អន្តរជាតិ
នាវាមុជទឹកប្រភេទ Yuan Class S26T តម្លៃជាង ៤៣៧,៨លានដុល្លារ របស់ចិន
×![]()
ទោះបីប្រឈមបញ្ហាមួយចំនួនក្តី កងទ័ពជើងទឹកភូមិន្ទថៃ នឹងនៅតែបន្តអនុវត្តគម្រោងទិញនាវាទីពីរ ពីប្រទេសចិនដែលមានតម្លៃ ១២ពាន់លានបាត ឬស្មើនឹងជាង៣៨៩លានដុល្លារ ។ តាមប្រភពយោធាច្បាស់ការ កងទ័ពជើងទឹកភូមិន្ទថៃ នៅត្រូវការឲ្យសភាអនុម័តសេចក្តីព្រាងច្បាប់ស្តីពីកញ្ចប់ថវិកាជាតិឆ្នាំ ២០២០ ជាមុនសិន ទើបអាចទិញបាន។
ក្នុងអាណត្តិរបស់អតីតរដ្ឋាភិបាលសឹក ដែលមានលោកប្រាយុទ្ធ ចន្ទអូចា ជានាយករដ្ឋមន្ត្រី គណៈរដ្ឋមន្ត្រីថៃ បានយល់ព្រមបញ្ជាទិញនាវាមុជទឹកចំនួន ៣គ្រឿងពីប្រទេសចិន ក្រោមកិច្ចព្រមព្រៀងតម្លៃ ១,១ពាន់លានដុល្លារ។ គម្រោងទិញនាវាមុជទឹកនេះ ត្រូវគណៈរដ្ឋមន្ត្រីថៃបញ្ចប់ការពិភាក្សារួចរាល់ កាលពីថ្ងៃទី២៥ ខែតុលា ឆ្នាំ២០១៦ ហើយតម្រូវឲ្យមានកញ្ចប់ថវិកាសម្រាប់ការបញ្ជាទិញរយៈពេលដល់ទៅ ១១ឆ្នាំ។
គណៈរដ្ឋមន្ត្រីថៃ កាលពីថ្ងៃទី ១៨ ខែមេសា ឆ្នាំ២០១៧ បានអនុម័តការបញ្ជាទិញជាលើកដំបូងនូវនាវាមុជទឹកប្រភេទ Yuan Class S26T តម្លៃជាង ៤៣៧,៨លានដុល្លារ ពីប្រទេសចិន។ កងទ័ពជើងទឹកភូមិន្ទថៃ និងក្រុមហ៊ុន China Shipbuilding & Offshore International Co បានចុះហត្ថលេខាលើកិច្ចសន្យាស្តីពីការធ្វើលទ្ធកម្ម កាលពីថ្ងៃទី ៤ ខែឧសភា ឆ្នាំ២០១៧ ក្នុងប្រទេសចិន។
តាមការចុះផ្សាយរបស់កាសែតបាងកកប៉ុស្តិ៍ នៅថ្ងៃទី ៣០ ខែកក្កដា ការបង់ប្រាក់សម្រាប់នាវាមុជទឹកទី១ នេះ ត្រូវបានបែងចែកជា ៧ ដំណាក់កាល។ តាមផែនការ កងទ័ពជើងទឹកថៃ បានសម្រេចបង់ ២២,៧លានដុល្លារ ក្នុងឆ្នាំ២០១៧ ហើយនិងបង់ ៦៤,៨លានជាប្រចាំឆ្នាំ ចាប់ពីឆ្នាំ២០១៨ រហូតដល់ ឆ្នាំ២០២៣។
ចំណែកការសាងសង់នាវាមុជទឹកទី១នេះវិញ បានចាប់ផ្តើមក្នុងប្រទេស កាលពីថ្ងៃទី ៧ ខែកញ្ញា ឆ្នាំមុន ហើយវា រំពឹងថានឹងបញ្ចប់រួចរាល់ និងបញ្ជូនទៅឲ្យកងទ័ពជើងទឹកថៃ នាពាក់កណ្តាលឆ្នាំ២០២៣ខាងមុខ។
មែនទែនទៅ គម្រោងទិញនាវាមុជទឹករបស់កងទ័ពជើងទឹកនេះ ទទួលបានការគាំទ្រខ្លាំង ចាប់តាំងពីរដ្ឋប្រហារឆ្នាំ២០១៤មក ក្រោយពីខ្លួន បានព្យាយាមជាច្រើនឆ្នាំបញ្ចុះបញ្ចូលរដ្ឋាភិបាលថៃអាណត្តិមុនៗ ដើម្បីបញ្ជាទិញនាវាមុជទឹកមួយទឹកពីអាល្លឺម៉ង់។ កាលនោះ ពួកគេ បានអះអាងថា គ្មានការបញ្ជាទិញនាវាមុជទឹកសូម្បីតែមួយគ្រឿងក្នុងរយៈពេល៦០ឆ្នាំចុងក្រោយនេះ ហើយប្រទេសថៃ ត្រូវការនាវាមុជទឹកទំនើបៗដើម្បីការពារប្រយោជន៍លំហសមុទ្ទរបស់ខ្លួន ក្នុងឈូងសមុទ្ទថៃ និងសមុទ្ទ Andaman ។
គួររម្លឹកផងដែរថា ក្នុងឆ្នាំ ២០១១ កងទ័ពជើងទឹកថៃ មានគម្រោងទិញនាវាមុជទឹកមួយទឹកចំនួន ៦ គ្រឿង ដែលផលិតដោយអាល្លឺម៉ង់ ក្នុងតម្លៃ ២៤៩,៧លានដុល្លារ។ ប៉ុន្តែគម្រោងនេះ ត្រូវបានរដ្ឋាភិបាលលោកស្រី យីងឡាក់ ស៊ីណាវ៉ាត់ត្រា បដិសេធ៕
Tag:
ថៃ
ចិន
នាវាមុជទឹក
កងទ័ពជើងទឹកភូមិន្ទថៃ
© រក្សាសិទ្ធិដោយ thmeythmey.com
