ជាតិ
លោក នួន ជា កំពុងសម្រាកព្យាបាលជំងឺនៅក្នុងមន្ទីរពេទ្យ
× ភ្នំពេញ៖ រយៈពេលមួយសប្ដាហ៍ហើយ ដែលលោក នួន ជា មេដឹកនាំរបបខ្មែរក្រហម កំពុងសម្រាកព្យាបាលជំងឺ នៅក្នុងមន្ទីរពេទ្យមិត្តភាពខ្មែរ-សូវៀត ។ លោក នួន ជា វ័យ៩៣ ត្រូវបានក្រុមគ្រូពេទ្យ នៃសាលាក្តីខ្មែរក្រហម (អ.វ.ត.ក) បញ្ជូនមកសង្គ្រោះបន្ទាន់ កាលពីថ្ងៃទី២ កក្កដា។
លោក នេត្រ ភក្ត្រា អ្នកនាំពាក្យសាលាក្ដីខ្មែរក្រហម មិនអាចបញ្ជាក់លម្អិតនៃប្រភេទជំងឺរបស់លោក នួន ជា ប្រាប់សារព័ត៌មានថ្មីៗឡើយ ដោយលោក គ្រាន់តែអះអាងថា រង់ចាំមើលការតាមដានពិនិត្យរបស់ក្រុមគ្រូពេទ្យ។ «ខ្ញុំមិនអាចបញ្ជាក់បានថាតើគាត់(នួន ជា) មានរឿងអ្វីទេ ដោយសារតែព័ត៌មានទាក់ទងនឹងសុខភាពរបស់គាត់ យើងចាត់ទុកជាព័ត៌មានឯកជន និងជាព័ត៌មានសម្ងាត់។ (មកដល់ពេលនេះ) សុខភាពរបស់គាត់ដូចជាមិនមានបញ្ហាអ្វីចោទទេ ហើយគាត់ស្ថិតនៅក្នុងមន្ទីរពេទ្យនោះបន្តទៀត រង់ចាំការត្រួតពិនិត្យរបស់ក្រុមគ្រូពេទ្យ»។ នេះជការបញ្ជាក់របស់លោក នេត្រ ភក្ត្រា។
ប៉ុន្តែតាមការចុះផ្សាយរបស់សារព័ត៌មាន Fresh News បានបញ្ជាក់ថា ជនជាប់ឃុំ នួន ជា មានបញ្ហាដំបៅជាំខ្មៅនៅផ្នែកជើងទាំងសងខាងគឺ ខាងឆ្វេងត្រង់ម្រាមជើងកណ្តាល និងខាងស្តាំត្រង់ម្រាមជើងមេ ដែលតម្រូវឲ្យវះកាត់ជាបន្ទាន់។
គួរបញ្ជាក់ថា លោក នួន ជា អតីតមេដឹកនាំរខ្មែរក្រហមរូបនេះ ត្រូវបានអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) សម្រេចផ្ដន្ទាទោសដាក់ពន្ធនាគារអស់ ១ ជីវិតក្នុងសំណុំរឿង ០០២/០២ កាលពីខែវិច្ឆិកាឆ្នាំ២០១៨ ៕
Tag:
នួន ជា
នេត្រ ភក្ត្រា
ខ្មែរក្រហម
© រក្សាសិទ្ធិដោយ thmeythmey.com