២០នាក់ស្លាប់ដោយសារករណីបាញ់រះក្នុងហាងទំនិញនៅរដ្ឋតិចសាស

អន្តរជាតិ

២០នាក់ស្លាប់ដោយសារករណីបាញ់រះក្នុងហាងទំនិញនៅរដ្ឋតិចសាស

04, Aug 2019 , 10:33 am

រូបភាព

ដោយ:

ខ្មាន់កាំភ្លើងម្នាក់ ប្រដាប់ដោយកាំភ្លើង AK-47 បានបើកការបាញ់ប្រហារលើមនុស្សក្នុងហាងទំនិញ Walmart ក្នុងក្រុង El Paso នារដ្ឋតិចសាស (Texas) សហរដ្ឋអាមេរិកនៅថ្ងៃសៅរ៍ទី ៣ សីហា ។ មនុស្ស ២០នាក់ បាត់បង់ជីវិត និ២៦នាក់ផ្សេងទៀត រងរបួស ក្នុងហេតុការណ៍ដ៏គួរឲ្យរន្ធត់នេះ។

ក្នុងសន្និសីទកាសែតមួយ អភិបាលរដ្ឋ Texas លោក Greg Abbott លើកឡើងថា ជនស្លូតត្រង់ ២០ នាក់ មកពីក្រុង El Paso បាត់បង់ជីវិត ក្នុងហេតុការណ៍បាញ់រះចុងក្រោយបង្អស់នៅអាមេរិកនេះ។ លោកអភិបាលរដ្ឋវ័យ៦១ឆ្នាំរូបនេះ បានសង្កត់ធ្ងន់ថា អាជ្ញាធរ នឹងជួយទំនុកបម្រុងជនរងគ្រោះ និងសមាជិកគ្រួសារពួកគេ ។

នេះ ជាការបាញ់រះលើកទីពីរហើយក្នុងរយៈពេលតិចជាងមួយសប្តាហ៍ នៅហាងទំនិញ Walmart ហើយវាកើតឡើងក្រោយពីការបាញ់រះក្នុងរដ្ឋ កាលីហ្វ័រនីញ៉ាកាលពីសប្តាហ៍មុន។

តាមការចុះផ្សាយរបស់ទីភ្នាក់ងារព័ត៌មាន AFP ស្នងការប៉ូលិសក្រុង El Paso លោក Greg Allen បញ្ជាក់ទៀតថា ក្រៅពីអ្នកស្លាប់ ២០នាក់ ក៏មានអ្នករបួស ២៦នាក់ផ្សេងទៀតផងដែរ។ របាយការណ៍ជាច្រើន បង្ហាញថា អាយុជនរងគ្រោះ ដែលកំពុងសម្រាកព្យាបាលក្នុងមន្ទីរពេទ្យ ចន្លោះពី ២ ទៅ ៨២ឆ្នាំ ។

សមត្ថកិច្ចអាមេរិក អះអាងថា នាពេលកើតហេតុ ហាងទំនិញ Walmart មានអតិថិជនចន្លោះពី ១០០០ ទៅ ៣០០០ នាក់ស្ថិតនៅក្នុងនោះ។

ក្រោយកើតហេតុ មនុស្សបីនាក់ ត្រូវបានឃាត់ខ្លួន ហើយសមត្ថកិច្ច បញ្ជាក់ថា បុរសវ័យ ២១ឆ្នាំម្នាក់មកពីក្រុង Allen រដ្ឋតិចសាសជាមនុស្សតែម្នាក់ ដែលត្រូវបានឃុំខ្លួនជាបណ្តោះអាសន្ន រង់ចាំការសួរចម្លើយ។ តាមប្រព័ន្ធផ្សព្វផ្សាយអាមេរិក ជនសង្ស័យម្នាក់នោះមានឈ្មោះថា Patrick Crusius ។

សាក្សីជាច្រើន បាននិយាយថា ខ្មាន់កាំភ្លើងចាប់ផ្តើមការបាញ់ប្រហារនៅវេលាម៉ោងប្រហែល ១០ និង៣០នាទី ព្រឹក (ម៉ោងក្នុងស្រុក) ។ បុរសជាខ្មាន់កាំភ្លើងរូបនេះ ពាក់អាវយឺតពណ៌ខ្មៅ ខោកាបូយ និងពាក់កាសការពារសំឡេង។

ក្រោយលឺដំណឹងដ៏រន្ធត់នេះ ប្រធានាធិបតីអាមេរិក ដូណាល់ ត្រាំ ដែលកំពុងចំណាយពេលចុងសប្តាហ៍លេងវាយកូនហ្គោល នៅរដ្ឋ New Jersey បានថ្កោលទោសការបាញ់រះដ៏ព្រៃផ្សៃនេះដែរ។ «នេះ ជារឿងអាក្រក់ដ៏បំផុត , មនុស្សជាច្រើន បានស្លាប់»។ លោក ត្រាំ សរសេរក្នុងគណនី twitter ផ្លូវការខ្លួនដូច្នេះ៕