ជាតិ
២៥ខេត្ត/រាជធានី
កុងតឺន័រដឹកសំរាមដល់ទៅ៨៣ទូ នឹងត្រូវបញ្ជូនទៅប្រទេសដើមវិញ ហើយអ្នកនាំចូលត្រូវរងពិន័យ
× ក្រសួងបរិស្ថាន និងអគ្គនាយកដ្ឋានគយ និងរដ្ឋាករនៃក្រសួងសេដ្ឋកិច្ច និងហិរញ្ញវត្ថុ ទាំងស្ថាប័នពាក់ព័ន្ធ នៅរសៀលថ្ងៃទី១៦ ខែកក្កដា នេះ បានពិនិត្យឃើញកុងទឺន័រដល់ទៅ៨៣ទូនៅផែព្រះសីហនុ មានផ្ទុកកាកសំណល់សំរាមនាំចូលពីបរទេស។ បើតាមលោក នេត្រ ភក្ត្រា អ្នកនាំពាក្យក្រសួងបរិស្ថាន សមត្ថកិច្ចនឹងកំណត់ប្រភពកុងតឺន័រហើយនឹងត្រូវបញ្ជូនទៅប្រភពដើមវិញ ខណៈក្រុមហ៊ុននាំចូលត្រូវរងការផាកពិន័យ។ ជាមួយគ្នានេះ ក្រសួងបរិស្ថាននិងសមត្ថកិច្ច ពាក់ព័ន្ធនឹងធ្វើការស៊ើបអង្កេតស៊ីជម្រៅបន្ថែមទៀតដើម្បីស្វែងរកប្រភព និងឫសគល់ដែលនាំឱ្យមានការនាំចូលសំណល់សំរាមនេះមកកាន់ប្រទេសកម្ពុជា។
កម្ពុជា នឹងបញ្ជូនទូកុងតឺន័រដែលផ្ទុកសំណល់សំរាម ចំនួន ៨៣ កុងតឺន័រទៅប្រភពដើមវិញ។ លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បញ្ជាក់ថា សមត្ថកិច្ចពាក់ព័ន្ធ នឹងបើកការស៊ើបអង្កេតស៊ីជម្រៅ ដើម្បីស្វែងរកប្រភព និងឫសគល់ ដែលនាំឲ្យមានការនាំចូលសំណល់សំរាមនេះមកកម្ពុជា។ លោក នេត្រ ភក្ត្រាបន្ថែមថា៖«សមត្ថកិច្ច នឹងកំណត់ថាទំនិញហាមឃាត់ទាំងនេះ មកពីប្រភពណា ហើយត្រូវបញ្ជូនទៅប្រភពដើមវិញ»។ តាមអ្នកនាំពាក្យដដែល អាជ្ញាធរកម្ពុជា នឹងពិន័យតាមច្បាប់ ចំពោះក្រុមហ៊ុនដែលនាំសំរាមមកកម្ពុជាផងដែរ។
នៅរសៀលថ្ងៃទី១៦ កក្កដា កម្លាំងសមត្ថកិច្ចនៃអគ្គនាយកដ្ឋានគយ និងរដ្ឋាករសហការជាមួយសមត្ថកិច្ចពាក់ព័ន្ធ ដឹកនាំដោយលោក គុណ ញឹម, លោក សាយ សំអាល់, លោក គួច ចំរើន, លោក លូ គឹមឈុន បានបង្ក្រាប និងគាស់ទូកុងតឺន័រចំនួន ៨៣ទូ ដែលផ្ទុកសំរាមនាំចូលពីបរទេស នាកំពង់ផែខេត្តព្រះសីហនុ។ ប្រតិបត្តិការបង្ក្រាប និងគាស់ទូកុងតឺន័រនេះ ធ្វើឡើងដើម្បីទប់ស្កាត់ទំនិញហាមឃាត់ចូលមកកម្ពុជា។
សូមបញ្ជាក់ថា នាពេលកន្លងទៅ សម្តេច ហ៊ុន សែន នាយករដ្ឋមន្ត្រីកម្ពុជា បានលើកឡើងថា រាជរដ្ឋាភិបាលកម្ពុជា មិនអនុញ្ញាតឲ្យមានការនាំចូលសំណល់ប្លាស្ទិកមកកែច្នៃនៅកម្ពុជា ជាដាច់ខាត។ សម្តេច ហ៊ុន សែន បានបញ្ជាក់ដូច្នេះ៖«កម្ពុជា មិនមែនជាធុងសំរាម សម្រាប់ការបោះចោលបច្ចេកវិទ្យាហួសសម័យនោះទេ ហើយរដ្ឋាភិបាលជំទាស់ជានិច្ច នឹងការនាំចូលសំណល់ប្លាស្ទិក និងប្រេងម៉ាស៊ីនមកកែច្នៃនៅកម្ពុជា»៕
© រក្សាសិទ្ធិដោយ thmeythmey.com