វិបត្តិកាស្មៀរ៖ ប៉ាគីស្ថាន ទម្លាក់ទំនាក់ទំនងការទូត និងផ្អាកការធ្វើពាណិជ្ជកម្មជាមួយឥណ្ឌា

អន្តរជាតិ

វិបត្តិកាស្មៀរ៖ ប៉ាគីស្ថាន ទម្លាក់ទំនាក់ទំនងការទូត និងផ្អាកការធ្វើពាណិជ្ជកម្មជាមួយឥណ្ឌា

08, Aug 2019 , 1:39 pm

រូបភាព

នាយករដ្ឋមន្រ្តីប៉ាគីស្ថានលោក Imran Khan ចូលរួមក្នុងកិច្ចប្រជុំមួយស្តីពីសន្តិសុខ នៅក្រុងអ៊ីស្លាម៉ាបាដ កាលពីថ្ងៃទី០៧ ខែសីហា ឆ្នាំ២០១៩។

ដោយ: ធៀន ភារិន្ទ

ប៉ាគីស្ថានបាននិយាយកាលពីថ្ងៃទី៧ ខែសីហា ថាខ្លួននឹងទម្លាក់កម្រិតទំនាក់ទំនងការទូត និងផ្អាកការធ្វើពាណិជ្ជកម្មបណ្តោះអាសន្នជាមួយនឹងឥណ្ឌា បន្ទាប់ពីទីក្រុង ញូវ ដេលី បានដកស្វ័យភាពពិសេសពីតំបន់កាស្មៀរ។

តាមការចុះផ្សាយរបស់ព័ត៌មាន Reuters លោក Shah Medmood Qureshi រដ្ឋមន្ត្រីការបរទេសប៉ាគីស្ថាន បាននិយាយនៅក្នុងកញ្ចក់ទូរទស្សន៍ថា៖ « យើងនឹងហៅអគ្គរដ្ឋទូតរបស់យើងត្រលប់មកវិញ ហើយបញ្ជូនបេសកជនរបស់គេត្រលប់ទៅវិញដែរ»។

ទន្ទឹមគ្នានេះដែរ រដ្ឋាភិបាលប៉ាគីស្ថានក៏បានចេញសេចក្តីប្រកាសមួយទៅលើ ការផ្អាកធ្វើពាណិជ្ជកម្មក្នុងស្ថានភាពធ្លាក់ចុះនៃទំនាក់ទំនងការទូតរវាងគូរប្រជែងធំមួយគឺ ឥណ្ឌា។ លើសពីនោះ ប៉ាគីស្ថាន ក៏នឹងយកសំណុំរឿងនេះទៅកាន់ក្រុមប្រឹក្សាសន្តិសុខអង្គការសហប្រជាជាតិឲ្យជួយដោះស្រាយផងដែរ។

វិធានការចុងក្រោយរបស់ក្រុងអ៊ីស្លាម៉ាបាដនេះ មិនទាន់មានប្រតិកម្មណាមួយ ត្រលប់មកពីរដ្ឋាភិបាលក្រុងញូវដេលីនៅឡើយទេ។

បញ្ហាចម្រូងចម្រាស់រវាង ឥណ្ឌា និងប៉ាគីស្ថាន កើតចេញពីការដកឋានៈស្វ័យភាពពិសេសពីតំបន់កាស្មៀររបស់រដ្ឋាភិបាលឥណ្ឌា។ កាន់តែធ្ងន់ធ្ងរជាងនេះ រដ្ឋាភិបាលឥណ្ឌាបានបញ្ជូនទ័ពប្រមាណជា ៧ម៉ឺននាក់បន្ថែមទៀត ទៅតំបន់ដែលមានប្រជាជនភាគច្រើនកាន់សាសនាឥស្លាមមួយនេះ។

ទឹកដីកាស្មៀរនេះ ត្រូវបានបែងចែករវាងឥណ្ឌា និងប៉ាគីស្ថានតាំងពីប្រទេសទាំងពីរនេះបានឯករាជ្យមក។ ក៏ប៉ុន្តែ ប្រទេសទាំងពីរនេះ បានទាមទារតំបន់នេះទាំងមូល។ ការណ៍នេះ បានបណ្តាលឲ្យប្រទេសទាំង២ធ្វើសង្គ្រាមរវាងគ្នានិងគ្នាចំនួន៣លើក ហើយនៅតែប្រភពនៃការតានតឹងដដែល៕