អន្តរជាតិ
កងទ័ពថៃ ប្រកាសគាំទ្ររដ្ឋាភិបាលស៊ីវិលរបស់នាយករដ្ឋមន្ត្រី ប្រាយុទ្ធ ឆ្វេងទៅស្ដាំ៖ លោក Chaiyapruk Ditsayasarin មេទ័ពជើងអាកាស, លោក Apirat Kongsompong មេទ័ពជើងគោក, លោក Luechai Ruddit មេទ័ពជើងទឹក, លោក Chakthip Chaichinda មេប៉ូលិសជាតិ ឈរអមលោក Pornpipat Benyasri (មុខ)។ រូបភាព thainews.prd.go.th
× កងទ័ពថៃ នៅថ្ងៃទី១៨ ខែកក្កដា បានបង្ហាញជំហរគាំទ្ររដ្ឋាភិបាលស៊ីវិលថ្មីដែលដឹកនាំអតីតមេដឹកនាំរដ្ឋប្រហារឆ្នាំ២០១៤ ឧត្តមសេនីយ៍ ប្រាយុទ្ធ ចន្ទអូចា ។ អ្នកនាំពាក្យកងទ័ពភូមិន្ទថៃ ប្រកាសជំហរបែបនេះក្រោយជំនួបរបស់ប្រមុខកងទ័ពកំពូលរបស់យោធាថៃ ដោយបញ្ជាក់ថា កងទ័ពនឹងធ្វើជាឧបករណ៍បម្រើរដ្ឋាភិបាល ដោះស្រាយបញ្ហា និងអនុវត្តតាមគោលនយោបាយរបស់រដ្ឋាភិបាលកំពុងដឹកនាំប្រទេសផងដែរ។
អគ្គមេបញ្ជាការកងទ័ពភូមិន្ទថៃ នាយឧត្តមសេនីយ៍ Pornpipat Benyasri បានកោះប្រជុំប្រមុខកងទ័ពនៅថ្ងៃទី១៨ ខែកក្កដា ដើម្បីជជែកពីតួនាទីរបស់កងទ័ពក្នុងអាណត្តិរដ្ឋាភិបាលស៊ីវិលថ្មី។ មេទ័ពសំខាន់ៗដូចជា មេបញ្ជាកងទ័ពជើងគោកដ៏មានឥទ្ធិពល នាយឧត្តមសេនីយ៍ Apirat Kongsompong, មេបញ្ជាការទ័ពជើងទឹក នាយឧត្តមនាវី Ruechai Ruddit, ប្រមុខទ័ពអាកាស នាយឧត្តមសេនីយ៍ Chaipruek Dissayasarin និងអគ្គស្នងការប៉ូលិសជាតិ Chakthip Chaijinda សុទ្ធតែមានវត្តមាន។
នេះជាជំនួបមេទ័ពកំពូលៗលើកទីមួយ ក្រោយការចូលដឹកនាំប្រទេសរបស់រដ្ឋាភិបាលថ្មីដែលដឹកនាំដោយនាយករដ្ឋមន្ត្រី ឧត្តមសេនីយ៍ ប្រាយុទ្ធ ចន្ទអូចា ។ លោក ប្រាយុទ្ធ ដែលកាលពីប្រាំឆ្នាំមុនដឹកនាំកងទ័ពធ្វើរដ្ឋប្រហារទម្លាក់រដ្ឋាភិបាលស៊ីវិលអតីតនាយករដ្ឋមន្ត្រី យីងឡាក់ ស៊ីណាវ៉ាត់ ហើយគ្រប់គ្រងប្រទេសក្រោមរបបសឹកនោះ នឹងដឹកនាំប្រទេសសម្រាប់អាណត្តិបួនឆ្នាំខាងមុខក្នុងនាមជានាយករដ្ឋមន្ត្រីស៊ីវិលវិញម្ដង។
បើតាមសារព័ត៌មានថៃបាងកកប៉ុស្តិ៍ អ្នកនាំពាក្យកងទ័ពភូមិន្ទថៃ Krit Chantharaniyom ប្រាប់អ្នកសារព័ត៌មានថៃ ថា កិច្ចប្រជុំមេទ័ពកំពូលនេះ បានយល់ព្រមឲ្យកងទ័ពបន្តរក្សាតួនាទីជាឧបករណ៍របស់រដ្ឋាភិបាលក្នុងការដោះស្រាយបញ្ហាប្រទេសជាតិ។ អ្នកនាំពាក្យរូបនេះបន្តថា កងទ័ពនឹងប្រកាន់ខ្ជាប់ការប្ដេជ្ញាចិត្តរបស់ខ្លួនក្នុងការការពារជាតិ សាសនា មហាក្សត្រ និងប្រជាជន ហើយត្រៀមខ្លួនជាស្រេចដើម្បីអនុវត្តតាមគោលនយោបាយរដ្ឋាភិបាលថ្មី។
ការប្រកាសគាំទ្ររដ្ឋាភិបាលរបស់កងទ័ពខាងលើនេះ ទំនងជាធ្វើឲ្យលោក ប្រាយុទ្ធ ធូរចិត្តខ្លាំង ហើយដឹកនាំប្រទេសដោយមិនបាច់ភ័យព្រួយរឿងរដ្ឋប្រហារឡើយ។ ទំនងក្នុងគោលដៅទប់ស្កាត់រឿងអកុសលបែបនេះ លោក ប្រាយុទ្ធ ក៏ទាញកៅអីរដ្ឋមន្ត្រីការពារជាតិមកអង្គុយមួយថែមទៀត លើកៅអីនាយករដ្ឋមន្ត្រីរបស់ខ្លួន។
កន្លងមក យោធាថៃក៏ធ្លាប់ប្រកាសគាំទ្ររដ្ឋាភិបាលស៊ីវិលពេញទំហឹងដែរ ទោះនរណាធ្វើនាយករដ្ឋមន្ត្រីក្ដី។ ការងាររបស់កងទ័ពថៃ គឺដើរតាមរដ្ឋាភិបាលថ្មី ដោយមិនខ្វល់ពីនិន្នាការឡើយ ហើយអនុវត្តតាមការចង្អុលបង្ហាញរបស់រដ្ឋាភិបាលថ្មីទៀតផង។ ប៉ុន្តែអ្វីដែលមើលឃើញនោះ កងទ័ពថៃ នៅតែសំលឹងការងារនយោបាយមិនដាក់ភ្នែក ហើយត្រៀមអន្តរាគមន៍ដោះស្រាយបញ្ហាដូចដែលធ្លាប់នៅឆ្នាំ២០១៤ ពេលវិបត្តិនយោបាយឡើងកម្ដៅ ហើយកងទ័ពធ្វើរដ្ឋប្រហារដើម្បីស្ថិរភាពតែម្ដង៕
Tag:
ថៃ
ប្រាយុទ្ធ ចន្ទអូចា
© រក្សាសិទ្ធិដោយ thmeythmey.com