សកម្មភាពបរិស្ថាននាំឲ្យក្រុមយុវជនសំរាម និងពូឈីវ ទទួលគ្រឿងយសពីស្ថាប័នមួយនៅថៃ

ជាតិ

សង្គមជាតិ

សកម្មភាពបរិស្ថាននាំឲ្យក្រុមយុវជនសំរាម និងពូឈីវ ទទួលគ្រឿងយសពីស្ថាប័នមួយនៅថៃ

02, Aug 2019 , 8:59 am

រូបភាព

ដោយ:

យុវជនខ្មែរ៩រូប ដែលក្នុងនោះមានក្រុមយុវជនសំរាមដែលដឹកនាំដោយ លោក សាន ដារ៉ាវីត និងអ្នកគាំទ្របាល់ទាត់ដ៏ល្បីល្បាញម្នាក់ គឺពូឈីវ (ឈ្មោះដើម ឡា ពិសិដ្ឋ) ទទួលបានគ្រឿងយសពីស្ថាប័នអប់រំ GTO Academy របស់ថៃ ដែលបានវាយតម្លៃខ្ពស់ពីសកម្មភាពដ៏ផុសផុលរបស់យុវជនទាំងនេះ ក្នុងការងារសម្អាតបរិស្ថាននៅកម្ពុជា។

លោក សាន ដារ៉ាវីត ប្រធានក្រុមយុវជនសំរាម និងសមាជិករបស់ខ្លួន៨នាក់ ដែលក្នុងនោះមាន ពូឈីវ ផងដែរនោះ បានទៅទស្សនារោងចក្រកែច្នៃសំរាមប្លាស្ទិកនៅថៃ ចន្លោះពីថ្ងៃទី២៩ ដល់ថ្ងៃទី៣១ ខែកក្កដា។ នៅទីនោះ ពួកគត់ទទួលបានការស្វាគមន៍ និងលើកទឹកចិត្តពីស្ថាប័ន GTO Academy តាមរយៈការបំពាក់គ្រឿងយសសរសើរម្នាក់១ សម្រាប់សកម្មភាពរបស់ពួកគេក្នុងវិស័យបរិស្ថាន។

លោក សាន ដារ៉ាវីត បានប្រាប់ដល់អ្នកសារព័ត៌មានថ្មីៗតាមទូរសព្ទអំពីដំណើរទស្សនកិច្ចថៃថា៖ «ខ្ញុំពិតជាមានមោទកភាពចំពោះការវិលត្រឡប់មកវិញជាមួយគ្រឿងយសដែលជាផ្នែកមួយនៃការលើកមុខមាត់ប្រទេសជាតិផងដែរ។ ខ្ញុំសង្ឃឹមថាប្រវត្តិសាស្ត្រមួយនេះនឹងធ្វើឲ្យយុវជនមានភាពក្លាហានក្នុងការចាប់ផ្តើមធ្វើអ្វីមួយដែលជាក្តីស្រមៃពិតប្រាកដ»។

ប្រធានក្រុមយុវជនសំរាមរូបនេះបាននិយាយថា ក្នុងដំណើរទស្សនកិច្ចនៅប្រទេសថៃរយៈពេល៣ថ្ងៃកន្លងមកនេះ ក្រុមរបស់ខ្លួនក៏បានរៀបរាប់សកម្មភាពសម្អាតបរិស្ថានដោយរើសសំរាមតាមលូទឹកស្អុយបឹងត្របែក ប្រាប់ដល់ស្ថាប័ន GTO Academy និងរោងចក្រច្នៃសំរាមប្លាស្ទិកនៅប្រទេស។

បើតាមលោក ដារ៉ាវីត សកម្មភាពរើសសំរាមនៅលូទឹកស្អុយបឹងត្របែកត្រូវបានផ្អាកជាបណ្តោះអាសន្នសិន ដោយសារលោករវល់បន្តបេសកកម្មថ្មី គឺដើររើសកន្ទុយបារីតាមឆ្នេរសមុទ្រដាក់ចូលដបទឹកសុទ្ធនៅតាមឆ្នេរអូរឈើទាល។ ក្រុមយុវជនសំរាមចាប់ផ្តើមអនុវត្តសកម្មភាពនេះ តាំងពីថ្ងៃទី២១ ខែកក្កដា ដោយប្រមូលបានជិត១ម៉ឺនដើម។ ក្រុមរបស់លោក ក៏នឹងគិតថា ប្រមូលកន្ទុយបារីឲ្យអស់ត្រឹម១លានដើម។

ដោយឡែក ពូឈីវ ដែលនិយមស្លៀកពាក់ខោអាវមានពណ៌ទង់ជាតិកម្ពុជា ជាអ្នកគាំទ្រកីឡាបាល់ទាត់ដ៏ល្បីល្បាញម្នាក់នៅកម្ពុជា ជាពិសេសលោកតែងតែដើរជាគំរូទាក់ទងនឹងការដើរប្រមូលសំរាមនៅរៀងរាល់ក្រោយការប្រកួតកីឡាបាល់ទាត់។