អន្តរជាតិ
ប្រមុខការទូតអង់គ្លេស ព្រមានដាក់ទណ្ឌកម្មលើចិនជុំវិញបាតុកម្មនៅហុងកុង រដ្ឋមន្រ្តីការបរទេសអង់គ្លេស Jeremy Hunt ។ រូបភាព AFP
× សង្គ្រាមពាក្យសម្ដីរវាងចិននិងអង់គ្លេស កំពុងពុះកញ្ជ្រោលខ្លាំងឡើងមិនថមថយជុំវិញបាតុកម្មនៅហុងកុង។ ទីក្រុងឡុងដ៍ មិនបានស្ដាប់សម្ដីព្រមានម្ដងហើយឲ្យម្ដងទៀតរបស់ប៉េកាំងដែលប្រាប់ឲ្យឈប់លូកលាន់កិច្ចការផ្ទៃក្នុងខ្លួនឡើយ។ ប្រមុខការទូតអង់គ្លេស ជេរេមី ហាន់ នៅថ្ងៃទី៤ ខែកក្កដា បានប្រាប់ចិនជាថ្មីពីផលវិបាកធ្ងន់ធ្ងរ ឬក៏ទណ្ឌកម្ម បើស្ថានការណ៍នៅហុងកុងមិនល្អប្រសើរ ហើយសិទ្ធិសេរីភាពប្រជាជននៅតែរងគំនាបនោះ។
ការឆ្លើយឆ្លងពាក្យសម្ដីរវាងប៉េកាំង និងឡុងដ៍នាពេលប៉ុន្មានថ្ងៃមកនេះលើបញ្ហាហុងកុង ស្ថិតត្រឹមការព្រមានគ្នាទៅវិញទៅមក និងការកោះហៅអគ្គរដ្ឋទូតចិនប្រចាំក្រុងឡុងដ៍ទៅសួរនាំប៉ុណ្ណោះ។ ចិនមិនពេញចិត្តឡើយចំពោះការអធិប្បាយមិនឈប់ឈររបសអង់គ្លេសទៅលើការធ្វើបាតុកម្មតវ៉ានៅឯហុងកុង ហើយប្រាប់ឲ្យអង់គ្លេសដោះដៃចេញពីទីក្រុងទៀតផង ព្រោះសព្វថ្ងៃហុងកុងជាកម្មសិទ្ធិចិន មិនមែនអាណានិគមអង់គ្លេសទៀតឡើយ។
យ៉ាងណាមិញ សម្ដីរបស់ចិនមិនចូលត្រចៀកអង់គ្លេសឡើយ។ នៅថ្ងៃទី៤ ខែកក្កដា រដ្ឋមន្ត្រីការបរទេសអង់គ្លេស ជេរេមី ហាន់ បន្តវាយប្រហារចិន និងព្រមានមហាអំណាចអាស៊ីមួយនេះពីផលវិបាកទៀតផង ប្រសិនចិនហ៊ានបំពានការប្ដេជ្ញាចិត្តខ្លួនជុំវិញការរក្សាសិទ្ធិសេរីភាពប្រជាជនពេលទទួលយកហុងកុងពីអង់គ្លេសនោះ។ កាន់តែធ្ងន់នោះ លោក ហាន់ បញ្ជាក់ថា អង់គ្លេសបើកចំហដល់ការដាក់ទណ្ឌកម្មលើចិនផង។
ក្នុងកម្មវិធីមួយរបស់ទូរទស្សន៍ BBC លោក ហាន់ សង្កត់ធ្ងន់ថា អង់គ្លេសចាតទុករឿងហុងកុងនេះ ជាបញ្ហាសំខាន់ ហើយអង់គ្លេស ក៏មិននៅស្ងៀមដែរ បើបង្ក្រាបបាតុកម្មនៅហុងកុង។ យ៉ាងណាក៏ដោយ ប្រមុខការទូតអង់គ្លេសរូបនេះបញ្ជាក់ថា លោកថ្កោលទោសសកម្មភាពរបស់បាតុករដែលឈានដល់ការលុកលុយអាគារសភាហុងកុងផង ប៉ុន្តែក៏ឆ្លៀតព្រមានដែរថា ចិនមិនត្រូវឆ្លើយតបនឹងបាតុកម្មនេះដោយការរឹតត្បិតឡើយ។
សូមបញ្ជាក់ថា អង់គ្លេសធ្លាប់គ្រប់គ្រងហុងកុងច្រើនជាង១៥០ឆ្នាំមុនប្រគល់ឲ្យចិននៅឆ្នាំ១៩៩៧ ។ កាលពីឆ្នាំ១៩៨៤ អង់គ្លេស និងចិនបានចុះហត្ថលេខាមួយដែលបានធានាស្វ័យភាពសេដ្ឋកិច្ច និងសេរីភាពរបស់ប្រជាជនហុងកុងដែលជនជាតិចិនមិនធ្លាប់ទទួលបាន។ លោក ហាន់ ប្រាប់ឲ្យចិនអនុវត្តតាមកិច្ចព្រមព្រៀងនេះឲ្យម៉ត់ចត់ និងធានាថា សេរីភាពប្រមូលផ្ដុំរបស់ពលរដ្ឋហុងកុង ត្រូវបានធានាឲ្យបានដាច់ខាត។
ក្រោមរូបមន្ត «ប្រទេសមួយ ប្រព័ន្ធពីរ» ហុងកុង ជាទឹកដីចិនដែលការប្រមូលផ្ដុំតវ៉ាអាចធ្វើឡើងដោយស្រួល។ ប៉ុន្តែការធ្វើបាតុកម្មចុងក្រោយ ធ្វើឡើងដោយហិង្សា ខណៈបាតុករវ័យក្មេងសម្រុកចូលអាគារសភា ហើយបំផ្លាញទ្រព្យសម្បត្តិជាច្រើន។ នេះជាមូលហេតុដែលចិនមិនសប្បាយចិត្តនឹងអង់គ្លេស ព្រោះអង់គ្លេសមិនបានថ្កោលទោសខ្លាំងក្លាចំពោះទង្វើបែបនេះឡើយ តែបែរជាព្រមានចិនមិនឲ្យបង្ក្រាបទៅវិញ៕
Tag:
អង់គ្លេស
ចិន
ហុងកុង
Jeremy Hunt
© រក្សាសិទ្ធិដោយ thmeythmey.com