អន្តរជាតិ
×![]()
ដោយ: គី ចំណា
ជារៀងរាល់ថ្ងៃ នៅពេលដែលអ្នកចុចកុងតាក់បើកអំពូលភ្លើងនៅក្នុងបន្ទប់ តើលោកអ្នកដែលមានចម្ងល់ទេថា តើថាមពលទាំងនេះមានប្រភពមកពីណា? ជាទូទៅ វាអាចមានប្រភពមកពីវារីអគ្គីសនី ឬថាមពលឥន្ធនៈផូស៊ីលដែលទាញចេញពីដីជ្រៅក្នុងស្រទាប់ភពផែនដី។ សព្វថ្ងៃ កំណើននៃការប្រើប្រាស់ថាមពលអគ្គីសនី បានកើនឡើងយ៉ាងឆាប់រហ័សជាពិសេសថាមពលខ្យល់ និងពន្លឺព្រះអាទិត្យ។
គេហទំព័រ Green Tumble បានបញ្ចាក់ថា នៅចុងសតវត្សរ៍នេះ គេគិតទុកថា ការប្រើប្រាស់ថាមពលអគ្គិសនី នឹងកើនឡើងដល់ទីបីដង។ កាកសំណល់ឧស្ម័នផ្ទះកញ្ចក់ដែលបញ្ចេញដោយឥន្ធនៈផូស៊ីលទាំងនោះ មានឥទ្ធិពលគ្រប់គ្រាន់ក្នុងការបង្កើនសីតុណ្ហភាពនៅលើភពផែនដី ដែលអាចបង្កទៅជាគ្រោះធម្មជាតិជាច្រើនទៀតនៅថ្ងៃអនាគត។
ដើម្បីចៀសផុតពីមហន្តរាយទាំងនេះ ស្ថាប័នបរិស្ថានពាក់ព័ន្ធជាច្រើន បានកំណត់ថា ការបញ្ចេញឧស្ម័នផ្ទះកញ្ចក់ពីឥន្ធនៈផូស៊ីល គួរត្រូវតែបញ្ឈប់រហូតដល់ក្បែរសូន្យភាគរយនៅក្នុងឆ្នាំ២០៥០ ខាងមុខ។ បន្ទាប់មក ការប្រើប្រាស់វាយោថាមពល និងថាមពលពន្លឺព្រះអាទិត្យ នឹងត្រូវអនុវត្តឡើងឲ្យបានកាន់តែច្រើន។ វាមិនបញ្ចេញធាតុពុលច្រើនឡើយ ហើយវាជួយកាត់បន្ថយការឡើងកម្តៅផែនដីទៀតផង។ តែសំណួរត្រូវបានគេសួរថា តើយើងអាចទុកចិត្តលើថាមពលនេះទាំងស្រុងបានទេ? តើវាអាចបំពេញតម្រូវការរបស់អ្នកប្រើប្រាស់ឲ្យបានគ្រប់គ្រាន់ដែរឬទេ?
រោងចក្រអគ្គីសនីប្រភេទ Base Load គឺជារោងចក្រអគ្គីសនីដែលអាចផលិតថាមពលក្នុងកម្រិតមួយថេរល្អ ក្នុងពេលវេលាយូរ ដោយមិនងាយប្រែប្រួល។ ភាគច្រើន វាគឺជារោងចក្រថាមពលអគ្គីសនីធ្យូងថ្ម ឬរោងចក្រថាមពលនុយក្លេអែ ហើយពួកវាជាអ្នកផលិតថាមពលគោល។ នៅពេលដែលការប្រើប្រាស់ភ្លើងមានការកើនឡើងបន្ថែម (ដូចជានៅថ្ងៃបុណ្យ ឬថ្ងៃក្តៅខ្លាំង) រោងចក្រផលិតអគ្គីសនីប្រភេទ Peaking ត្រូវបានគេប្រើប្រាស់សម្រាប់ជំរុញថាមពលបន្ថែម។
វារីអគ្គីសនី និងរោងចក្រអគ្គីសនី ដែលប្រើប្រាស់កម្តៅផែនដី អាចសាងសង់ឡើងបាននៅទីតាំងពិសេសតែប៉ុណ្ណោះ។ ចំណែកឯថាមពលខ្យល់ និងថាមពលពន្លឺព្រះអាទិត្យ ពឹងផ្អែកខ្លាំងទៅលើធាតុអាកាស ដែលជាបាតុភូតធម្មជាតិមួយដែលផ្លាស់ប្តូរជាប្រចាំ។
