អន្តរជាតិ
រូបភាព AFP
×![]()
ដោយ: តន ចាន់រិទ្ធារ៉ា
ប្រធានាធិបតីអាមេរិក ដូណាល់ ត្រាំ បានរងការរិះគន់យ៉ាងខ្លាំងក្រោយប្រើប្រាស់ពាក្យពេជន៍ក្នុងន័យរើសអើងលើសមាជិកសភាមកពីបក្សប្រជាធិបតេយ្យ។ តាមរយៈ Twitter នៅថ្ងៃទី១៤ ខែកក្កដា លោក ត្រាំ បានប្រាប់សមាជិកសភាបក្សប្រជាធិបតេយ្យជាស្ត្រីដែលមានគំនិតជឿនលឿន ឲ្យត្រឡប់ទៅប្រទេសដើមវិញ ជាជាងណែនាំលោកពីការដឹកនាំអាមេរិក។ បក្សប្រជាធិបតេយ្យ សុទ្ធតែមិនពេញចិត្តការលើកឡើងរបស់លោក ត្រាំ ។
ជាថ្មីម្ដងទៀត ប្រធានាធិបតីអាមេរិក ដូណាល់ ត្រាំ បានប្រើប្រាស់ពាក្យពេជន៍មិនសមប្រកបដាក់សមាជិកសភាមកពីបក្សប្រជាធិបតេយ្យ។ លើកនេះ លោក ត្រាំ បានតម្រង់គោលដៅដាក់សមាជិកសភាជាស្ត្រីដែលមានគំនិតជឿនលឿន វ័យក្មេង មានដើមកំណើតនៅបរទេស និងតែងចេញមុខនិយាយរិះគន់គោលនយោបាយក្នុងការដឹកនាំប្រទេសរបស់លោក ពិសេសគោលនយោបាយអន្តោប្រវេសន៍ដ៏ចម្រូងចម្រាសតែម្ដង។
ទោះមិនបញ្ចេញឈ្មោះ គេអាចដឹងបានថា លោក ត្រាំ ចង់សំដៅដល់សមាជិកសភាស្ត្រីបក្សប្រជាធិបតេយ្យដូចជាលោកស្រី Alexandria Ocasio-Cortez សមាជិកសភាមកពី New York ដែលមានដើមកំណើតនៅព័រតូរីកូ, លោកស្រី Ilhan Omar សមាជិកសភាស្បែកខ្មៅមកពី Minnesota មានដើមកំណើតនៅសូម៉ាលី, លោកស្រី Rashida Tlaib ដែលមានឈាមជ័រប៉ាឡេស្ទីន និងជាសមាជិកសភាមក Michigan ។ សមាជិកទាំងបីនេះ ធ្លាប់បានពន្លះលោក ត្រាំ មិនតិចដងឡើយ។
នៅលើបណ្ដាញសង្គម Twitter របស់ខ្លួននៅថ្ងៃទី១៤ ខែកក្កដា លោក ត្រាំ បានសរសេរដៀមដាមដាក់សមាជិកសភាទាំងនេះថា មកពីប្រទេសដែលមានរដ្ឋាភិបាលពោរពេញដោយមហន្តរាយ ស៊ីរូងដោយអំពើពុករលួយ និងភាពល្ងង់ខ្លៅបំផុតក្នុងពិភពលោក។ លោកប្រធានាធិបតីអាមេរិករូបនេះ ក៏បានចោទសមាជិកសភាបក្សប្រជាធិបតេយ្យទៀតថា បានប្រាប់ប្រជាជនអាមេរិកពីរបៀបដឹកនាំប្រទេសតាមបែបណាទៀត។
«ហេតុអ្វីពួកគេមិនត្រឡប់ទៅទីដើមវិញ ហើយជួយប្រទេសខ្លួនដែលពោរពេញដោយឧក្រិដ្ឋកម្ម និងដោះស្រាយបញ្ហាទាំងនេះទៅ។ តមក ត្រឡប់មកអាមេរិកវិញ ហើយបង្ហាញពីសមិទ្ធផលរបស់ខ្លួន។» នេះជាសំណេររបស់លោក ត្រាំ លើគណនី Twitter របស់លោក។
សម្ដីទាំងអម្បាលម៉ាននេះហើយ ដែលធ្វើឲ្យលោក ត្រាំ ក្លាយជាមុខសញ្ញារិះគន់ជាបន្តបន្ទាប់។ បេក្ខជនប្រធានាធិបតីបក្សប្រជាធិបតេយ្យជាច្រើន សុទ្ធតែបានបរិហារប្រមុខរដ្ឋអាមេរិករូបនេះ។ អតីតអនុប្រធានាធិបតីអាមេរិក Joe Biden ដែលចាត់ទុកការលើកឡើងជាការរើសអើង និងបណ្ដុះគំនិតស្អប់ខ្ពើមនោះ ចាត់ទុកថា គំនិតបែបនេះមិនគួរមាននៅទឹកដីអាមេរិកឡើយ។ បេក្ខជនម្នាក់ទៀត គឺលោកស្រី Kamala Harris ហៅសម្ដីលោក ត្រាំ ជាការប្រឆាំងប្រជាជនអាមេរិក។
ខណៈបក្សប្រជាធិបតេយ្យរិះគន់លោក ត្រាំ ខ្លាំងៗ បក្សសាធារណរដ្ឋមិនបានប្រើពាក្យមិនសមប្រកបណាមួយដាក់ប្រធានាធិបតីតំណាងបក្សរបស់ខ្លួនឡើយ។ លោក ត្រាំ ឯណេះវិញ ទោះរងប្រតិកម្មផ្ទួនៗក្ដី ក៏បានបន្ថយសម្ដីរបស់ខ្លួនដែរ ហើយរិះគន់បក្សប្រជាធិបតេយ្យទៅទៀត។ លោកសរសេរលើTwitter ថា គួរឲ្យសោកស្ដាយណាស់ដែលបក្សប្រជាធិបតេយ្យឈរខាងមនុស្សដែលនិយាយមិនល្អពីអាមេរិក៕
Tag:
អាមេរិក
ដូណាល់ ត្រាំ
បក្សប្រជាធិបតេយ្យ
© រក្សាសិទ្ធិដោយ thmeythmey.com
