អន្តរជាតិ
យោធាស៊ូដង់ និងបាតុករព្រមព្រៀងចែកអំណាចគ្នាបីឆ្នាំ ដើម្បីបញ្ចប់វិបត្តិនយោបាយ
ការចរចារវាងយោធាស៊ូដង់ និងមេដឹកនាំបាតុករ។ រូបភាព AFP
×![]()
ដោយ: តន ចាន់រិទ្ធារ៉ា
វិបត្តិនយោបាយនៅស៊ូដង់ ដើរដល់ទីបញ្ចប់ហើយបន្ទាប់ពីក្រុមយោធាកាន់អំណាច និងមេដឹកនាំបាតុករយល់ព្រមលើកិច្ចព្រមព្រៀងចែករំលែកអំណាចមួយនៅថ្ងៃទី៥ ខែកក្កដានេះ។ ក្រោមការសម្រុះសម្រួលរបស់សហភាពអាហ្វ្រិក និងអេត្យូពី យោធាស៊ូដង់ និងបាតុករឯកភាពគ្នាបង្កើតក្រុមប្រឹក្សាមួយដើម្បីដឹកនាំប្រទេសរយៈពេលបីឆ្នាំដោយឆ្លាស់វេនគ្នាធ្វើជាប្រធាន។ ជាព័ត៌មានដែលប្រជាជនស៊ូដង់សាទរយ៉ាងខ្លាំង ប៉ុន្តែវាកើតចេញក្រោយការបង្ក្រាបយ៉ាងហិង្សាលើបាតុករផងដែរ។
យោធាស៊ូដង់កំពុងកាន់អំណាច និងមេដឹកនាំបាតុករ បានរកឃើញដំណោះស្រាយលើការបង្កើតក្រុមប្រឹក្សាមួយដើម្បីដឹកនាំប្រទេស និងបញ្ចប់វិបត្តិនយោបាយដែលអូសបន្លាយក្រោយការផ្ដួលរំលំមេដឹកនាំផ្ដាច់ការ អូម៉ា អាល់-បាសៀ កាលពីខែមេសាមក។ ការអបអរបានផ្ទុះឡើងនៅតាមដងផ្លូវក្នុងរដ្ឋធានីខាទុំ ដែលកន្លងមកជាទីដែលបាតុករប្រមូលផ្ដុំគ្នាតវ៉ានឹងការកាន់អំណាចរបស់យោធាដែលទម្លាក់លោក អាល់-បាសៀ ចេញពីអំណាចនោះ។
សហភាពអាហ្វ្រិក និងអេត្យូពី គឺជាអ្នកដើរតួសម្របសម្រួលរវាងភាគីទាំងពីរនេះ។ អ្នកចរចារបស់សហភាពអាហ្វ្រិក Mohamed El Hacen Lebatt បានប្រកាសនៅថ្ងៃទី៥ ខែកក្កដា ថា យោធាស៊ូដង់ និងថ្នាក់ដឹកនាំបាតុករ បានយល់ព្រមបង្កើតក្រុមប្រឹក្សាមួយដោយយោធា និងស៊ីវិលដាក់វេនគ្នាធ្វើជាប្រធានសម្រាប់រយៈពេលបីឆ្នាំឬយូរជាងនេះបន្តិច។ នេះបើតាមការផ្សាយរបស់ទីភ្នាក់ងារព័ត៌មាន AFP ។ យោធា និងក្រុមស៊ីវិលក៏នឹងបង្កើតស្ថាប័នមួយស៊ើបអង្កេតការបង្ក្រាបហិង្សាផងដែរ។
ឧត្តមសេនីយ៍ Mohamed Hamdan Dagalo អនុប្រធានក្រុមប្រឹក្សាយោធាស៊ូដង់ដ៏មានអំណាច បញ្ជាក់ថា កិច្ចព្រមព្រៀងនេះ រួមបញ្ចូលគ្រប់ភាគីពាក់ព័ន្ធទាំងអស់ ដោយមិនបោះបង់អ្នកណាចោលឡើយ។ យ៉ាងណាមិញ អ្វីដែលគេរង់ចាំមើលនោះ គឺសមាសភាពក្រុមប្រឹក្សាថ្មីដែលត្រូវដឹកនាំប្រទេស។ មេដឹកនាំបាតុករម្នាក់ប្រាប់ AFP ថា ក្រុមប្រឹក្សានេះនឹងមានតំណាងស្មើគ្នាដោយចលនាស៊ីវិលមាន៥នាក់ និងយោធា៥នាក់។
ការចរចារវាងយោធាស៊ូដង់ និងក្រុមបាតុករ ចាប់ផ្ដើមជាថ្មីនៅថ្ងៃទី៣ ខែកក្កដា បន្ទាប់ពីជាប់គាំងជាច្រើនសប្ដាហ៍រហូតដល់មានការបង្ក្រាបបាតុករដែលសម្លាប់មនុស្សប្រមាណ១០០នាក់ឯណោះ។ ក្រោមកិច្ចព្រមព្រៀងដែលសម្រេចបាន ក្រុមយោធានឹងកាន់តំណែងប្រធានរយៈពេល១៨ខែដំបូង ឯក្រុមស៊ីវិលដឹកនាំ១៨ខែបន្ទាប់។ ប៉ុន្តែគេមិនទាន់ច្បាស់ថា បាតុករយល់ព្រមឲ្យយោធាកាន់តំណែងមុនឬយ៉ាងណាឡើយ។
ទោះត្រូវគ្នារឿងបង្កើតក្រុមប្រឹក្សាដែលកាន់អំណាចនីតិប្រតិបត្តិ យោធាស៊ូដង់ និងមេដឹកនាំបាតុករ ហាក់មិនទាន់មូលមតិគ្នារឿងអំណាចនីតិបញ្ញត្តិនៅឡើយទេ។ លោក Lebatt បានប្រាប់អ្នកសារព័ត៌មានថា ភាគីទាំងពីរបានយល់ព្រមពន្យារពេលបង្កើតសភាអន្តរកាលបណ្ដោះអាសន្នសិន។ មុនការដួលរំលំការចរចាក្នុងខែឧសភា យោធា និងស៊ីវិលបានឯកភាពបង្កើតសភាដែលមានសមាជិក៣០០នាក់ ហើយពីរភាគបីជាស៊ីវិល៕
Tag:
ស៊ូដង់
អេត្យូពី
អាហ្វ្រិក
© រក្សាសិទ្ធិដោយ thmeythmey.com
