អន្តរជាតិ
រដ្ឋមន្ត្រីឥណ្ឌូណេស៊ី៖ ទូកនេសាទបរទេស១ម៉ឺនគ្រឿង ត្រូវបានបណ្តេញចេញពីដែនទឹកឥណ្ឌូណេស៊ី
×![]()
រដ្ឋាភិបាលក្រុងហ្សាការតា បានឲ្យដឹងថា ក្រោមរដ្ឋបាលរបស់ខ្លួន មានទូកនេសាទប្រមាណ ១ម៉ឺនគ្រឿងត្រូវបានបណ្តេញចេញពីទឹកឥណ្ឌូណេស៊ី។ ក្រុងហ្សាការតា អះអាងថា ចំណាត់ការនេះ បានផ្តល់ផលប្រយោជន៍ច្រើនដល់ជាតិមកវិញ។
តាមរយៈកិច្ចប្រជុំពិនិត្យការងារប្រចាំឆមាសនៅថ្ងៃ៤ កក្កដា រដ្ឋមន្ត្រីនេសាទ និងកិច្ចការដែនសមុទ្រលោកស្រី Susi Pudjiastuti បានអះអាងថា កន្លងមករដ្ឋាភិបាល បានបណ្តេញទូកនេសាទខុសច្បាប់ប្រមាណ១០,០០០ គ្រឿងពីដែនទឹករបស់ឥណ្ឌូណេស៊ី។ នេះបើយោងតាមការចុះផ្សាយរបស់សារព័ត៌មាន Jakarta Post។
លោកស្រីរដ្ឋមន្ត្រី បានបន្ថែមថា នាវានិងទូកនេសាទបរទេស ដែលភាគច្រើនមានទំហំធំជាងទូកនេសាទរបស់ពលរដ្ឋឥណ្ឌូណេស៊ី និងសុទ្ធតែបំពាក់ជាមួយនឹងសម្ភារនេសាទច្រងេងច្រងាងផងនោះ បានបំពានលើធនធានដែនសមុទ្ររបស់ឥណ្ឌូណេស៊ីហួសហេតុ ដែលតម្រូវឲ្យរដ្ឋាភិបាល ត្រូវអនុវត្តគោលនយោបាយម៉ឺងម៉ាត់ និងធ្ងន់ធ្ងរបំផុត។
ខណៈបដិសេធការប្រកាន់ដែលថា គោលនយោបាយបង្ក្រាបនេះ ធ្វើឲ្យឧស្សាហកម្មនេសាទក្នុងស្រុកនៅទ្រឹង លោកស្រីរដ្ឋមន្ត្រី បានអះអាងថា ចំណាត់ការនេះ បានចូលរួមចំណែកមួយភាគនៃកំណើនផលិតផលក្នុងស្រុកក្នុងរយៈពេលប៉ុន្មានឆ្នាំចុងក្រោយមកនេះ។ តាមលោកស្រី គិតក្នុងត្រីមាសទី១ នៃឆ្នាំ២០១៩នេះ ឧស្សាហកម្មនេសាទ បានចូលចំណែកក្នុងកំណើនក្នុងទំហំ ៤,៤១ ពាន់លានដុល្លារ។
គួរជម្រាបផងដែរថា គោលនយោបាយបង្ក្រាបទូកនេសាទបរទេសខុសច្បាប់របស់ឥណ្ឌូណេស៊ី ចាប់ផ្តើមអនុវត្តពីឆ្នាំ២០១៥ ពោលគឺនៅក្នុងអាណត្តិទី១របស់លោកប្រធានាធិបតី ចូកូ វីដូដូ។ កន្លងមក រដ្ឋាភិបាលឥណ្ឌូណេស៊ី មិនត្រឹមតែបណ្តេញទូកនេសាទប៉ុណ្ណោះនោះទេ តែក៏បានឃាត់ទុក និងបំផ្លាញទូកនេសាទបរទេសខុសច្បាប់រាប់រយគ្រឿងផងដែរ៕
Tag:
ឥណ្ឌូណេស៊ី
អាស៊ាន
© រក្សាសិទ្ធិដោយ thmeythmey.com
