ជាតិ
នយោបាយជាតិ
រដ្ឋមន្ត្រីយុត្តិធម៌ ឆ្លើយបំភ្លឺជុំវិញការអនុវត្តការងារ នៅចំពោះមុខរដ្ឋសភា
×![]()
ដោយ: ធឿន បញ្ញាឬទិ្ធ
ភ្នំពេញ៖ ដូចការគ្រោងទុក រដ្ឋសភាជាតិកម្ពុជា បានបើកកិច្ចប្រជុំពេញអង្គ ដើម្បីសួរនាំរដ្ឋមន្ត្រីក្រសួងយុត្តិធម៌ លោក អង្គ វង្ស វឌ្ឍនា ជុំវិញការអនុវត្តការងាររបស់ក្រសួងកន្លងមក នៅព្រឹកថ្ងៃទី៤ កក្កដានេះ។ 
ផ្ដើមឃ្លាដំបូងលោក អង្គ វង្ស វឌ្ឍនា បានលើកយកពីគម្រោងរបស់ក្រសួង ដែលគ្រោងរៀបចំសាលាដំបូង និងសាលាឧទ្ធរណ៍ នៅតាមបណ្ដាលខេត្តមួយចំនួនទៀត ដែលក្នុងនោះរួមមានខេត្តកែប កំពត ត្បូងឃ្មុំជាដើម។ ងាកចេញពីគម្រោងសាងសង់អង្គភាពយុត្តិធម៌នៅតាមបណ្ដាខេត្តនេះ លោក វឌ្ឍនា បានលើកយកពីការដោះស្រាយបញ្ហាវិវាទដីធ្លី និងបញ្ហាផ្សេងទៀត ប្រាប់ទៅស្ថាប័ននីតិប្បញ្ញត្តិជាន់ទាប។ ដោយក្នុងនោះរដ្ឋមន្ត្រីក្រសួង អះអាងថា ក្រសួងបានដោះស្រាយបញ្ហាដីធ្លី បានចំនួន ២,៧៥៣ ករណី និងផ្ដល់សេវាផ្នែកច្បាប់ជាង ១,៥០០ ករណី នៅឆ្នាំ២០១៨កន្លងមក។ ចំណែកនៅរយៈពេល៦ខែ ឆ្នាំ២០១៩នេះ ក្រសួងបានដោះស្រាយវិវាទដីធ្លី ជូនពលរដ្ឋ ២,០១០ ករណី និងផ្ដល់សេវាផ្នែកច្បាប់ ១,០៩០ ករណី។
បន្ថែមពីនេះ លោក វឌ្ឍនា បានអះអាងថា ខាងគណៈមេធាវី ក៏បានជួយផ្ដល់សេវាផ្នែកច្បាប់ ដល់ជនក្រីក្រដោយឥតគិតថ្លៃ ជាង៣០០ ករណី ក្នុងមួយឆ្នាំៗ ស្របពេលដែលរដ្ឋាភិបាល បានបង្កើតក្រុមមេធាវីស្ម័គ្រចិត្តជូនពលរដ្ឋក្រីក្រ នៅឆ្នាំ២០១៩នេះ។
នៅមានកាតព្វកិច្ច និងនីតិវិធីដោះស្រាយបញ្ហាផ្សេងៗទៀត ដែលរដ្ឋមន្ត្រីក្រសួងយុត្តិធម៌ កំពុងរៀបរាប់ប្រាប់រដ្ឋសភា។
មាត្រា៩៦ នៃរដ្ឋធម្មនុញ្ញ ចែងថា តំណាងរាស្ត្រមានសិទ្ធិដាក់សំណួរដល់រាជរដ្ឋាភិបាល ហើយចម្លើយអាចធ្វើឡើងដោយរដ្ឋមន្ត្រីមួយរូប ឬច្រើនរូប អាស្រ័យដោយបញ្ហាដែលបានចោទឡើង។ បើបញ្ហាពាក់ព័ន្ធដល់នយោបាយទូទៅរបស់រាជរដ្ឋាភិបាល នាយករដ្ឋមន្ត្រី ត្រូវឆ្លើយផ្ទាល់ខ្លួន។ មាត្រានេះ អនុញ្ញាតឲ្យរដ្ឋមន្ត្រី ឬនាយករដ្ឋមន្ត្រី ឆ្លើយផ្ទាល់មាត់ក៏បាន ឆ្លើយជាលាយលក្ខណ៍អក្សរក៏បាន៕
Tag:
អង្គ វង្ស វឌ្ឍនា
យុត្តិធម៌
© រក្សាសិទ្ធិដោយ thmeythmey.com
