វាមិនមែនជារឿងចម្លែកប៉ុន្មានទេនៅពេលដែលធ្វើដំណើរឆ្លងដែននៅតាមអាកាសយានដ្ឋាន ឬនៅតាមព្រំដែនគោក អ្នកអាចសង្កេតឃើញប្រភេទលិខិតឆ្លងដែនមានពណ៌ផ្សេងគ្នាអាស្រ័យតាមប្រទេសនីមួយៗ។ ប៉ុន្តែភាគច្រើននៃលិខិតឆ្លងដែនទាំងនោះមានបួនពណ៌ប៉ុណ្ណោះ។
សារព័ត៌មាន Telegraph របស់អង់គ្លេសបានពន្យល់ថា បួនពណ៌ចម្បងនៃលិខិតឆ្លងដែននានាជុំវិញពិភពលោកនោះមានដូចជា ក្រហម ខៀវ បៃតង និង ខ្មៅ ឬពេលខ្លះវាគ្រាន់តែមានកម្រិតពណ៌ក្រម៉ៅ ឬថ្លាបន្តិចបន្តួចប៉ុណ្ណោះ។
ចំណែកអង្គការអាកាសចរណ៍ស៊ីវិលអន្តរជាតិ (International Civil Aviation Organization) ឬ ICAO គឺជាស្ថាប័នមួយដែលជួយជ្រុំជ្រែងក្នុងការកំណត់លក្ខខណ្ខមួយចំនួនក្នុងការផលិត ឬការធ្វើបច្ចុប្បន្នភាពនៃលិខិតឆ្លងដែន។
លិខិតឆ្លងដែននៅតាមបណ្តាប្រទេសដែលមានវត្តមានក្នុងសហភាពអឺរ៉ុប (EU) ភាគច្រើនមានពណ៌បែបក្រហមឈាមជ្រូក ឬក្រហមក្រម៉ៅ ដែលភាសាអង់គ្លេសហៅថា ពណ៌ Burgundy ។ មូលហេតុមួយចំនួនត្រូវបានគេសំដៅទៅលើប្រវត្តិសាស្ត្រនៃរបបកុម្មុយនីស្ត។
ចំណែកឯប្រទេសនៅតាមបណ្តាទ្វីបអាមេរិក តំបន់ការ៉ាអ៊ីប ឬទ្វីបអូសេអានី មានបោះពុម្ភលិខិតឆ្ងនដែនដែលមានគម្របពណ៌ខៀវ។ មូលហេតុគឺប្រទេសទាំងអស់នោះភាគច្រើនត្រូវបានគេសំដៅថា ទឹកដីថ្មី ឬដែនដីថ្មី ក្រោយពីអាណានិគម ឬការរុករកស្រាវជ្រាវរបស់ប្រទេសមហាអំណាចក្នុងប្រទេសអឺរ៉ុប។
ចំណែកឯប្រទេសខ្លះទៀតវិញ ការរើសយកពណ៌គឺមិនមែនដោយសារបញ្ហាភូមិសាស្ត្រនយោបាយនោះទេ ពេលខ្លះវាជាលំនាំនៃការលើកតម្កើងលទ្ធិសាសនារបស់ជាតិខ្លួន។ ប្រទេសដែលកាន់សាសនាឥស្លាម ជាពិសេសនៅតាមតំបន់អាស៊ីកណ្តាល ភាគច្រើនប្រើប្រាស់ពណ៌បៃតង។
គេមានជំនឿថា ពណ៌បៃតងគឺជាពណ៌ដែលព្យាការី Muhammad ចូលចិត្តស្រឡាញ់ជាងគេ។
ចំណែកឯពេលខ្លះពណ៌ខ្មៅត្រូវបានគេប្រើ ដោយសារមានមិនងាយប្រឡាក់ ឬពេលខ្លះវាជាពណ៌ដែលមើលទៅបង្ហាញពីភាពផ្លូវការ ឬចាស់ទុំជាដើម។ ពណ៌ក្រហមឆៅ ត្រូវបានប្រើប្រាស់ដើម្បីងាយស្រួលឲ្យគេចាប់អារម្មណ៍ឬពិនិត្យ។
ចំណែកឯប្រទេសខ្លះវិញ ពណ៌ ស គឺសម្រាប់អ្នកដំណើរឆ្លងប្រទេសណាដែលត្រូវការការឆ្លងដែនក្នុងករណីអាសន្ន ឬករណីពិសេសណាមួយ។ សរុបមក គ្មានច្បាប់កំណត់ច្បាស់លាស់ឡើងក្នុងការរើសពណ៌នៃលិខិតឆ្លងដែន។ វាគ្រាន់តែជាការនិយមប្រើប្រាស់របស់ប្រទេសក្នុងតំបន់រៀងៗខ្លួនតែប៉ុណ្ណោះ៕