ជាតិ
សង្គមជាតិ
ឱកាសសម្រាប់និស្សិតពេទ្យ! ការប្រកួតស្នាដៃអត្ថបទស្រាវជ្រាវដណ្ដើមពានរង្វាន់ «គីណាល់»
×
ដោយ៖ ឃុន សម្ផស្ស
ភ្នំពេញ៖ មូលនិធិគីណាល់ និងសាកលវិទ្យាល័យវិទ្យាសាស្ត្រសុខាភិបាល នឹងរៀបចំកម្មវិធីប្រឡងប្រជែងស្នាដៃអត្ថបទស្រាវជ្រាវដណ្ដើមពានរង្វាន់ «គីណាល់» លើកទី៧។ ការប្រកួតប្រជែងនេះ មានការចូលរួមពីសាកលវិទ្យាល័យ បណ្ដុះបណ្ដាលវិជ្ជាជីវៈ ផ្នែកសុខាភិបាលទាំងអស់នៅកម្ពុជា។ កម្មវិធីនេះ ផ្ដល់ឱកាសដល់និស្សិតសិក្សាផ្នែកសុខាភិបាលដូចជា ឱសថសាស្ត្រ វេជ្ជសាស្ត្រ ទន្តវទនសាស្ត្រ ឬគិលានុបដ្ឋាក ដើម្បីបង្កើនការសិក្សាស្រាវជ្រាវលើផ្នែកសុខាភិបាល។
នេះជាលើកទី៧ហើយ ដែលមូលនិធីគីណាល់ បានរៀបចំកម្មវិធីប្រឡងប្រជែងស្នាដៃអត្ថបទស្រាវជ្រាវដណ្តើមពានរង្វាន់ «គីណាល់» ដោយមានការចូលរួមពីសាកលវិទ្យាល័យ បណ្តុះបណ្តាលវិជ្ជាជីវៈ ផ្នែកសុខាភិបាលទាំងអស់នៅកម្ពុជា។ ក្នុងការប្រកួតប្រជែងនេះ ជ័យលាភីលេខ១ នឹងទទួលបានប្រាក់ចំនួន ៤លានរៀល, លេខ២ ចំនួន២លានរៀល, លេខ៣ ចំនួន១លាន២០ម៉ឺនរៀល និងលេខ៤,៥, ៦ ចំនួន ៤០ម៉ឺនរៀល។
បើតាមសេចក្ដីជូនដំណឹងស្ដីពីការប្រកួតប្រជែងនេះ បេក្ខជនត្រូវសរសេរស្នាដៃស្រាវជ្រាវក្រោមប្រធានបទស្តីពី «EVOLUTION OF PAIN TREATMENT FROM THE PAST UNTIL NOW»។ ស្នាដៃរបស់បេក្ខជន ត្រូវជាស្នាដៃដែលមានគំនិតច្នៃប្រឌិតថ្មី ផ្ទាល់ខ្លួន និងមិនធ្លាប់ជាប់ការប្រឡង ឬជាប់រង្វាន់ពីមុនមក(សរសេរជាភាសាអង់គ្លេស)។ បេក្ខជន ត្រូវធ្វើបទបង្ហាញជាភាសាខ្មែរ ឬភាសាអង់គ្លេស។
បេក្ខជនដែលចាប់អារម្មណ៍លើការប្រកួតប្រជែងនេះ ត្រូវជានិស្សិតសិក្សាផ្នែកសុខាភិបាល (ឱសថសាស្ត្រ វេជ្ជសាស្ត្រ ទន្តវទនសាស្ត្រ ឬគិលានុបដ្ឋាក) ដោយមានសមាជិកក្រុមមិនលើសពី ៦នាក់ និងត្រូវមានសមាជិកចម្រុះរវាង២សាកលវិទ្យាល័យ។ បេក្ខជនទាំងអស់ អាចចុះឈ្មោះតាម អ៊ីម៉ែល
ចាប់ពីថ្ងៃផ្សាយដំណឹងនេះ រហូតដល់ថ្ងៃទី ៣០ ខែកញ្ញា ឆ្នាំ២០១៩។
សូមបញ្ជាក់ថា សម្រាប់វគ្គពាក់កណ្តាលផ្តាច់ព្រ័ត្រ បេក្ខជនត្រូវផ្ញើស្នាដៃអត្ថបទស្រាវជ្រាវ តាមរយៈអ៊ីម៉ែលខាងលើ។ បេក្ខជនដែលជាប់ក្នុងវគ្គជម្រុះវគ្គពាក់កណ្តាលផ្តាច់ព្រ័ត្រ នឹងត្រូវធ្វើបទបង្ហាញរបស់ខ្លួនដោយមានការវាយតម្លៃ និងដាក់ពិន្ទុដោយគណៈកម្មការ នៅថ្ងៃទី១៤ ខែធ្នូ ឆ្នាំ២០១៩។ ជាមួយគ្នានេះ ការផ្តល់ពានរង្វាន់ នឹងប្រារព្ធធ្វើនៅថ្ងៃទី១៨ ខែធ្នូ ឆ្នាំ២០១៩៕
Tag:
ស្រាវជ្រាវ
ប្រកួតប្រជែង
© រក្សាសិទ្ធិដោយ thmeythmey.com