ជម្លោះពាណិជ្ជកម្មជប៉ុន-កូរ៉េខាងត្បូង៖ លោក ត្រាំ ត្រៀមចូលជួយ បើមានសំណើ

អន្តរជាតិ

ជម្លោះពាណិជ្ជកម្មជប៉ុន-កូរ៉េខាងត្បូង៖ លោក ត្រាំ ត្រៀមចូលជួយ បើមានសំណើ

20, Jul 2019 , 8:29 pm

រូបភាព

រូបភាព AFP

ដោយ: តន ចាន់រិទ្ធារ៉ា

ប្រធានាធិបតីអាមេរិក ដូណាល់ ត្រាំ នៅថ្ងៃទី១៩ ខែកក្កដា បានប្រកាសជំហរត្រៀមជួយដោះស្រាយវិបត្តិពាណិជ្ជកម្មក្ដៅគគុករវាងកូរ៉េខាងត្បូង និងជប៉ុនដែលជាសម្ព័ន្ធមិត្តដ៏សំខាន់របស់អាមេរិកនៅអាស៊ី។ បច្ចុប្បន្ន កូរ៉េខាងត្បូង និងជប៉ុន រកច្រកចេញមិនទាន់ឃើញនៅឡើយទេ ខណៈដែលភាគីទាំងពីរបានដំឡើងសម្ដីដាក់គ្នាកាន់តែខ្លាំងផង។ សេអ៊ូលដែលរងគ្រោះដោយសារការរឹតត្បិតការនាំចេញរូបធាតុសំខាន់ៗរបស់តូក្យូនោះ បានគំរាមចាត់វិធានការតបដ៏ខ្លាំងក្លាផងដែរ។

ជម្លោះពាណិជ្ជកម្មរវាងកូរ៉េខាងត្បូង និងជប៉ុន នៅមិនទាន់ថមថយនៅឡើយទេ។ ជម្លោះដែលផ្ដើមដោយសាលក្រមតុលាការកូរ៉េខាងត្បូងបញ្ជាឲ្យក្រុមហ៊ុនជប៉ុនសងជំងឺចិត្តពលករកូរ៉េខាងត្បូងដែលធ្វើការធ្ងន់នៅសម័យសង្គ្រាម បានអូសបន្លាយជាច្រើនសប្ដាហ៍មកហើយ ខណៈភាគីទាំងពីរនៅតែមិនអាចរកច្រកចេញបាន។ ចុងក្រោយនេះ កូរ៉េខាងត្បូងថែមទាំងបដិសេធសំណើជប៉ុនដែលចង់ដោះស្រាយបញ្ហាតាមយន្តការដោះស្រាយជម្លោះដែលមានភាគីទីបីផង។

ខណៈជប៉ុន និងកូរ៉េខាងត្បូងមើលមុខគ្នាកាន់តែមិនត្រូវខ្លាំង អាមេរិកឯណោះ ក៏ត្រៀមចូលអន្តរាគមន៍ដើម្បីបញ្ចៀសផលវិបាកធ្ងន់ធ្ងរដែលនាំឲ្យកិច្ចសហប្រតិបត្តិការត្រីភាគីល្អក់កករ។ ពីសេតវិមាននៅថ្ងៃទី១៩ ខែកក្កដា ប្រធានាធិបតីអាមេរិក ដូណាល់ ត្រាំ និយាយថា ប្រធានាធិបតីកូរ៉េខាងត្បូង មូន ចេអ៊ីន ប្រាប់លោកពីភាពមិនត្រូវគ្នាជាមួយជប៉ុន ពិសេសបញ្ហាពាណិជ្ជកម្មសព្វថ្ងៃនេះ ហើយលោក មូន បានសុំឲ្យលោកលូកដៃ។

«ខ្ញុំចូលចិត្តមេដឹកនាំទាំងពីរ។ ខ្ញុំចូលចិត្តប្រធានាធិបតី មូន ហើយអ្នកដឹងហើយពីអារម្មណ៍របស់ខ្ញុំលើនាយករដ្ឋមន្ត្រី អាបេ ដែលជាមនុស្សពិសេស។ ដូច្នេះប្រសិនពួកគេត្រូវការខ្ញុំ ខ្ញុំនឹងជួយ។» នេះជាការបញ្ជាក់របស់លោក ត្រាំ នាកម្មវិធីមួយនៅសេតវិមាននៅថ្ងៃទី១៩ ខែកក្កដា។ បើនិយាយពីទំនាក់ទំនងនេះវិញ លោក ត្រាំ ជួបលោក អាបេ ច្រើនជាងជួបលោក មូន ទៅទៀត។

តាមពិតទៅ រឿងរ៉ាវដើរដល់ចំណុចនេះ កើតចេញដោយសារការយល់ខុសគ្នារវាងកូរ៉េខាងត្បូង និងជប៉ុនលើការដោះស្រាយបញ្ហាបំពានកម្លាំងពលកម្មពលករកូរ៉េខាងត្បូង។ ជប៉ុន អះអាងថា បញ្ហានេះចប់សព្វថ្ងៃតាំងពីការចុះហត្ថលេខាងបង្កើតទំនាក់ទំនងនៅឆ្នាំ១៩៦៥មក។ ប៉ុន្តែកូរ៉េខាងត្បូងថា បញ្ហានេះមិនបញ្ចូលក្នុងកិច្ចព្រមព្រៀងឆ្នាំនោះឡើយ រួចទើបតុលាការកូរ៉េខាងត្បូងចេញបញ្ជាឲ្យក្រុមហ៊ុនជប៉ុនផ្ដល់ប្រាក់សំណងទៅ។

ការសម្រេចចិត្តបែបនេះ ក៏នាំឲ្យជប៉ុនរឹតត្បិតការនាំចេញសារធាតុគីមីសំខាន់ៗទៅកាន់កូរ៉េខាងត្បូង ដែលចាំបាច់ក្នុងការផលិតបន្ទះឈីប និងទូរសព្ទឆ្លាតវៃ។ ចំណាត់ចុងក្រោយរបស់តូក្យូនេះ ធ្វើឲ្យសេអ៊ូលខឹងយ៉ាងខ្លាំង និងចាត់ទុកជារឿងនយោបាយទៀតផង។ ទោះជាយ៉ាងណា សេអ៊ូលមិនទាន់ចាត់វិធានការអ្វីតបឡើយ ព្រោះចង់ដោះស្រាយបញ្ហាតាមផ្លូវការទូតឲ្យអស់ចិត្ត។ ប៉ុន្តែជម្រើសទាំងអស់ ស្ថិតក្នុងការពិចារណា រាប់ទាំងគិតគូរឡើងវិញកិច្ចព្រមព្រៀងផ្លាស់ប្ដូរព័ត៌មានយោធាផងដែរ៕