អន្តរជាតិ
នាយករដ្ឋមន្ត្រីថ្មីអង់គ្លេស ចង់បានកិច្ចព្រមព្រៀងចាកចេញថ្មី តែអឺរ៉ុបថា ទេ! នាយករដ្ឋមន្រ្តីអង់គ្លេស បូរីស ចនសុន ។ រូបភាព AFP
× នាយករដ្ឋមន្ត្រីថ្មីរបស់ចក្រភពអង់គ្លេស បូរីស ចនសុន (Boris Johnson) នៅថ្ងៃទី២៥ ខែកក្កដា បានប្រកាសជំហរចង់ឡើងវិញជាមួយសហភាពអឺរ៉ុបលើកិច្ចព្រមព្រៀងលែងលះគ្នា។ លោក ចនសុន ចាត់ទុកកិច្ចព្រមព្រៀងដែលបន្សល់ទុកដោយអតីតនាយករដ្ឋមន្ត្រីលោកស្រី ថេរ៉េសា ម៉េយ៍ ជាកិច្ចព្រមព្រៀងមិនអាចទទួលយកបានឡើយ។ ប៉ុន្តែជំហររបស់រដ្ឋាភិបាលអង់គ្លេសនេះ ក៏ជារឿងមិនអាចទទួលយកបានដែរសម្រាប់សហភាពអឺរ៉ុប។
ចក្រភពអង់គ្លេស ទំនងត្រូវលែងលះជាមួយសហភាពអឺរ៉ុននៅថ្ងៃទី៣១ ខែតុលាខាងមុខដោយគ្មានកិច្ចព្រមព្រៀងហើយ ខណៈដែលមេដឹកនាំថ្មីរបស់អង់គ្លេស និងមេដឹកនាំអឺរ៉ុបមានជំហរផ្ទុយគ្នាលើការចរចាឡើងវិញ។ នាកិច្ចប្រជុំសភាដំបូង លោក បូរីស ចនសុន ដែលទើបក្លាយជានាយករដ្ឋមន្ត្រីថ្មីរបស់អង់គ្លេស និយាយថា កិច្ចព្រមព្រៀងចាកចេញពីសហភាពអឺរ៉ុបរបស់លោកស្រី ថេរ៉េសា ម៉េយ៍ មិនអាចទទួលយកបានឡើយ។
រឿងដែលប្រមុខរដ្ឋាភិបាលអង់គ្លេសមិនពេញចិត្តជាងគេ គឺកិច្ចព្រមព្រៀងនេះ បន្តឲ្យអង់គ្លេសស្ថិតក្នុងការសហភាពពន្ធគយរបស់អឺរ៉ុបសិនក្រោយពេលចាកចេញ រហូតដល់ការសម្រេចចិត្តបានកិច្ចព្រមព្រៀងពាណិជ្ជកម្មមួយសំដៅបើកចំហព្រំដែនឲ្យអៀរឡង់។ លោក ចនសុន ដែលប្រកាសថា អង់គ្លេសនឹងចាកចេញពីអឺរ៉ុបនៅថ្ងៃទី៣១ ខែតុលា ទោះមាន ឬមិនមានកិច្ចព្រមព្រៀងនោះ ចង់ឲ្យអង់គ្លេសចេញផុតពីអឺរ៉ុប ដោយមានជំពាក់វាក់វិនអ្វីទៀតឡើយ។
អំឡុងកិច្ចប្រជុំសភា លោក ចនសុន បានទទូចឲ្យមេដឹកនាំអឺរ៉ុបគិតគូរឡើងវិញពីជំហរចរជាថ្មីជុំវិញកិច្ចព្រមព្រៀងលែងលះ។ នាយករដ្ឋមន្ត្រីដែលគាំទ្រការចាកចេញពីអឺរ៉ុបតាំងពីប្រជាមតិខែមិថុនា ឆ្នាំ២០១៦ និយាយបែបព្រមានថា៖ «ប្រសិនបើពួកគេមិនយល់ស្របទេ យើងច្បាស់ជាចេញពីអឺរ៉ុបទាំងគ្មានកិច្ចព្រមព្រៀងមិនខាន។» លោកក៏ប្រកាសត្រៀមខ្លួនដើម្បីទប់ទល់ក្នុងករណីសេណារីយូបែបនេះកើតឡើងមែននោះ។
អង់គ្លេសចង់ចរចាឡើងវិញ? អឺរ៉ុបមិនព្រមទេ។ លោក ហ្សង់-ក្លូដ ចាំងគើ ប្រធានគណៈកម្មការអឺរ៉ុបប្រាប់លោក ចនសុន បែបនេះក្នុងកិច្ចសន្ទនាតាមទូរសព្ទនៅថ្ងៃទី២៥ ខែកក្កដា។ លោកស្រី Mina Andreeva អ្នកនាំពាក្យលោក ចាំងគើ បានស្រង់សម្ដីមេដឹកនាំអឺរ៉ុបរូបនេះថា លោកប្រធានគណៈកម្មការអឺរ៉ុប បានស្ដាប់កាលើកឡើងរបស់លោក ចនសុន និងបានប្រាប់នាយករដ្ឋមន្ត្រីអង់គ្លេសវិញថា កិច្ចព្រមព្រៀងបច្ចុប្បន្ន ល្អជាងគេហើយ។
ចំណែកឯលោក Michel Barnier ប្រធានក្រុមចរចារបស់អឺរ៉ុប ចាត់ទុកជំហររបស់លោក ចនសុន ជាការប៉ុនប៉ងបំបែកសហភាពអឺរ៉ុបតាមរយៈការបង្កើនសម្ពាធរឿងចាកចេញដោយគ្មានកិច្ចព្រមព្រៀង។ លោកចាត់ទុកសម្ដីរបស់លោកនាយករដ្ឋមន្ត្រីថ្មីអង់គ្លេស ជារឿងមិនអាចទទួលយកបានឡើយ ហើយអឺរ៉ុបក៏ត្រៀមលក្ខណៈសម្រាប់ករណីដែលគ្មានកិច្ចព្រមព្រៀងផងដែរ។ លោក Barnier ក៏បញ្ជាក់ថា លោកមិនទទួលអំណាចដើម្បីចរចាជាថ្មីឡើយ៕
Tag:
អង់គ្លេស
EU
Brexit
អឺរ៉ុប
បូរីស ចនសុន
© រក្សាសិទ្ធិដោយ thmeythmey.com