ការប្រកួតក្របខណ្ឌមិត្តហ្វូនខេមបូឌានលីគឆ្នាំ២០១៩ ឈានដល់ការបញ្ចប់សប្តាហ៍ទី១៤នៅថ្ងៃអាទិត្យនេះ។ កីឡដ្ឋាន អ អេស អិន រៀបចំជំនួបលើកទី២ នារសៀលនេះ រួមទាំងជំនួប៣គូទៀត។
បឹងកេត ប៉ះ ភ្នំពេញក្រោន វេលាម៉ោង៦ល្ងាចនៅកីឡដ្ឋាន R.S.N
នេះជាជំនួបដ៏តានតឹងនិងជក់ចិត្តសម្រាប់ទស្សនិកជន ដ្បិតក្រុមទាំងពីរសុទ្ធតែទើបនាំចូលកីឡាករថ្មីដើម្បីត្រៀមប្រកួតជើងទី២នេះ។ បឹងកេតបាននាំចូលកីឡាករ ចាន់ វឌ្ឍនាកា ដែលបានចែកផ្លូវគ្នាជាមួយក្លិបក្របខណ្ឌកំពូលម៉ាឡេស៊ី PKNS និងខ្សែបម្រើជប៉ុន Kenta Yamazaki ដែលពួកគេទាំងពីរសុទ្ធសឹងជាកីឡាករជោគជាំដោយបទពិសោធលេងបាល់ទាត់។ ខណៈភ្នំពេញក្រោនក្រោមការដឹកនាំបណ្តោះអាសន្នរបស់លោក ស៊ុំ វណ្ណា បានទិញចូលខ្សែប្រយុទ្ធ Booysen Shane ដែលធ្លាប់លេងឲ្យព្រះខ័នរាជស្វាយរៀង និងអគ្គស្នងការដ្ឋាននគរបាលជាតិ, ខ្សែប្រយុទ្ធ Dzarma Bata ដែលរកគ្រាប់បាល់បានច្រើនជាងគេឲ្យក្លិបក្រសួងការពារជាតិ, ខ្សែបម្រើជម្រើសជាតិរបស់អាហ្គានីស្ថាន Mustafa Zazai, សេង សារ៉ាវុធ និង សុខ សុវណ្ណ។
ក្រៅពីតេស្តសមត្ថភាពកីឡាករថ្មី ភ្នំពេញក្រោនត្រូវការឈ្នះបឹងកេត ដើម្បីសងសឹក ក្រោយពួកគេបានចាញ់ ៣-២ នាជំនួបជើងទី១នៅលើទឹកដីរបស់ខ្លួន ដោយពេលនោះភ្នំពេញក្រោនស្ថិតក្រោមការដឹកនាំរបស់លោក Leonardo Vitorino ដែលក្លិបបានបញ្ចប់កិច្ចសន្យាមុនពេលកំណត់។ ក្រោយចប់ជើងទី១ បឹងកេតឈរលេខរៀងទី៤មាន២៦ពិន្ទុ រីឯភ្នំពេញក្រោនឈរលេខ៦មាន២៤ពិន្ទុ។
ណាហ្គាវើល ប៉ះ អាស៊ីអឺរ៉ុប វេលាម៉ោង៦ល្ងាចនៅកីឡដ្ឋានស្តាតចាស់
វាជាជំនួបសងសឹកសម្រាប់អាស៊ីអឺរ៉ុប ដែលពួកគេចាញ់ណាហ្គាវើល ១-០ នៅជើងទី១។ ដើម្បីត្រៀមការប្រកួតជើងទី២អាស៊ីអឺរ៉ុបបានផ្លាស់ប្តូរសមាសភាពកីឡាករបរទេសមួយចំនួន ដោយទិញចូលកីឡាករ Julien William, Ndoumene Yannick Francois, Tjutomu Hasegawa និងកីឡាករ សុក ចាន់រស្មី ខណៈណាហ្គាវើលនាំចូលកីឡាករ Kawabata Yugo។
