ជាតិ
សង្គមជាតិ
រឿងផ្លូវគោក! សម្តេចប្រាប់ទៅលោក មាស ឫទ្ធី ថា «ខុសដឹងខុស»
× លោក មាស ឫទ្ធី អ្នកអត្ថាធិប្បាយព័ត៌មានរបស់ទូរទស្សន៍ហង្សមាស បានអះអាងក្នុងកម្មវិធីព័ត៌មានរបស់ខ្លួន នៅព្រឹកថ្ងៃទី៣១ ខែកក្កដា ឆ្នាំ២០១៩នេះថា សម្តេចនាយករដ្ឋមន្ត្រី ហ៊ុន សែន បានទាក់ទងទៅលោក ហើយឲ្យលោក បកស្រាយទៅកាន់សាធារណជន ថាផ្លូវគោកនៅកម្ពុជា មានប៉ុន្មានប្រភេទឲ្យពិតប្រាកដ។
លោក មាស ឫទ្ធី និយាយដូច្នេះថា៖«សម្តេចតេជោ ក៏បានចាប់អារម្មណ៍ដែរ ដោយបានបញ្ជាក់មកខ្ញុំថា មើល៍ រឿងហ្នឹងវាម៉េច មើលឲ្យច្បាស់មើល៍ បើថាខុសដឹងខុស បើថាត្រូវដឹងត្រូវ បើថាខុស ត្រូវសុំទោសគេ»។
ក្រោយសម្តេចនាយករដ្ឋមន្ត្រី សួរនាំដូច្នេះ នៅព្រឹកនេះ គេក៏ឃើញកម្មវិធីឋានសួគ៌ឬឋាននរករបស់ទូរទស្សន៍ហង្សមាស បានចេញលិខិតផ្លូវការប្រកាសទទួលស្គាល់ថា ផ្លូវគោកនៅកម្ពុជា មានតែពីរប្រភេទប៉ុណ្ណោះ គឺ ផ្លូវថ្នល់និងផ្លូវដែក។ កម្មវិធីឋានសួគ៌ឬឋាននរក បានត្រឡប់មកឲ្យបេក្ខជន កៅ សីហា ត្រូវវិញ ដែលឆ្លើយថាផ្លូវគោកមានពីរប្រភេទនេះ និងយល់ព្រមឲ្យទៅឆ្លើយសំណួរផ្សេងទៀត នៅវគ្គបន្ត។
តាមរយៈលិខិតរបស់ខ្លួន កម្មវិធីឋានសួគ៌ឬឋាននរក បានសុំទោសសាធារណជន ចំពោះការផ្តល់ចម្លើយថា ផ្លូវគោកនៅកម្ពុជា មានដល់ទៅបីប្រភេទ គឺផ្លូវជាតិ ផ្លូវខេត្ត និង ផ្លូវលំ ហើយឲ្យបេក្ខជន កៅ សីហា ខុស។
កម្មវិធីឋានសួគ៌ឬឋាននរក សរសេរក្នុងលិខិតដូច្នេះថា៖«យើងខ្ញុំ ពិតជាសោកស្តាយ ដែលមិនបានរកឯកសារមួយទៀត ដែលមានការទទួលស្គាល់ពីក្រសួងអប់រំ មកបញ្ជាក់ឲ្យកាន់តែច្បាស់...»។
កម្មវិធីឋានសួគ៌ឬឋាននរក បញ្ជាក់ថា កំហុងឆ្គងនេះ ពុំពាក់ព័ន្ធនឹងពិធីការិនី ចាន់ កែវនិមល ឡើយ៕
Tag:
ហ៊ុន សែន
មាស ឫទ្ធី
ហង្សមាស
ផ្លូវ
© រក្សាសិទ្ធិដោយ thmeythmey.com