អន្តរជាតិ
អតីតរដ្ឋមន្ត្រីការបរទេសឥណ្ឌាទទួលមរណភាពក្នុងវ័យ៦៧ឆ្នាំដោយគាំងបេះដូង ពិធីបុណ្យសពលោកស្រី Sushma Swaraj រៀបចំនៅទីស្នាក់ការគណបក្ស Bharatiya Janata Party ក្រុងញូវដេលី។ រូបថត AFP
× អតីតប្រមុខការទូតដ៏ចំណានរបស់ឥណ្ឌា និងជាសមាជិកជាន់ខ្ពស់របស់គណបក្សកាន់អំណាច Bharatiya Janata(BJP) លោកស្រី Sushma Swaraj បានទទួលមរណភាពនៅអាយុ៦៧ យប់ថ្ងៃអង្គារទី ៦ខែសីហា។
ទីភ្នាក់ងារព័ត៌មាន AFP ផ្សាយថា លោកស្រី Swaraj បានទទួលមរណភាពដោយសាររោគគាំងបេះដូង បន្ទាប់ពីលោកស្រី ត្រូវបានគេបញ្ជូនចូលបន្ទប់សង្គ្រោះបន្ទាន់ នៅមន្ទីរពេទ្យទីក្រុង ញូវ ដេលី។
លោកស្រី Sushma Swaraj គឺជាស្ត្រីទី២ ដែលកាន់តំណែងជារដ្ឋមន្ត្រីការបរទេស បន្ទាប់ពីលោកស្រី Indira Gandhi។ អតីតរដ្ឋមន្ត្រីការបរទេសរូបនេះបានកាន់តំណែង នៅក្នុងគណៈរដ្ឋមន្ត្រីរបស់លោកនាយករដ្ឋមន្ត្រី នារិន្ទ្រា ម៉ូឌី ចាប់ពីពីឆ្នាំ២០១៤ ដល់ឆ្នាំ២០១៩។
ក្រោយទទួលដំណឹងមរណភាពរបស់លោកស្រី នាយករដ្ឋមន្ត្រីឥណ្ឌា នារិន្ទ្រា ម៉ូឌី បានសរសេរបង្ហោះលើគណនី twitter ផ្លូវការខ្លួនដូច្នេះថា៖ «ជំពូកនៃភាពរុងរឿងក្នុងនយោបាយ ឥណ្ឌាមកដល់ទីបញ្ចប់ហើយ។ ប្រជាជនឥណ្ឌាឈឺចាប់ នឹងការបាត់បង់មេដឹកនាំដ៏ល្អម្នាក់ ដែលបានលះបង់អាយុជីវិត ដើម្បីសេវាសាធារណៈ និងការរស់នៅកាន់តែប្រសើររបស់ប្រជាជនក្រីក្រ។ លោកស្រី Sushma Swaraj គឺជាមនុស្សមានចិត្តល្អ និងជាអ្នកលើកទឹកចិត្តប្រជាជនឥណ្ឌារាប់លាននាក់»។
សូមរំលឹកជូនថា លោកស្រីអតីតរដ្ឋមន្ត្រីការបរទេសរូបនេះ បានទទួលបរិញ្ញាបត្រច្បាប់ និង បានចាប់ផ្តើមនយោបាយនៅក្នុងទសវត្សរ៍ឆ្នាំ ១៩៧០ជាមួយនឹងមេដឹកនាំសង្គមនិយម។ នៅក្នុងឆ្នាំ ១៩៧៥ លោកស្រី បានជំទាស់ទៅនឹងការដឹកនាំបែបផ្តាច់ការរបស់នាយករដ្ឋមន្ត្រី Indira Gandhi៕
© រក្សាសិទ្ធិដោយ thmeythmey.com