កីឡាជាតិ
ជាតិ
ក្របខណ្ឌកំពូល ចាប់ផ្តើមជំនួបជើងទីពីរនៅរសៀលនេះ ដោយមានបីគូ កំពង់ចាមបានយកឈ្នះអគ្គិសនីកម្ពុជា ១-០ កាលពីជើងទីមួយ ដែលជាជ័យជម្នះតែមួយលើកគត់របស់ក្រុមខេត្តមួយនេះ។
× ការប្រកួតក្របខណ្ឌមិត្តហ្វូនខេមបូឌានលីគបានឈានដល់ការប្រកួតជើងទី២ ដោយនៅថ្ងៃសៅរ៍ ទី៦ កក្កដានេះ មានការប្រកួតចំនួន៣គូនៅទីលានផ្សេងៗគ្នា។ ក្នុងចំណោមការប្រកួតទាំង៣ ការប៉ះគ្នារវាងក្រុមអង្គរថាយហ្គឺរជាមួយក្រសួងការពារជាតិ(ទ័ព)នៅលើទឹកដីខេត្តសៀមរាប ត្រូវបានគេរំពឹងថា ជាការប្រកួតដ៏ទាក់ទាញ និងស្វិតស្វាញបំផុត។
ក្រុមឈរលេខរៀងទី៣បណ្តោះអាសន្នក្នុងជើងទី១ អង្គរថាយហ្គឺរ ត្រូវបើកទ្វារកីឡដ្ឋានខេត្តសៀមរាបស្វាគមន៍ភ្ញៀវក្រសួងការពារជាតិ សម្រាប់ជំនួបជើងទី២ពានរង្វាន់ក្របខណ្ឌមិត្តហ្វូនខេមបូឌានលីគ វេលាម៉ោង៣:៣០នាទីរសៀលថ្ងៃទី៦ ខែកក្កដានេះ។ ការប៉ះគ្នារវាងក្រុមទាំងពីរ ត្រូវបានគេរំពឹងថា នឹងក្លាយជាការប្រកួតដ៏ស្វិតស្វាញ និងមានការទាក់ទាញបំផុត ព្រោះក្រុមទាំងពីរសុទ្ធតែការឈ្នះរៀងៗខ្លួន ដើម្បីបន្តក្តីសង្ឃឹមក្នុងការប្រជែងដណ្តើមកំពូលតារាង។
លើសពីនេះ វាក៏ជាការប្រកួតដើម្បីតេស្តសមត្ថភាពកីឡាករចំណូលរបស់ពួកគេ ដែលទើបនាំចូលកាលពីពេលថ្មីៗ។ អង្គរថាយហ្គឺរ បាននាំចូលខ្សែបម្រើអេស្ប៉ាញ Fernando Cozar Torres ដែលជោគជាំដោយបទពិសោធលេងបាល់ទាត់នៅលើទឹកដីអេស្ប៉ាញ និងហ្វាំងឡង់ ខណៈក្រសួងការពារជាតិបាននាំចូលកីឡាករ Na Hyosung និង Khan Mohammed Faeez។
នាជំនួបជើងទី១នៅកីឡដ្ឋានស្តាតចាស់ក្រុមទាំងពីរបានបញ្ចប់ក្នុងលទ្ធផលស្មើ ១-១។ ដូច្នេះសម្រាប់ការប្រកួតជើងទី២ អង្គរថាយហ្គឺរទំនងអាចមានប្រៀបជាងទ័ព ព្រោះការប្រកួតធ្វើឡើងនៅលើទឹកដីពួកគេ ដែលល្បីថា ជាក្រុមខ្លាំងនៅក្នុងដី។
នៅម៉ោង៣:៣០នាទីរសៀលថ្ងៃទីសៅរ៍នេះដែរ ក៏មានការប្រកួតពីរគូទៀតផងដែរ ក្នុងនោះក្រុមបាតតារាងកំពង់ចាមប្រើប្រាស់កីឡដ្ឋានស្តាតចាស់ស្វាគមន៍អគ្គិសនីកម្ពុជា។ នាជំនួបជើងទី១នៅលើទឹកដីអគ្គិសនីកម្ពុជា កំពង់ចាមបានយកឈ្នះក្នុងលទ្ធផល ១-០ ដែលជាជ័យជម្នះលើកដំបូងរបស់ពួកគេក្នុងរដូវកាលនេះ។ ក្រោយទទួលបានលទ្ធផលមិនសូវល្អក្នុងជើងទី១ក្រុមចំណូលថ្មីមកពីខេត្តកំពង់ចាម ទើបនាំចូលកីឡាករ៣រូបផងដែរ។
ចំណែកក្រុមយុវជនអាយុក្រោម១៨ឆ្នាំបាទី ត្រូវបើកទ្វារកីឡដ្ឋានសាលាបាល់ទាត់ជាតិបាទីស្វាគមន៍ភ្ញៀវនៅក្នុងខេត្តតាកែវដូចគ្នា គីរីវង់សុខសែនជ័យ។ នាជំនួបជើងទី១នៅលើទឹកដីគីរីវង់សុខសែនជ័យ U18 បាទី បានរងបរាជ័យក្នុងលទ្ធផល ៤-១។ គីរីវង់ទើបនាំចូលកីឡាករជប៉ុន Taku Yanagidate និងកីឡាករកូឌីវ័រ Coulibaly Major Bangaly នៅជើងទី២នេះ៕
© រក្សាសិទ្ធិដោយ thmeythmey.com