ជាតិ
នាយករដ្ឋមន្ត្រី៖« ភ្នំពេញសព្វថ្ងៃ បញ្ហាធំពីរសំខាន់ ខ្វះចំណតរថយន្ត និងសំរាម»
× ភ្នំពេញ៖ ប្រមុខរដ្ឋាភិបាល សម្ដេច ហ៊ុន សែន លើកឡើងថា រាជធានីភ្នំពេញនាពេលបច្ចុប្បន្នប្រឈមបញ្ហាសំខាន់ពីរ គឺកង្វះចំណតរថយន្ត និងបញ្ហាសំរាម។ ក្នុងឱកាសជួបសំណេះសំណាលពលរដ្ឋខ្មែរនៅប្រទេសស្វីស នៅថ្ងៃទី៤ខែកក្កដា សម្ដេច ហ៊ុន សែន បានថ្លែងដូច្នេះថា៖«បើនិយាយពីភ្នំពេញបច្ចុប្បន្នវិញ បញ្ហាធំពីរសំខាន់ ទី១ ខ្វះចំណតរថយន្ត ទី២ សំរាម មួយថ្ងៃ៣ពាន់តោនដល់សម្បូរស៊ីពេក»។
ប្រសាសន៍សម្ដេច ហ៊ុន សែន ៖
សម្ដេចបានណែនាំឲ្យរដ្ឋមន្ត្រីក្រសួងរៀបចំដែនដី និងអភិបាលរាជធានីភ្នំពេញ ពិនិត្យបង្កើតចំណតរថយន្តបន្ថែម ពិសេសចំណតក្រោមដី ដើម្បីបញ្ចៀសការប្រើចិញ្ចើមផ្លូវសម្រាប់ចំណតយានយន្ត។
សម្ដេចនាយករដ្ឋមន្ត្រី អះអាងថា នៅក្នុងក្រុងភ្នំពេញសព្វថ្ងៃ បើមធ្យោបាយធ្វើដំណើរចំនួន៥០ភាគរយនៃចំនួនសរុប ចេញនៅលើដងផ្លូវព្រមគ្នា នោះនឹងគាំងស្ទះភ្នំពេញមិនខាន។
ក្នុងរយៈពេលប៉ុន្មានឆ្នាំចុងក្រោយនេះ គម្រោងចំណតសាធារណៈក្រោមដី បានលេចចេញឡើង ដោយសព្វថ្ងៃនេះមានគម្រោងស្ថិតក្រោមការសាងសង់ និងគម្រោងដាក់ឲ្យដំណើរការ ខ្លះមកដែរ។ គម្រោងទាំងនោះមានដូចជា ចំណតក្រោមដីនៅចន្លោះអគារវឌ្ឍនៈ និងអគារកាណាឌីយ៉ា ចំណតមុខស្ថានទូតអាមេរិក និងចំណតក្រោមដីដែលត្រូវបានអនុញ្ញាតឲ្យសាងសង់នៅក្បែរផ្សាររាត្រី។ គួរបញ្ជាក់ថា នៅរាជធានីបច្ចុប្បន្ននេះ រថយន្តមានចំនួនប្រមាណ កន្លះលានគ្រឿង និងម៉ូតូ ១លាន៧០ម៉ឺន៕
Tag:
សំរាម
ចំណតរថយន្ត
ហ៊ុន សែន
© រក្សាសិទ្ធិដោយ thmeythmey.com