ជាថ្មីម្ដងទៀត ចិន បានព្រមានអាមេរិក និងអង់គ្លេសដែលបានគាំទ្រការធ្វើបាតុកម្មប្រឆាំងសំណើច្បាប់ធ្វើបត្យាប័ន ខណៈបាតុកម្មបានប្រែទៅហិង្សានៅយប់ថ្ងៃទី១ ខែកក្កដា ដោយក្រុមបាតុករបានសម្រុកចូលលុកលុយអាគារសភាហុងកុងតែម្ដង។ ចិនប្រាប់ឲ្យប្រទេសទាំងពីរបញ្ឈប់ការជ្រៀតជ្រែកចូលកិច្ចការផ្ទៃក្នុងហុងកុង ព្រោះវាជារឿងផ្ទៃក្នុងរបស់ចិនដែរ ហើយត្រូវឈប់គាំទ្រសកម្មភាពរំលោភបំពានច្បាប់ទៀត។
ការអធិប្បាយរបស់អាមេរិក និងអង់គ្លេសជុំវិញការបាតុកម្មថ្មីៗនេះនៅទីក្រុងរដ្ឋបាលពិសេសហុងកុង ធ្វើឲ្យចិនមិនសប្បាយចិត្តយ៉ាងខ្លាំង។ ចិនចាត់ទុកសកម្មភាពទាំងនេះ ជារឿងមិនអាចទទួលបានឡើយ ហើយជាការលូកលាន់កិច្ចការផ្ទៃក្នុងចិនជាចំហទៀតផង។
ជារឿងមិនធ្លាប់មាន បាតុករហុងកុងវ័យក្មេង បានចូលអុកឡុកអាគារសភាទីក្រុងនេះ និងបានបំផ្លាញទ្រព្យសម្បត្តិជាច្រើន ខណៈប៉ូលិសបានដកចេញ ហើយបណ្ដោយបាតុករធ្វើតាមចិត្តពួកគេ។ ប្រធានាធិបតីអាមេរិក ដូណាល់ ត្រាំ ដែលទើបជួបសមភាគីចិន ស៊ី ជិនភីង នៅជប៉ុននោះ និយាយថា ក្រុមបាតុករចង់បានប្រជាធិបតេយ្យ តែរដ្ឋាភិបាលខ្លះមិនចង់បានឡើយ។ អង់គ្លេសដែលជាអតីតម្ចាស់អាណានិគមហុងកុង ប្រើសម្ដីខ្លាំងជាងអាមេរិក។
អាគារសសភាហុងកុងដែលរងការបំផ្លាញដោយបាតុកម្មថ្ងៃទី១ ខែកក្កដា។ រូបភាព AFP
ប្រមុខការទូតអង់គ្លេស ជេរេមី ហាន់ បានសរសេរតាម Twitter ថា អង់គ្លេសបន្តគាំទ្រហុងកុង និងសេរីភាពក្នុងទីក្រុងនេះដោយឥតងាករេ ហើយការតវ៉ាដោយសន្តិវិធីត្រូវតែធានាឲ្យបានដូចដែលបាតុករបានបង្ហាញនៅថ្ងៃទី១ ខែកក្កដា។ ជាមួយគ្នានោះ លោក ហាន់ ក៏ថ្លែងពីយុទ្ធនាការប្រជែងតំណែងនាយករដ្ឋមន្ត្រីទៀតថា ចិននឹងប្រឈមមុខផលវិបាកធ្ងន់ធ្ងរ បើមិនអនុវត្តតាមសេចក្ដីថ្លែងការណ៍រួមឆ្នាំ១៩៨៤ ដែលតម្រូវឲ្យចិនធានាពីសិទ្ធិ និងសេរីភាពរបស់ហុងកុងនោះ។
ឆ្លើយតបការលើកឡើងខាងលើនេះ ប៉េកាំងបានប្រើពាក្យមួយឃ្លាដូចគ្នា គឺទាំងអាមេរិក ទាំងអង់គ្លេស ត្រូវឈប់កកូរកកាយផ្ទៃក្នុងចិន។ ក្នុងសន្និសីទសារព័ត៌មានថ្ងៃទី២ ខែកក្កដា លោក Geng Shuang អ្នកនាំពាក្យក្រសួងការបរទេសចិន និយាយថា ហុងកុងជាតំបន់រដ្ឋបាលពិសេសរបស់ចិន ហើយកិច្ចការហុងកុង ជារឿងផ្ទៃក្នុងរបស់ចិនសុទ្ធសាធ។ ចិន សូមប្រឆាំងដាច់ខាតទង្វើប្រទេសខ្លះដែលលូកដៃចូលបញ្ហានៅហុងកុង។
អំឡុងសន្និសីទសារព័ត៌មានដដែល អ្នកកាសែតក៏សួរពីជំហររបស់ប៉េកាំងជុំវិញជំហររបស់វ៉ាស៊ីនតោន និងឡុងដ៍ដែលថា ប្រជាជនហុងកុងមានសិទ្ធិធ្វើបាតុកម្មសន្តិវិធី តែអំពើហិង្សាត្រូវតែចៀសដាច់ខាត។ អ្នកនាំពាក្យដដែលនេះ ក៏សួរវិញ៖ «ប្រសិនបើមានករណីអុកឡុកអាគារសភាកើតឡើងនៅអាមេរិក ឬអឺរ៉ុប តែមិនមែនហុងកុងនោះ តើបាតុករនឹងត្រូវដោះស្រាយតាមផ្លូវណា?» លោកបន្តថា ដូចធ្លាប់ឃើញតាមទូរទស្សន៍ពីរបៀបដែលប៉ូលិសអាមេរិក និងអឺរ៉ុបចាត់ការបាតុករនោះ។
ត្រង់ចំណុចនេះ មន្ត្រីក្រសួងការបរទេសចិនដដែល ក៏រិះគន់ប្រទេសទាំងនេះ និងចោទថា អនុវត្តស្តង់ដាពីរជាន់។ លោកបន្ថែមថា ពេលហិង្សាកើតនៅហុងកុង ប្រទេសទាំងនោះ មិនបានថ្កោលទោសឡើយ តែមកបង្ហាត់បង្រៀនចិនពីសិទ្ធិតវ៉ាដោយសន្តិភាព និងអហិង្សាទៅវិញ ហើយចាត់ទុកខ្លួនឯងជាអ្នករិះគន់មិនលំអៀង៕