រដ្ឋមន្ត្រីមហាផ្ទៃ ហាមដាច់ខាតមិនឲ្យយកកងកម្លាំងទៅបម្រើក្រុមហ៊ុនឯកជន និង បុគ្គល

ជាតិ

សង្គមជាតិ

រដ្ឋមន្ត្រីមហាផ្ទៃ ហាមដាច់ខាតមិនឲ្យយកកងកម្លាំងទៅបម្រើក្រុមហ៊ុនឯកជន និង បុគ្គល

06, Jul 2019 , 9:59 am

រូបភាព

ដោយ: ថ្មីៗ

សម្តេច ស ខេង រដ្ឋមន្ត្រីមហាផ្ទៃ បានហាមគ្រប់អង្គភាពថា ដាច់ខាតមិនត្រូវឆ្លៀតយកកងកម្លាំងទៅបម្រើការងារតាមក្រុមហ៊ុន រោងចក្រ សហគ្រាស ឬជាលក្ខណៈបុគ្គលឯកជន ដោយគ្មានការអនុញ្ញាតពីថ្នាក់ដឹកនាំឡើយ។ សម្តេច ស ខេង ដាក់បម្រាមនេះ តាមរយៈសេចក្តីណែនាំថ្មីមួយ ស្តីពីការគ្រប់គ្រងមន្ត្រីនគរបាលជាតិ និងការគ្រប់គ្រងអាវុធ ដែលចេញនៅថ្ងៃទី៥ ខែកក្កដា ឆ្នាំ២០១៩។

បើតាមសេចក្តីណែនាំ សម្តេចរដ្ឋមន្ត្រី ក៏បានហាមមិនឲ្យយកកងកម្លាំងទៅប្រចាំការ ឬការពារនៅកន្លែងកម្សាន្តផ្សេងៗផងដែរ ដូចជា ក្លិប ខារ៉ាអូខេ និង កាស៊ីណូ ជាដើម។ លើសពីនេះ សម្តេច បានណែនាំគ្រប់អង្គភាព ឲ្យគ្រប់គ្រងនិងប្រើប្រាស់អាវុធ ឲ្យបានត្រឹមត្រូវ តាមសេចក្តីកំណត់របស់អគ្គស្នងការដ្ឋាននគរបាលជាតិ និងច្បាប់ស្តីពីការគ្រប់គ្រងអាវុធ។

ម្យ៉ាងទៀត រដ្ឋមន្ត្រីមហាផ្ទៃ នៅហាមគ្រប់អង្គភាពមិនឲ្យយកម៉ូតូបើកផ្លូវ និងរថយន្តសារ៉ែនរបស់អង្គភាព ទៅបើកការពារ ឬហែអមក្រុមហ៊ុនឯកជន និងបុគ្គលណាឡើយ។ រដ្ឋមន្ត្រីរូបនេះ ដាស់តឿនដូច្នេះថា៖«ប្រធានអង្គភាពគ្រប់ឋានានុក្រម មានកាតព្វកិច្ចទទួលខុសត្រូវក្នុងការអនុវត្តខ្លឹមសារនៃសេចក្តីណែនាំនេះ ក្នុងករណីប្រព្រឹត្តផ្ទុយ ត្រូវទទួលខុសត្រូវទាំងស្រុងចំពោះមុខក្រសួងមហាផ្ទៃ និងច្បាប់»៕