ថាមពលទាំងពីរប្រភេទនេះមិនអាចផលិតថាមពលឲ្យបានថេរល្អនោះទេ ហើយនេះគឺជាភាពលំបាកមួយ។ ពន្លឺព្រះអាទិត្យ អាចមាននៅគ្រប់ទីកន្លែង តែការចាប់យកថាមពលពន្លឺនោះដើម្បីបម្លែងជាថាមពលអគ្គីសនីប្រើប្រាស់បាន ជារឿងមួយលំបាក។ គេត្រូវការសារធាតុពិសេសដូចជា ស៊ីលីកូន បូរ៉ន និងផូស្វ័រដែលមានគុណភាពខ្ពស់ក្នុងការផលិតថាមពលបានច្រើន។
ចំណែកឯតួប៊ីនខ្យល់វិញ ប្រើប្រាស់សារធាតុកម្រដែលហៅថា Neodymium ពីក្នុងដី ជាមួយដែក និងស៊ីម៉ង់ក្នុងការសាងសង់។ ដើម្បីទាញយកសារធាតុទាំងនេះ ការបំផ្លាញបរិស្ថាន គឺជារឿងមួយដែលពិបាកនឹងចៀសផុត។ ម្យ៉ាងវិញទៀត ដើម្បីផលិតថាមពលអគ្គីសនីឲ្យមានបរិមាណស្មើគ្នា គេត្រូវការចំនួនតួប៊ីនដល់ទៅបីដងនៃចំនួនរោងចក្រផលិតអគ្គីសនីដោយធ្យូងថ្ម។ បញ្ហាមួយទៀត គឺការរក្សាទុកថាមពល និងការចែកចាយថាមពល។ ទាំងនេះត្រូវការធនធានធម្មជាតិ និងថវិកាយ៉ាងច្រើនក្នុងការផលិត និងថែទាំ។
អ្នកជំនាញមួយចំនួន បានសិក្សាលើបច្ចេកទេសពិសេសមួយដែលហៅថា Smart Grid ដែលវាជាការភ្ជាប់ ថាមពលខ្យល់ ថាមពលព្រះអាទិត្យ និងថាមពលវារីចូលគ្នា ដើម្បីផលិតថាមពលក្នុងកម្រិតមួយថេរ និងមានតម្លៃធូរថ្លៃ។ តែវានៅតែជាបច្ចេកទេសមួយដែលមានតម្លៃថ្លៃ និងត្រូវការការសហការច្រើនពីប្រទេសក្នុងតំបន់។ ដោយសារតែភាពមិនច្បាស់លាស់របស់ពួកគេ អ្នកជំនាញត្រូវរកវិធីសាស្ត្រក្នុងការស្តុកថាមពលទុកនៅពេលដែលថាមពលមានការខ្វះខាត។ ដំណោះមួយគឺ ការប្រើប្រាស់ថ្មពិលធំៗ ដែលជាឧបករណ៍អគ្គីសនីមួយដ៏ថ្លៃ ហើយសារធាតុនៅក្នុងថ្មពិលទាំងនេះត្រូវបានគេទាញយកពីក្នុងដី ដែលនេះគឺជាការបំផ្លាញបរិស្ថានមួយបាត់ទៅហើយ។ តើជាមួយនឹងភាពលំបាកទាំងនេះ តើគេអាចទុកចិត្តលើវាដែរឬទេ? វាគ្មានចម្លើយពិតប្រាកដនោះទេ។
ថាមពលបៃតង គឺជាការវិនិយោគមួយវែងឆ្ងាយ និងមិនប្រាកដមួយរយភាគរយនោះទេ។ ការផ្លាស់ប្តូរក្នុងខ្នាតពិភពលោកគឺជារឿងមួយលំបាកខ្លាំងណាស់ ហើយវាទាមទារវេលាយូរ និងការចំណាយច្រើន។ ថាមពលនីមួយៗតែងមានភាពវិជ្ជមាន និងអវិជ្ជមានរបស់ខ្លួន។ បើវាផលិតថាមពលខ្លាំង វាក៏បំពុលខ្លាំងដែរ។ ប៉ុន្តែអ្នកជំនាញជាច្រើនរូបនៅតែបន្តដោះស្រាយ និងរកវិធីសាស្ត្រថ្មីៗល្អៗក្នុងការជួយបរិស្ថាន។ វាក៏ទាមទារឲ្យប្រជាពលរដ្ឋនានាយល់ដឹងពីបញ្ហានេះដែរ ដូចជាការសន្សំសំចៃភ្លើងជាដើម។ វាជាការជួយទាំងអស់គ្នា ដើម្បីទាំងអស់គ្នា៕
Tag:
ថាមពលខ្យល់
ថាមពលព្រះអាទិត្យ
© រក្សាសិទ្ធិដោយ thmeythmey.com