បើមើលពីការប្រកួត៣លើកចុងក្រោយរបស់ពួកគេ ក្រុមឈរលេខរៀងទី៣ណាហ្គាវើលបានយកឈ្នះយុវជនបាទី ៣-០ ចាញ់វិសាខា ៣-២ និងស្មើ ០-០ ជាព្រះខ័នរាជស្វាយរៀង ខណៈអាស៊ីអឺរ៉ុប ដែលឈរលេខរៀងទី៩ បានយកឈ្នះវិសាខា ៣-១ ចាញ់ព្រះខ័នរាជស្វាយរៀង ២-០ និងចាញ់ក្រសួងការពារជាតិ ៤-១។ ណាហ្គាវើលត្រូវការឈ្នះនៅថ្ងៃនេះ ដើម្បីឡើងទៅឈរលេខរៀងទី២បណ្តោះអាសន្ន។
អគ្គស្នងការដ្ឋាននគរបាលជាតិប៉ះព្រះខ័នរាជស្វាយរៀង វេលាម៉ោង៣:៣០នាទីរសៀលនៅកីឡដ្ឋាន EDC
ក្រុមអគ្គស្នងការដ្ឋាននគរបាលជាតិត្រូវធ្វើការធ្ងន់នៅថ្ងៃនេះ ព្រោះព្រះខ័នរាជស្វាយរៀងជាក្រុមខ្លាំងមិនទាន់ស្គាល់ពាក្យចាញ់សម្រាប់១៣ប្រកួតកន្លងមកនេះ។ ចំណែក១៣ប្រកួតរបស់ក្រុមឈរលេខរៀងទី១១មួយនេះ ស្គាល់ជ័យជម្នះ៤លើក ស្មើ១ និងចាញ់៨។ ទោះបីព្រះខ័នរាជស្វាយរៀង នឹងបន្តឈរកំពូលតារាងក្នុងសប្តាហ៍នេះក៏ដោយ តែពួកគេត្រូវការឈ្នះនៅរសៀលនេះ ដើម្បីធ្វើឲ្យមានគម្លាតកាន់តែឆ្ងាយពីការប្រជែងរបស់ណាហ្គាវើល និងអង្គរថាយហ្គឺរ។ កាលជើងទី១ព្រះខ័នរាជស្វាយរៀងបានយកឈ្នះអគ្គស្នងការដ្ឋាននគរបាលជាតិក្នុងលទ្ធផល ២-០។
ណាហ្គាវើល ប៉ះ សូលទីឡូអង្គរ វេលាម៉ោង៣:៣០នាទីរសៀលនៅកីឡដ្ឋានខេត្តសៀមរាប
ណាហ្គាវើលត្រូវការឈ្នះសូលទីឡូអង្គរ ដើម្បីឡើងទៅឈរលេខរៀងទី២ ដែលអង្គរថាយហ្គឺរបានដណ្តើមយកកាលពីថ្ងៃសៅរ៍។ បច្ចុប្បន្នក្រុមដែលទើបនាំចូលកីឡាករជប៉ុន១រូបមួយនេះ ស្ថិតនៅលេខរៀងទី៣មាន២៨ពិន្ទុ ក្រោមអង្គរថាយហ្គឺរ២ពិន្ទុ និងមានគម្លាតជាមួយក្រុមកំពូលតារាង៥ពិន្ទុ។ កាលជើងទី១ក្រុមទាំងពីរបានបញ្ចប់ក្នុងលទ្ធផលគ្មានការស៊ុតបញ្ចូលទីគ្នា។
ចំណែកក្រុមមានមូលដ្ឋាននៅខេត្តសៀមរាបសូលទីឡូអង្គរស្ថិតនៅលេខរៀងទី៨មាន២១ពិន្ទុ។ ចង់មិនចង់ ក្រុមគ្មានការដោះដូរកីឡាករក្នុងជើងទី២មួយនេះ ក៏ត្រូវការឈ្នះណាហ្គាវើលវិញផងដែរ ដើម្បីបន្តក្តីសង្ឃឹមក្នុងការប្រជែងដណ្តើមជើងឯក។ តែបើពួកគេចាញ់នៅថ្ងៃនេះ នឹងធ្វើក្រុមនេះមានគម្លាតកាន់តែឆ្ងាយពីក្រុមកំពូលតារាង ខណៈបច្ចុប្បន្នពួកគេមានគម្លាត១២ពិន្ទុ៕