អន្តរជាតិ
ការធ្វើអត្តឃាតនៅសិង្ហបុរី កើនឡើង ១០ភាគរយ ក្នុងចំណោមក្មេងប្រុស ឈុតមួយក្នុងរឿងឥណ្ឌា ចំណងជើង 3 Idiots
× តួលេខនៃការធ្វើអត្តឃាតក្នុងប្រទេសសិង្ហបុរី បានកើនឡើង ១០ភាគរយ ក្នុងឆ្នាំ២០១៨ ដោយក្នុងនោះ ក្មេងប្រុសអាយុចាប់ពី ១០ ទៅ ១៩នាក់ មានអត្រាខ្ពស់។ នេះបើតាមការបញ្ជាក់របស់អង្គការ Samaritans of Singapore (SOS) នៅថ្ងៃទី២៩ ខែកក្កដា។
របាយការណ៍ បង្ហាញថា ក្នុងឆ្នាំ២០១៨ ការធ្វើអត្តឃាតមានចំនួន ៣៩៧ ករណី បើធៀបនឹង ៣៦១ ករណីក្នុងឆ្នាំ២០១៧។ តួលេខនេះ ធ្វើឲ្យអត្រានៃការធ្វើអត្តឃាតកើនឡើងដល់ ៨,៣៦ករណី ក្នុងចំណោមប្រជាជនសិង្ហបុរី ១០ម៉ឺននាក់ ហើយកើនឡើង ៧,៧៤ភាគរយពីឆ្នាំ២០១៧។
តាមការការចុះផ្សាយរបស់ទូរទស្សន៍សិង្ហបុរី Channel News Asia ភ្នាក់ងារបង្ការការធ្វើអត្តឃាត (SOS) បញ្ជាក់ឲ្យដឹងថា មនុស្សគ្រប់ជំពូក លើកលែងតែប្រជាជនដែលមានអាយុ ៦០ ឆ្នាំឡើងទៅ ត្រូវបានរកឃើញថា មានអត្រានៃការសម្លាប់ខ្លួន កើនឡើងគួរឲ្យកត់សម្គាល់។
អត្រាមរណភាពដែលកើតចេញពីការធ្វើអត្តឃាត ក្នុងចំណោមយុវជន និងមនុស្សប្រុស គឺជាកង្វល់សម្រាប់សង្គមដ៏ធំមួយ។ នេះបើតាមការបញ្ជាក់របស់អង្គការ SOS ដោយសង្កត់ធ្ងន់ថា រាល់ការសម្លាប់ខ្លួន ១០ករណី ក្នុងឆ្នាំ២០១៨ យ៉ាងហោចណាស់ ៧ នាក់ គឺជាមនុស្សប្រុស។
មនុស្សសរុបចំនួន ៩៤នាក់ អាយុចន្លោះពី ១០ ទៅ ២៩ឆ្នាំ បានធ្វើអត្តឃាតកាលពីឆ្នាំមុន។ ដោយឡែក ក្នុងចំណោមក្មេងប្រុស អាយុចន្លោះពី១០ឆ្នាំទៅ ១៩ឆ្នាំ ក្នុងឆ្នាំ២០១៨ ការសម្លាប់ខ្លួន មានចំនួន ១៩ករណី ដែលជាតួលេខខ្ពស់បំផុត ចាប់តាំងពីឆ្នាំ១៩៩១មក។
តាមរយៈទូរទស្សន៍សិង្ហបុរី Channel News Asia ប្រធានជំនួយការជាន់ខ្ពស់នៃអង្គការ SOS លោកស្រី Wong Lai Chun និយាយថា វា ជារឿងគួរឲ្យព្រួយបារម្ភដែលដឹងថា មនុស្សវ័យក្មេងជាច្រើន មានអារម្មណ៍ខ្វះការគាំទ្រក្នុងអំឡុងពេលសោកសៅបំផុតរបស់ពួកគេ ហើយពួកគេ មើលឃើញការសម្លាប់ខ្លួនជាជម្រើសតែមួយគត់ ដើម្បីបញ្ចប់ការឈឺចាប់ និងការលំបាកលំបិន។
យ៉ាងណាមិញ លោកស្រី កត់សម្គាល់ថា បច្ចុប្បន្ននេះ មនុស្សវ័យក្មេង មានឆន្ទៈបន្ថែមក្នុងការសុំជំនួយពីអង្គការលោកស្រី ដើម្បីដោះស្រាយវិបត្តិ។ ត្រង់នេះ លោកស្រី អះអាងថាក្នុងចំណោមមនុស្សដែលបានផ្ញើសំបុត្រទៅកាន់អង្គការ SOS សម្រាប់ការគាំទ្រផ្នែកផ្លូវចិត្ត ច្រើនជាង ៧៨ភាគរយ គឺជាមនុស្សអាយុចាប់ពី ១០ ទៅ ២៩ឆ្នាំ។ តួលេខនេះ កើនឡើង ៥៦ភាគរយ បើធៀបនឹងឆ្នាំមុន៕
Tag:
សិង្ហបុរី
ការធ្វើអត្តឃាត
© រក្សាសិទ្ធិដោយ thmeythmey.com