងពេក។ ស្ត្រីម្នាក់ទៀតដែលនឹងកាន់តំណែងសំខាន់នៅអឺរ៉ុបដែរនោះ គឺលោកស្រី គ្រីស្ទីន ឡាហ្កាដ ដែលព្យួរតំណែងប្រធានមូលនិធិរូបិយវត្ថុអន្តរជាតិ (IMF) ដើម្បីដឹកនាំធនាគាកណ្ដាលអឺរ៉ុប។ អតីតរដ្ឋមន្ត្រីហិរញ្ញវត្ថុបារាំងរូបនេះ នឹងត្រូវដោះស្រាយបញ្ហាធ្លាក់ចុះសេដ្ឋកិច្ចក្នុងប្លុកមួយនេះ។

ក្នុងកញ្ចប់ក្បាលម៉ាស៊ីនថ្មីដែលមេដឹកនាំអឺរ៉ុបយល់ព្រមនេះដែរ នាយករដ្ឋមន្ត្រីបែលហ្ស៊ិក ឆាល មីឈែល (Charles Michel) នឹងក្លាយជាប្រធានក្រុមប្រឹក្សាអឺរ៉ុបជំនួសលោក ដូណាល់ ទូស (Donald Tusk) ខណៈរដ្ឋមន្ត្រីការបរទេសអេស្ប៉ាញ ចូសេព បូរ៉េល (Josep Borrell) ក្លាយជាស្នងការទទួលបន្ទុកកិច្ចការបរទេស និងសន្តិសុខជំនួសលោកស្រី ហ្វែដឺរីកា ម៉ូហ្គេរីនី (Federica Mogherini) ។ សំណុំរឿងនុយក្លេអ៊ែរអ៊ីរ៉ង់ និងភាពតានតឹងនៅឈូងសមុទ្រ កំពុងរង់ចាំលោក ចូសេព ។

ដូចលោកស្រី អឺស៊ុឡា ដែរ លោក បូរ៉េល ត្រូវបានការយល់ព្រមពីសភាអឺរ៉ុបជាមុនសិន។ ភ្លាមៗក្រោយការបញ្ចេញកញ្ចប់បេក្ខភាពនេះ គេឃើញមានការមិនពេញចិត្តបានលេចឡើង ពិសេសក្នុងចំណោមអ្នកគាំទ្រលោក ធីមមើមែន ។ ប៉ុន្តែលោក ចាំងគើ ដែលត្រូវចាកចេញអះអាងថា សមាសភាពថ្មីនេះ ជាជម្រើសល្អហើយ។ ចំពោះអ្នកស្នងតំណែងរបស់ខ្លួន លោក ចាំងគើ និយាយថា លោកស្រី លៃអេន សម្បូរបទពិសោធផ្នែកការពារជាតិ និងសង្គម ហើយជឿថា សភាក៏នឹងយល់ព្រមដែរ៕